今日要為大家介紹一種對日本人嚟講可能係常識、但一般遊客未必會知嘅日本文化！當您去到舖頭或餐廳畀錢嘅時候，通常情況都係先直接將錢交畀店員、然後再拎貨品或找續吧？驟眼睇，以上流程並無錯，但係事實上卻會令雙方出現尷尬氣氛！接落嚟，我哋就會為大家介紹日本獨有嘅畀錢方式；除此之外，我哋亦明白有唔少讀者們去到外國旅遊時，都會曾經因言語不通而需要用到「Body Language」傳達自己嘅意思，因此本文亦會順便介紹幾種有關「錢」嘅手勢㗎！
日本人唔習慣將現金「一手交一手」？！
相信有去過日本旅行嘅讀者都會發現，餐廳或店舖嘅收銀處附近都會放有「錢兜」。顧名思義，即係畀錢時放紙幣、散紙嘅地方。透過使用「錢兜」，就可以避免觸碰到對方隻手並避免出現尷尬情況，而且將錢一目瞭然地放喺兜上，更有放便店員確認數目及收錢嘅好處。因此下次喺日本畀錢時，記住要搵吓「錢兜」嘅位置，做個入鄉隨俗嘅遊客喇！
何謂「錢兜」？
將錢放喺「錢兜」內，係一種日本人之間嘅習慣文化。最初目的係為更快更準確地確認現金總數，其後慢慢演變成現時滲透社會上下嘅一般文化。
「X」原來唔係「No」、而係「埋單」嘅意思？！
大家知道「X」手勢（手指打叉）喺日本有咩意思嗎？原來「X」喺日本並唔係大家所諗嘅「唔需要」或「唔係」！
事實上，「X」係一種示意「埋單」嘅手勢。當您下次喺餐廳食完飯、想叫店員埋單時，不妨試吓做呢個手勢，店員好快就會為您遞上帳單㗎喇！
日本嘅「OK」手勢並唔一定係「好呀！」嘅意思？
另外仲有大家都非常熟悉嘅「OK」手勢，喺日本都唔只係「OK」咁簡單！大家又知道佢仲有乜嘢意思嗎？
部分情況下，日本「OK」手勢亦可以代表「錢」，將「OK」手勢上下反轉、姆指與食指圓圈向上就係！係咪好新奇呢？
「每個國家都有唔同文化」—貌似一般常識嘅道理，往往去到國外旅行時就會好大機會忘記得一乾二淨。所以為咗下次去到日本旅行時唔好令對方感到尷尬，記住bookmark低本文，做足準備功課啦～
Comments