全球熱愛嘅壽司（Sushi）可謂種類繁多，由喺吧檯享用嘅高級壽司料理到迴轉壽司，皆各有千秋。然而，細細件嘅壽司唔單止種類多，連食用方式亦有著日本嘅獨有規則。今次不妨跟住小編，深入了解正宗日本壽司禮儀，齊齊升級成為識食壽司達人！
壽司的歷史？原來起源於東南亞地區？
壽司係將醋飯和配料（主要為海鮮類）食材搭配而成嘅和食（日本料理）。
如今，壽司經已成為全球認識嘅「日本代表料理」之一，然而其起源被認為源自於東南亞嘅「熟鮓」。
「熟鮓」係指居住喺山區嘅民族，為咗長期保存難以入手嘅魚而創造嘅一種發酵食品。為咗保存河川魚，山區民族們將米或其他穀類煮熟後，與魚一齊浸泡，讓米粒充分發酵成糊狀，以便保存。
相傳「熟鮓」係於奈良時代（約710年至794年）傳入日本。由呢個時候開始，壽司喺日本獨自發展，去到江戶時代（1600年至1868年），米醋嘅生產和流通變得繁盛，人們開始使用混合醋嘅飯去製作壽司。隨後，演變出手握壽司嘅形態，便成為現今經常享用嘅日本壽司料理。2013年，日本傳統飲食文化「和食（Washoku）」被聯合國教科文組織列為無形文化遺產，吸引著全球各地人士，魅力四射。
壽司過去係於慶祝場合和喜慶時刻享用嘅高級美食，但現時除咗迴轉壽司店之外，喺超市和百貨公司地下食品區等地亦係常見商品之一，價格亦變得更加親民，令大眾可以輕鬆品嚐壽司嘅美味。日本旅行期間，不妨喺當地品嚐壽司，親身體驗正宗壽司嘅好味道！
壽司和刺身的分別
刺身係指「主要係將生魚類等切成薄片，直接食用嘅料理」，而壽司係指「將醋飯與各種食材搭配而成嘅料理」。
點解係寫「食材」而唔係寫「海產」呢？因為日本有唔少壽司款式並無使用魚類作食材。壽司形態除咗「握壽司」之外，仲有「捲壽司」、「散壽司」、「稻荷壽司」※（即腐皮壽司）等各式各樣壽司，無論係形狀，定係使用嘅食材亦相當多元化。
※稻荷壽司係將醋飯塞入煮得鹹甜炸腐皮內嘅一種壽司。
製作壽司飯的方法
以下落嚟，小編將介紹製作壽司飯（又稱醋飯）嘅方法，以及不同種類嘅壽司和製作方法。
適合製作壽司飯的米的種類
米種類主要可分為日本稻米（ジャポニカ米）、印度稻米（インディカ米）和中國稻米（ジャバニカ米）三種。適合製作壽司飯嘅係「日本稻米」。食落口感豐富且帶有甜味，放涼後亦能保持口感，且擁有適中程度嘅黏性，因此適合製作壽司飯。
一般壽司飯嘅製作方法
用於壽司嘅飯稱為「醋飯」，係指將煮熟嘅米飯拌入米醋，並經冷卻後嘅醋飯。握壽司中，醋飯主要用作為底部，而喺壽司店中，壽司飯通常稱之為「Shari」（シャリ），其味道酸甜，與魚生完美搭配，能帶出美味風味。
日本人習慣使用「1合」、「2合」作為量米嘅單位，以下落嚟，會介紹製作3合份量壽司飯嘅3個步驟。
STEP 1
將以下所有材料放入電飯煲炊煮
- 米 3合份量（450克。用水沖洗過嘅米）
- 水（540毫升。讓米完全浸泡於水中）
- 昆布（8×8 cm 1片）
STEP 2
將以下所有材料混合攪拌，製作「合成醋」
- 米醋（4大湯匙）
- 糖（2大湯匙）
- 鹽（1又2/3小湯匙）
STEP 3
當米飯煮好後，靜置10分鐘，讓蒸汽繼續蒸煮米飯，然後再取出昆布。煮飯完成後，放入碗或其他容器中。倒入第二步製作嘅合成醋，邊用扇子輕輕搧風讓白飯降溫，邊用「切」飯嘅方式攪拌混合。用湯匙攪拌時，飯不會變得黏稠，米飯會保持輕盈的狀態，表面會呈現顆粒分明的狀態。記得用飯殼攪拌，米飯就唔會變得黏稠，粒粒分明之餘表面仲會變得有光澤。當飯粒表面有光澤，且稍微冷卻後，醋飯大功告成！
壽司的製作方法
壽司製作方法會根據壽司形狀而有所不同。小編整理好各種不同形狀嘅壽司名稱、特徵，以及簡單嘅製作方法等，為大家逐一解說。
握壽司
將魚貝類等食材放喺壽司飯上，再緊握成一口大小嘅長方形壽司。首先，喺魚類等食材上放上些少山葵（Wasabi），然後再將食材與壽司飯兩者合併。刺身（薄切魚生）雖然係握壽司嘅常見食材，但亦有放上燒烤後淋上甜鹹醬汁嘅鰻魚或海鰻（星鰻）、熟蝦、煎蛋等食材嘅握壽司。
軍艦壽司
用紫菜捲住一口大小嘅醋飯，然後喺上面擺放海膽、三文魚籽、蔥花吞拿魚泥等容易散開嘅食材或拌菜。
太巻
直徑最粗嘅紫菜卷，被稱為「太卷」。喺長21cm×寬19cm嘅紫菜上舖上壽司飯，再將海鮮、青瓜、蛋等食材切成細長條，然後擺放喺壽司飯上面，捲成卷狀，切成圓塊狀享用。
細巻
細卷係使用寬闊度比太卷小一半嘅紫菜製成嘅壽司卷。通常只包裹一種食材配料，例如使用吞拿魚捲製而成嘅鐵火卷、使用青瓜捲製而成嘅河童卷、使用納豆捲製而成嘅納豆卷等等，都係著名嘅細卷例子。當然，獨特嘅細卷配料亦種類繁多。當中，除咗有干瓢巻、使用生姜甘醋漬捲製而成嘅醃姜卷，亦有將近年大受歡迎嘅壽司配料三文魚等切成幼細狀後，捲製而成嘅壽司卷、 使用炸蝦天婦羅飯糰捲製而成嘅嘅壽司卷等等。另外，喺連鎖迴轉壽司店，仲有機會遇到多款創意細卷，令人耳目一新！
手捲壽司
手捲壽司與一般紫菜捲唔同，係一款捲成類似雪糕筒狀嘅壽司。製作手捲壽司時無需太多技巧，甚至小朋友都可以輕鬆完成，因此經常出現喺一般家庭嘅飯檯上。
製作方法係，喺攤平嘅紫菜上舖上壽司飯，然後放上喜愛嘅海鮮，如吞拿魚、鰤魚、三文魚等切成細條狀嘅魚生，以及青瓜、三葉芹、紫蘇等蔬菜，然後迅速捲起來！手捲壽司可根據個人喜好自由搭配食材，為其魅力所在。
押壽司
押壽司係一種將壽司飯舖喺木盒內，再放上魚，然後從上至下用力擠壓而成嘅壽司。喺日本，當乘坐新幹線或飛機時，喺車站或機場販售嘅便當中經常可以見到各種款式嘅押壽司身影。
稻荷壽司
稻荷壽司又稱為腐皮壽司，係一種將壽司飯放入經滷煮後嘅油炸豆腐皮內嘅壽司。雖然多為直方體呈圓筒狀，但亦會見到根據其油炸豆腐皮形狀，而製作成三角形款式嘅腐皮壽司。除咗以簡單嘅壽司飯作內餡，有時亦會使用混入碎胡蘿蔔或碎蓮藕嘅混合飯作內餡。
散壽司
壽司飯上撒上海鮮、錦絲玉子※（日式蛋絲）、菇類、蔬菜等食材嘅壽司。由於色彩豐富，外觀漂亮，與手捲壽司一樣，經常成為家庭聚餐或家常菜，出現喺日本家庭嘅飯檯上。
※錦絲玉子係指將薄煎蛋切成細長條狀嘅食材。
壽司的食用方法
當握壽司送到去你面前，唔知你通常會點落手食呢？係咪習慣將成件壽司都蘸上醬油再放入口？小編就唔多推薦呢種食法。咁究竟壽司要點食至好？以下落嚟，小編為大家介紹壽司嘅正確食用方法，並分成三個步驟作解說。
STEP 1
通常喺餐廳點壽司時，除咗上菜嘅壽司盤之外，仲會為每人另外附上一個稱為「Sashichoko」（さしちょこ）嘅細碟，用來取少量醬油作蘸壽司之用。當「Sashichoko」細碟送嚟嘅時候，就將醬油倒入去吧。
STEP 2
用筷子或用手食壽司。
經常有人誤以為喺高級餐廳要用手食壽司先至係正確嘅食法，但其實可以根據個人喜好來決定用筷子定係用手。如果唔想整污糟對手就用筷子，或配合一同用餐嘅上司或長輩嘅食法去決定用手食定係用筷子食，自由選擇即可。然而，部分高級餐廳，壽司師傅為免壽司材料崩散，會將捏好嘅壽司直接遞畀客人，請遵從相關店家嘅做法享用。另外，海鰻（星鰻）、瀨尿蝦、貝類等壽司材料，上面會塗抹一種叫做「醋煮」嘅甜鹹醬汁，而喺江戶前壽司等地方，亦會喺壽司材料上塗抹「煮切醬油」。因為呢類壽司食材上有「醋煮」或「煮切醬油」，用手拎嘅話會比較黐手，所以建議用筷子享用。
STEP 3
究竟食壽司嘅時候，要如何蘸醬油呢？蘸醬油時需將魚生向下，讓魚生一側蘸上「Sashichoko」細碟內嘅醬油後，再一口吃掉。
另外，有人會放山葵入「Sashichoko」細碟內，將山葵溶解於醬油內作蘸料做用。但其實，呢個行為喺日本人眼中係不符合禮儀嘅食法。原因係會整污糟醬油，影響壽司嘅美觀之餘，山葵嘅辛辣和香氣亦會隨之消失。理想情況係享用完畢後，細碟裡仍然保持「只有醬油，並無弄髒」嘅狀態。
賞味期限
壽司材料基本上係生鮮食材，即日食用係最安全。如果打算喺百貨公司地下商店或超市購買，再喺酒店內食用嘅話，該商品嘅消費期限或賞味期限應該會顯示於標籤上。
但係，由於壽司食材係魚生類，容易變質，即使喺賞味期限內，亦要放入雪櫃保存，呢一點要多加注意。
食壽司的先後次序？
如果第一次喺日本食壽司，建議無需理會先後次序，可以任意咁食你鍾意嘅壽司。但係，如果係去高級壽司店，或者想成為壽司達人，咁就建議按照壽司店一般推薦嘅順序嚟食壽司啦！
如果想更加享受日本壽司嘅美味，不妨參考以下嘅次序。
- 首先，由清爽口味嘅白身魚（鯛魚、比目魚、鱸魚等），以及魷魚、八爪魚開始！
- 然後享用玉子、味道濃郁嘅赤身魚壽司。
- 享用完赤身魚壽司，可以食用醃姜片（甜醋醃生姜）或者加入醋製作嘅魚壽司，清一清口腔味道。
- 最後再食海膽、三文魚籽等具濃厚甜味嘅壽司，青瓜卷等卷物，最後嘆返杯綠茶作完美句號！
著名壽司種類一覽
小編根據以上「壽司嘅美味享用方法」，介紹部分著名嘅壽司食材種類。
順帶一提，如果唔知食邊種壽司好，可以對壽司店嘅工作人員講「Omakase-de」(おまかせで)，廚師就會根據當時嘅時令食材為你製作美味嘅壽司啊。
- 吞拿魚 (マグロ)
- 三文魚 (サーモン)
- 甜蝦 (アマエビ)
- 魷魚 (イカ)
- 八爪魚 (タコ)
- 鰤魚 (ブリ＆ハマチ)
- 間八魚 (カンパチ)
- 三文魚籽 (イクラ)
- 海膽 (ウニ)
- 帆立貝 (ホタテ)
- 鯖魚 (サバ)
- 鯛魚 (タイ)
相關文章
Comments