近年越來越多香港人愛上露營（camping）甚至係豪華露營（glamping），可惜香港地少人多，因此逐漸有唔少人都會趁去旅行時跑到海外露營，其中首選之一就係大家都熟悉嘅日本！提到日本首選露營勝地，大家可能會首先諗起富士山，不過除咗富士山，日本當然仲有更多自然資源相當豐富嘅好去處都一樣適合露營啦～今次FUN! JAPAN編輯部就想同大家介紹一處露營場地，從東京揸車約2小時路程即可抵達嘅「五光牧場露營場」（Goko Pasture Auto Camp）。
關於長野・五光牧場露營場
從東京揸車上高速公路，車程約2小時即可抵達五光牧場露營場。場地位處橫跨長野縣與山梨縣、海拔約1300米嘅八岳山山麓與野邊山高原上，佔地相當遼闊。
一步入露營場，大片柔軟綠色草地即刻映入眼簾！據聞露營場內草地都無使用農藥或肥料，眼前所有景色完全無受到人為破壞，可謂真真正正屬於「純天然」嘅露營場地。夏天嚟到的話，非常推薦您喺綠意盎然嘅樹蔭底下乘涼啊～
場地內雖然無豪華露營設備，不過就一般露營場嚟講，五光牧場露營場設備依然相當齊全。遊客可以將座駕停泊於帳篷旁邊，而場地內亦設有2處洗手間，內裡非常乾淨。露營場內嘅水都係新鮮又甘甜嘅山泉水，直接飲用完全無問題！
同場亦設有2處清洗地方，其中一處設於料理區旁，方便大家煮完飯之後洗碗洗厚。更特別嘅係，呢到仲可以用柴火煮食𠻹！唯獨係要記得自己帶清潔劑同海棉～
長野・五光牧場露營場追加玩法
露營場內可以進行多項戶外活動，您亦可以散步到瞭望台睇靚景、BBQ、悠閒地乘涼閱讀，不過難得一場嚟到郊外，小編最推薦嘅當然就係「放空」啦！
佔地遼闊嘅場地內居然仲有足球場！如果同一班朋友嚟嘅話可以進行比賽，家庭客都超適合畀小朋友放電盡情奔跑～
長野・五光牧場露營最佳造訪時期
小編推薦日本梅雨季節結束後，即夏天到秋天嘅7月下旬至10月下旬左右造訪。如果遇上梅雨季節，除咗會不時落雨令全身濕透之外，雲層亦會相當厚，比較難欣賞大自然美景！
如何從東京前往長野・五光牧場露營場
雖然您可以乘搭大眾交通工具前往五光牧場露營場，不過因為露營場距離車站有一段距離，加上自己要攜帶露營用具與食材等，因此建議自駕會比較方便，而且自己揸車亦更方便四周觀光嘛～從東京出發、經高速公路的話2小時左右即可抵達場地，如果搭巴士的話則需要3小時左右。
設施情報
- 設施名:五光牧場露營場
- 地址：長野縣南佐久郡川上村樋澤1417
- 交通方式:
① 開車:
・從中央高速道「須玉」交流道經由國道141號
・從中央高速道「長坂」交流道經由國道28號接國道141號
② 乘搭大眾交通工具:JR小海線 野邊山站下車後步行約30分鐘 - 語言：日語
- 可否使用信用卡：可
Comments