近排無得飛去日本shopping？唯有上網購物止住癮先！只不過日本購物或拍賣網站通常只對應日文，想買嘢時逐一查翻譯又好麻煩…不如一於先記住常見單詞，以後網購時就可以更得心應手啦！
【形式相關】
通販
我哋經常講嘅「網購」，日語漢字其實就係「通販」，因此只要見到「通販」2字就可以知道網站有做網路平台銷售生意！另外常見嘅相關講法包括取自「E-Commerce」嘅縮寫「「ECサイト（EC網站）」，「オンラインストア（online store）」、「オンラインショッピング（online shopping）」等，搜尋心水產品時不妨添加以上關鍵字試試～
オークション
除各個品牌嘅銷售平台以外，另一大家經常都會使用到嘅肯定係拍賣網站！「拍賣」一詞於日文中最常用片假名「オークション（auction）」表達，適用於網絡拍賣或土地拍賣等競標行為。順帶一提，「競売（けいばい / せりうり）」亦有同樣意思㗎。
フリマ
「フリマ」為「フリーマーケット（flea market）」跳蚤市場縮寫，而如果要形容近年興起、由個人與個人之間嘅二手交易平台，通常後面會聯同「アプリ（a-pu-ri / App）」一齊出現，意即「二手交易平台手機App」，想要執平價或稀有二手貨時非常推薦。
【流程相關】
代行 / 代理
日本網購一大難題，就係需要搵代購幫手買嘢！「代購」喺日文中有「代理購入（だいりこうにゅう）」、「購買代行（こうばいだいこう）」或「買物代行（かいものだいこう）」等多種叫法；如果需要將貨品從日本轉送或集運到您嘅收貨地址，您就會需要用到「転送（てんそう）」服務喇～
入札 / 落札
當您想要表達喺拍賣網站上「落bid（叫價）」呢個舉動的話，可以用「入札」；想要即刻結標的話，可以留意賣家有無設定「今すぐ落札（立刻結標）」價錢。當您順利贏得拍賣，恭喜您—您已經成功成為「落札者」喇！
買取
日本全國林立數之不盡嘅二手店舖，當中有賣二手衫、日用品、CD/DVD等，總之您諗得到嘅都有得賣！凡親去到呢類二手回收舖，您都一定會見到由「買う（購買）」、「取る（取得）」組成嘅複合動詞「買取」，即「收購」之意。有唔少店舖都歡迎外國遊客拎唔要嘅二手物品去回收，想要幫屋企大掃除嘅可以嘗試一吓～
カート
「カート（cart）」可指等電動小型車等搬送貨物嘅小型車，當用於購物平台時，意思就係「購物車」喇。
値下げ / セール
香港人同日本人一樣，見到減價貨就會雙眼發光，所以認住「値下げ / セール（減價 / sale）」就包您「無走雞」！另外如果見到「タイムセール（time sale）」，就要記得快快手畀錢，事關呢類型減價屬限時優惠，錯過咗就無㗎喇～
込 / 別
其中一樣網購平台必定需要注意嘅，就係「送料（運費）」。常見用詞有「送料込み（已包括郵費）」；「送料別（未包括郵費）」，購物前記住睇清楚商品有無包郵費呀！大家如果有留意開店舖價錢標籤的話，都會留意到消費稅旁邊通常都會有咁嘅寫法～想慳運費的話，就要更加認住「送料無料（免運費）」！
更多相關日語資料
FUN! JAPAN網站推出咗「日本語能力試驗對策」嘅練習試題，目前有N1、N2同N3嘅文法、語彙、讀解、聽解…等試題，並且陸續新增中，準備緊日文考試嘅讀者不妨去試吓做練習啦～
以上所介紹嘅網購、拍賣常見日文單字，大家覺得點呀？留在家中shopping時，都可以邊買邊學日文呢。大家有咩想學咩日文字？歡迎留言話俾我哋知！
Comments