去東京旅行時搜購家品係唔少人嘅必做行程。萬眾期待，IKEA首間東京都心型店舖終於正式降臨原宿，而且店內當然仲唔少得日本限定特色！自問係品牌粉絲嘅您，原宿店絕對值得您去朝聖！
蝸居福音！4大主題滿足都市人所需
IKEA原宿首要特色，就係作為日本國內第一間開設於市區嘅分店。考慮到大城市房間間隔與尺寸有限，因此店內商品亦特別針對「睡眠」、「整理」、「休憩」、「料理」共4種城市人日常生活所需，例如係睡房傢俬套裝就充分善用有限嘅室內住居空間，為不同大小與佈局嘅嘅房間提供最合適嘅生活提案，東京單身貴族以外嘅香港蝸居亦一樣適合㗎！
家品以外，IKEA原宿分店1樓設有日本國內、甚至全國分店首間「瑞典便利店」。便利店主要販售環保袋與植物素材製成嘅密實保鮮袋等可持續性產品，並於Coffee Stand提供軟雪糕、咖啡、玉桂卷等輕食。
2樓「瑞典café」則更有由瑞典傳統麵餅配上多款餡料而成嘅新款小食「TUNNBRÖD」，對IKEA小食情有獨鍾嘅朋友，唔知原宿店限定款式又啱唔啱您胃口呢？
變身潮牌！？日本IKEA獨家產品
唔只賣家品，IKEA今次仲會殺入時裝界、推出一系列印有IKEA官方logo嘅服飾「EFTERTRÄDA」！
作為品牌歷史上首個時裝精品系列，「EFTERTRÄDA」標榜設計靈感取自東京文化，將東京年青活力融入簡約設計，推出T恤、連帽衛衣、毛巾、雨遮等共10款產品。例如T恤與連帽衛衣就採用100%再生棉，正面印有barcode條碼設計、背面則係IKEA品牌標誌；而其他精品例如水樽、縮骨遮亦同樣印上IKEA品牌標誌，相當搶眼！
※服飾系列已於2020年7月31日率先於IKEA原宿開售、並於2020年8月7日起於日本全國IKEA分店及官方網站上架（販售產品因店舖而異）。
另一獨家系列，仲有來自瑞典嘅手工啤酒「Omnipollo」（0.3%酒精度數），全日本只得IKEA買得到㗎！
2020年冬天、IKEA降臨澀谷！
無論您係鍾意IKEA嘅家品定美食，原宿店都保證可以次滿足您多個願望！而且興奮消息一浪接一浪，品牌再宣佈繼原宿店後2020年年底將會進駐澀谷！澀谷店將會樓高７層、距離JR澀谷站僅5分鐘步程，唔知新店舖又會為各位帶嚟點樣嘅全新生活提案呢？就等我哋一齊拭目以待啦！
IKEA原宿
- 開幕日期：2020年6月8日
- 地址：東京都澀谷區神宮前1-14-30 WITH HARAJUKU內
- 營業時間：10:00～21:00
※另設WITH HARAJUKU年度全館閉館日 - 交通：JR原宿站徒步約1分鐘、或東京Metro明治神宮前站徒步1分鐘
Comments