池袋唔單只係一個人潮熙來攘往、車水馬龍嘅繁華地方，仲係一個匯聚咗唔少人氣景點嘅觀光重鎮。各位去到池袋時，可能大部分時間都係購物行街或者去café飲嘢，但今次我哋就要為大家介紹池袋內東京最引以為傲嘅複合藝術文化設施之一「東京藝術劇場」，自問鍾意藝術文化嘅您絕對不容錯過！
「東京藝術劇場」係一個點樣嘅地方？
「東京藝術劇場」於1990年落成，係一座主要由音樂表演廳與3座劇場組成，並輔設展示藝廊、會議室、綵排室等完善配套嘅複合型藝術文化設施。建築物採用玻璃外牆設計，當您走進內裡後會發現館內挑空空間一路延伸到玻璃天花板、視野極之開揚，整體有如一座巨型藝術展品！
一場嚟到，鑑賞藝術作品當然不在話下，遊客仲可以即場到劇場內餐廳及café享受各款美食，而且地下1樓更係直接與池袋站相連，就算落雨都使驚會影響到行程，地理位置非常方便。
擁有全球最大型管風琴嘅「東京藝術劇場」音樂表演廳
提到「東京藝術劇場」，當然就不得不提獲選為「音響家評選100大優質音樂廳」之一、擁有全球最大型管風琴嘅音樂表演廳。作為劇場內一大重點必睇之處，音樂表演廳設有多達1,999個觀眾席，而且管風琴可以180度旋轉，由正反兩面2座管風琴為觀眾帶來風格截然不同嘅音樂風格。除此之外，舞台兩端亦設有觀眾席，令觀眾可以更近距離欣賞到台上表演者嘅風采。
最頂層休憩空間內嘅一面牆壁採用玻璃窗設計，天氣良好時遊客可以喺呢到環顧整個池袋街景。池袋無可否認係一個購物或散步勝地，但有機會的話，不妨都可以考慮下到「東京藝術劇場」感受一個截然不同嘅池袋之旅體驗，體驗瀰漫著藝術氣息嘅文青空間！
「東京藝術劇場」館内處處都係藝術氣息！
「東京藝術劇場」由地下2樓至地上9樓組成。喺7至9樓音樂表演廳以外嘅樓層內，您仲可以搵到郵局、藝術劇場紀念品店及餐廳等體驗藝術以外嘅設施。位於5樓嘅展示藝廊以及地下1樓嘅展示室，仲會舉辦畫展等各式展覽𠻹！
另一希望大家多多留意嘅重點，就有擺放於音樂表演廳入口前嘅天花板畫「天・地・人」。畫作繽紛顏色令人目不瑕給，仔細觀賞的話，您更會發現東京藝術劇場以及東京鐵塔都係畫作題材嘅一部分喔！
東京藝術劇場館內處處洋溢著藝術氣息，例如係遍佈各處嘅彫刻、又或隱藏於休憩地方嘅藝術蹤影。唔知您又有無興趣一邊沉醉於文青氛圍內享受慢活時光、一邊同旅伴大談展覽或音樂表演觀後感，過返一個優雅嘅池袋一日遊呢？
景點資訊
- 名稱：東京藝術劇場
- 地址：東京都豐島區西池袋1-8-1
- 休館日：年末年始・設備維修日
- 交通：池袋站徒步約2分鐘
- 開放時間：9:00～22:00
Comments