11月3日係日本公眾假期「文化之日」。呢一日，除咗日本全國各地多間美術館與博物館都會免費開放畀民眾參觀，據聞亦係放晴機率甚高嘅日子，相當適合出遊。點解「文化之日」會定於11月3日呢？下面就要同大家簡單介紹「文化之日」嘅背景、由來以及可以免費參觀嘅設施！
關於文化之日
「文化之日」於1948年被制定為公眾假期，宗旨在於「愛惜自由與和平，並促進文化交流之日」。原本呢一日係為慶祝1852年11月3日出生嘅明治天皇而指定為「天長節(現今天皇誕生日)」，目前則被改稱為「文化之日」。
2024年的文化之日是哪天？
2024年的文化之日是11月3日（星期日）。由於是星期日，所以翌日11月4日（星期一）為公眾假期 。
頒贈日本勳章之一「文化勳章」
「文化之日」當天會舉辦日本勳章之一「文化勳章」嘅頒贈儀式，由天皇陛下親自頒贈勳章予科學技術或藝術等領域、對文化發展提升有貢獻嘅各界人士，例如世界知名前衛藝術家‧草間彌生與知名服裝設計師‧三宅一生都擁有文化勳章㗎！
另外，對提升文化發展相關功績有卓越貢獻嘅人士，亦會被選為文化功勞者(文化有功人士)，係繼文化勳章之後嘅第二榮譽。據講歷代榮獲文化勳章嘅人，都係從文化功勞者當中選出嚟嘅呢！
城市傳聞…「文化之日」一定會放晴？
另一城市傳聞，就係11月3日係一個「經常放晴」嘅日子，就連日本媒體都經常稱呢種一年當中超容易放晴嘅日子為「另類放晴日」。放晴日子無可否認較適合戶外活動或外出郊遊等。咁今年嘅11月3日又會唔會晴天呢？就等我哋拭目以待啦！
部分博物館‧美術館 「文化之日」免費開放參觀
前文提到，文化之日宗旨為「愛惜自由與和平，並促進文化交流之日」。因此，日本各地部分美術館以及多數文化設施等都會喺呢一日免收取入場費。以下係小編為大家整理、部份關東地區可以免費參觀嘅主要設施。
東京都
- 國立西洋美術館（上野）
- 國立科学博物館（上野）
- 東京國立博物館（上野）
- 東京國立近代美術館（竹橋）
神奈川縣
- 神奈川縣立近代美術館 葉山（逗子）
- 横濱美術館（横濱）
埼玉縣
- 國營武蔵丘陵森林公園
關西地區獨有「關西文化之日」
除咗日本全國共通嘅「文化之日」之外，關西地區甚至仲會設置特有「關西文化之日」。每年11月，關西2府8縣(大阪府‧京都府‧兵庫縣‧奈良縣‧和歌山縣‧滋賀縣‧三重縣‧福井縣‧鳥取縣‧德島縣)都會舉辦文化活動，讓民眾更輕鬆親近與了解文化，亦希望藉此令鍾意文化、對文化有興趣嘅國民有所增加。
「關西文化之日」免費開放參觀設施
透過前述關西2府8縣嘅美術館、博物館、資料館等文化設施嘅協助，部分範圍內嘅設施基本上都會開放免費參觀常設展覽等(依設施規定不同)。由於各設施能夠免費參觀嘅日子有所不同，如果剛好呢段時間你身處關西而又有興趣前往的話，記得事先上網確認詳情喇！下面小編都會列出幾處外國遊客常去、「關西文化之日」可以免費參觀嘅設施。
京都府
- 京都鐵道博物館
- 京都國際漫畫博物館
大阪府
- 萬博紀念公園
- CUPNOODLES MUSEUM(安藤百福發明紀念館) 大阪池田
兵庫縣
- 姫路城
福井縣
- 福井縣立恐龍博物館
總結
除咗有多間可以免費參觀嘅設施之外，「文化之日」前後都會舉辦大大小小嘅藝術。如果剛好計畫呢段期間嚟日本旅行，推薦您可以善加規劃，順便接觸與了解日本文化！
Comments