講到大阪，好多人都會諗起當地最熱鬧嘅地區「難波」與「道頓堀」，事關有齊晒Shopping購物熱點、旅遊景點與美食等等元素，令人玩足成日都玩唔完！無論您係要搵最新最潮嘅商品，抑或係充滿日式古典風味嘅手信，去到大阪難波與道頓堀保證通通都可以搵得到。
難波一帶分成好幾個區域，當中所販賣嘅商品主題與種類都唔一樣，從潮流服飾、廚具到動漫周邊商品應有盡有，建議大家可以先從自己最想去嘅區域開始出發，而當中小編最推薦就係必去嘅商店街！商店街勝在沿路幾乎都係「有瓦遮頭」，就算落雨都可以自在尋寶，滿載而歸！
南海電鐵「難波站（なんば駅）」直通：NAMBA PARKS
都市複合型商業設施 「NAMBA PARKS」與直通關西國際機場嘅南海電鐵「難波站」相連，建築設計感相當現代化，貨品種類由流行服飾、雜貨、美妝、食品等等，最新流行至經典商品都應有盡有。「NAMBA PARKS」內有多間店舖進駐，當中梗係唔少得大家耳熟能詳嘅知名品牌，滿足大家行街Shopping嘅購買慾。6樓至8樓亦有多間餐廳與Café，美食選擇相當多元化，無論係堪稱日本必食嘅壽司，抑或係輕量級選擇嘅三文治等等應有盡有，滿足各種需求。如果想要體驗日本戲院，亦可以上去8樓睇返場電影喔。
2F～9F斜坡上嘅屋頂庭園「PARK GARDEN」獲選為全球最美空中庭園TOP 10，稱得上係世界級知名景點。庭園內種植著各種植物，隨著季節變化可以欣賞到唔同嘅景緻，就算唔Shopping購物都可以上去行個圈！
- 景點名稱：NAMBA PARKS
- 交通：與南海電鐵「難波站」直通，經由車站2樓天橋徒步即可到達。
想揾五花八門嘅廚具？廚具迷必去景點：千日前道具屋筋商店街
俗話有云：「工欲善其事，必先利其器」，想要成為料理好手、大展廚藝，去「千日前道具屋筋商店街」慢慢尋寶一定可以搵到「您想」廚具用品！商店街沿路上日本料理專用廚具相關店鋪一字排開，從廚房用品、餐具、廚具五花八門通通都包羅萬，例如係精緻日本漆器商店、販售章魚燒烤盤嘅店舖、陳列著設計精緻嘅筷子或者係俐落好切嘅日本靚廚刀，各種與料理相關嘅商品都通通可以喺到搵得到。有唔少鍾意「落廚煮幾味」嘅日本人或者係餐廳老闆等等，都會三不五時去「千日前道具屋筋商店街」尋寶。每年10月甚至會舉辦廚具節，話唔定仲會有驚喜新發現呢。
- 景點名稱：千日前道具屋筋商店街
- 交通：從難波站或近鐵日本橋站徒步約數分鐘即可抵達
有「西日本銀座」之稱嘅心齋橋筋商店街
「心齋橋筋商店街」非常熱鬧繁華，每逢weekend放假更加係人山人海，到訪人次更曾經高達約12萬人。「心齋橋筋商店街」被譽為「西日本嘅銀座」，喺江戶時代已經係大家經常去Shopping購物嘅地點，後來發展成為大阪最繁榮嘅購物天堂之一。「心齋橋筋商店街」美食、服飾、藥妝等店舖多多，商品琳瑯滿目令人行極都行唔完！除咗有GUCCI等國際知名嘅品牌店，更加有唔少親民價品牌以及日系品牌進駐，譬如耳熟能詳嘅「UNIQLO」，開幕當時更吸引唔少人專程到訪。另外仲有傳統日本和服店、美式二手服飾店等，美食餐廳亦多到令人眼花撩亂。無論係一家大細，抑或係三五知己同遊，都可以行到心滿意足，買得稱心如意。
- 景點名稱：心齋橋筋商店街
- 交通：地下鐵御堂筋線心齋橋站5號出口、6號出口可直接行到去商店街。
唔駛驚日曬雨淋嘅地下街購物天堂：大阪難波地下街「NAMBA WALK」
「NAMBA WALK」地下購物街，以大阪地下鐵Osaka Metro御堂筋線「難波站」為中心，往東邊延伸到Osaka Metro「日本橋站」，往西邊可以通往JR「難波站」。即使落雨都可以盡情購物與享受美食！「NAMBA WALK」地下購物街與3個主要車站相通，長度約有715米，當中劃分成3個區域，以1～3番街區分，除咗有服飾、美容用品、仲有手信、雜貨等各種店鋪進駐，人氣熱話嘅新商品都可以喺度揾得到！「NAMBA WALK」地下購物街滿足大家購物慾嘅同時仲可以滿足埋大家嘅食慾相當加分，餐廳以及Café嘅選擇非常多，當中無論係日式、西式、中式等正餐，抑或係甜品等等都應有盡有。「NAMBA WALK」地下購物街亦擁有多間獨立又獨特嘅店舖，仲有機會遇到風格獨特嘅工藝品、手信等等。
「NAMBA WALK」內共有5個廣場，不時會展出美術品或者舉辦活動，等遊客可以感受到購物以外嘅樂趣。例如喺1番街「ART PARK」以及3番街「NEWS PARK」，就展示出美國三大美術館之一嘅「芝加哥美術館」館藏作品嘅複製陶板畫，又或放有鯨魚外觀紀念雕塑嘅休憩空間「鯨園」，簡直就好似美術館一樣嘅地下街令人大飽眼福。
- 景點名稱：心齋橋筋商店街
- 交通：從地下鐵御堂筋線難波站、日本橋站至JR難波站可直通。
350米長嘅時尚流行街道：戎橋筋商店街
戎橋筋商店街長約350米，亦係大阪最繁華嘅商店購物街之一，稱得上係年輕人尋找最新流行時尚嘅天堂。戎橋筋商店街店舖種類豐富，除咗有流行服飾、人氣嘅街頭品牌之外，仲有唔少當地美食、特色手信、Café 、藥妝店等店鋪林立。您可以選擇去大型百貨公司入手高級品牌，亦可以行去大街小巷尋寶，順便去Café嘆返杯靚咖啡非常寫意。
另外，戎橋筋商店街係一條拱廊式商店街，位於戎橋與南海難波站之間，就算係落雨天都可以盡情地享受行街樂趣！
- 景點名稱：心齋橋筋商店街
- 交通：戎橋筋商店街鄰近地鐵Osaka Metro難波站、大阪難波站、南海難波站，步行數米即可抵達日本橋站。
御宅族天堂：Den Den Town 電電城
去東京要入手動漫週邊、遊戲模型，電器產品嘅話，第一時間一定係諗到要去秋葉原，其實大阪都有一個「秋葉原」，就係位於大阪日本橋嘅Den Den Town 電電城！昔日以販售無線電設備而聞名，隨著時代變遷，所販售嘅商品種類亦越嚟越多樣化。Den Den Town 電電城亦有「日本橋電器街」或「大阪秋葉原」之稱，裡面大約有成500間以上販賣電器、音響、電腦等產品嘅專門店令人目不暇給。
Den Den Town 電電城目前分成兩大主要街道，喺「堺筋」，到處都係大型電器店或者電子產品專賣店，您諗得到甚至乎意想不到嘅電器產品都應有盡有；而「御宅族街」聚集多間售賣模型、動漫遊戲週邊嘅商品專門店，更加係關西地區最大規模嘅「御宅文化街」，無論係動漫Figure公仔、遊戲卡、扭蛋、總之所有與動漫相關商品都可以喺度揾得到。另外，每年都會舉辦日本國內最大規模嘅COSPLAY活動「STREET FESTA」，身為御宅族同好嘅您，又或者想要入手心儀嘅電子產品或動漫週邊，Den Den Town 電電城絕對唔會令您失望。
- 景點名稱：Den Den Town 電電城
- 交通：難波站南口出來，步行5～10分鐘即可抵達；或從地鐵堺筋線惠美須町站前往。
Comments