日本人有禮貌、遵守規矩嘅民族性聞名全球。古語有云「入鄉隨俗」，各位去到日本旅行時，都要記得遵守當地文化禮儀！為此，本文就會為大家介紹簡單易明嘅排隊禮儀、避免做個失禮遊客！旅行前先理解日本排隊文化，保證您嘅日本之旅將會過得更舒適～
應該從邊到開始排隊？
喺日本排隊嘅時候，原來唔應該緊貼前面嘅人！？大家本已習以為常嘅習慣，去到日本時更需要多加注意！尤其係喺便利店或超級市場等店舖收銀處排隊時，大家都唔會太過貼近前面排梗隊嘅人，而係會跟著貼喺地板上嘅箭咀貼紙排隊。原因係保持通道暢通，亦可以避免到麻煩同店內其他顧客，更重要嘅係「人與人之間保持適當距離」係日本人嘅基本常識！
排隊時跟住地板腳印圖案排就包無出錯！
唔知大家喺等排隊畀錢時，平常會從邊個位置開始排呢？大部分情況下，日本收銀處附近嘅地板都會貼有腳印圖案貼紙，要排隊時先搵吓如上圖般嘅貼紙、又或寫有「請在此等候（ここで待ってください）」等語句，從貼紙位置開始排隊就實無死！
排隊方法
日本嘅排隊方法大概可以分為兩種。一種叫做「並列型」（又稱作「分岔型」），即按收銀處劃分隊列；另一種方式則係顧客先排成一列，等到收銀職員示意後再到各收銀處畀錢嘅做法。無論係邊種方法都好，就算您見到第二條隊排得比較快，都記得千祈唔好中途插隊，咁係非常無禮貌㗎！
從2020年開始、全球排隊文化就起咗巨變…
受全球新型冠狀病毒疫情影響，「排隊」文化由2020年起出現巨大變化。日本社會至今理所當然嘅「根據腳印箭咀排隊」嘅習慣，亦慢慢擴展至多個其他國家。為防止疫情擴散，人與人之間保持適當社交距離（Social Distancing）被視為重要對策之一並應用於日常生活中各方面。「排隊」一事可謂已成為全新生活方式嘅重要部分，再唔係只屬於日本嘅文化呢！
Comments