而家有好多年輕人開始透過各種方式來提升自我競爭力，「出國」就係其中一種，而除咗留學之外，「工作假期制度」成為近年來年輕人最受歡迎嘅出國方式，除咗花費較低之外，仲有機會學到好多可以應用喺工作職場上嘅實務經驗等。今次，就由FUN! JAPAN嘅香港小編Cody，同大家分享「追日本明星」嘅佢，點樣攞著工作假期簽證赴日，喺預算有限嘅情況下，同自己鍾意嘅明星生活喺同一塊土地上呼吸空氣啦！
15歲就愛上日本娛樂 展開追星生涯
我從15歲開始鍾意睇日劇，繼而鍾意日本偶像明星，開始我嘅追星之路。雖然節目有字幕，但仍然好想即刻知道鍾意嘅明星講咗咩內容，所以就開始喺香港嘅日文學校學日文。亦因為經常睇日劇，好嚮往同日劇情景一樣嘅日本生活，同埋想喺日本睇鍾意嘅偶像、歌手嘅演唱會。喺香港學咗大約五年日文，想更認真地將日文學好，成為自己嘅專長，就喺大學畢業前真正下定決心要去日本喇！
善用工作假期制度 實現赴日夢想
好好彩，喺呢個時代有工作假期制度※，等家境唔富裕嘅我都可以去體驗日本生活。不過，最初同屋企人講呢個主意時，因為擔心個人安危，加上經濟狀況而遭到反對。大學畢業後，我先留喺香港工作三年，努力儲錢，之後終於得到家人支持，就喺2017年飛嚟夢想中嘅日本。而第一站揀咗去北海道，就係為咗去實現我嘅追星之夢——睇Johnny's事務所偶像團體「嵐」嘅演唱會！
※工作假期制度：日本同對象國‧地區之間嘅協議，為提供青年能有體驗日本文化及日常生活方式嘅機會，認可一定嘅滯留期間，為補足旅費，而從事打工活動嘅一種制度。
邊打工邊旅行邊追星嘅Working Holiday
拎住工作假期簽證嘅一年時間，我曾經喺千葉嘅溫泉酒店工作、長野滑雪場賣票、到群馬露營場打工換宿，之後就到東京，做過遊樂園賣票處同餐廳侍應嘅工作，最後就係而家嘅公司FUN! JAPAN翻譯文章。咁難得可以喺日本打工，試吓做各種唔同嘅工作都係唔錯嘅體驗同經驗吖嘛～（但又唔好覺得辛苦就輕易辭職喔！我嘅工作都係合約期滿或至少有半年經驗的）
而當中，長野縣嘅滑雪場工作係最令我印象深刻嘅！香港唔會落雪，加上滑雪場多位於深山，四周美麗而寧靜嘅大自然環境喺香港好難睇到。放假時仲可以盡情滑雪添，又可以學多一個技能喇。而且我打工嘅滑雪場包食包住，又可以免費滑雪，所以我就可以輕鬆儲錢，當做之後嘅旅遊基金同追星基金啦！
選擇喺FUN! JAPAN工作嘅原因
工作假期嘅後半年，我透過網路招聘APP搵到FUN! JAPAN，「用廣東話將日本嘅情報介紹俾香港人睇」嘅工作內容實在吸引！入嚟公司後，唔只翻譯、寫作，仲有機會去日本各地採訪等，工作內容相當豐富，令我學到更多，亦令我決定喺工作假期簽證結束之後，換成工作簽證繼續留喺FUN! JAPAN工作。
除咗有唔同國家嘅同事可以互相交流之外，同事之間嘅感情都唔錯㗎！唔同日劇經常出現嘅傳統公司，FUN! JAPAN嘅上司下屬關係無分得咁明確，公司上下都會一齊去打保齡球，連社長都會落場同大家一齊玩添。呢個真係同日劇入面好唔同呢！（笑）
俾未來想嚟日本工作假期嘅人嘅建議
如果你都同我一樣，想利用工作假期制度嚟日本嘅話，推薦大家可以去度假村或者滑雪場打工。除咗可以認識到來自日本唔同地區，或唔同國家嘅朋友，其中有好多工作地點都提供食宿，大家住埋一齊，相處時間多咗，更容易可以增進感情。就算離開咗滑雪場已經2年，但而家仍然會同日本朋友保持聯絡，仲會約埋一齊去玩添！另外，通常地點比較偏遠，無咩消遣嘅話，確實係一個儲錢嘅好機會。而且宿舍有固定食飯同沖涼時間，作息定時，覺得人都健康啲！休息時間仲可以好好計劃下一步，去第二個城市繼續挑戰！
最後，都建議大家出發前，喺香港先學到能夠溝通嘅日文程度先嚟工作假期，咁樣嚟到就可以用日文同日本人傾偈、交流，日文程度隨之而然亦會進步神速㗎！
Comments