相信去過日本旅行嘅讀者，都會發現日本嘅「拖鞋 / 涼鞋」（slipper / sandal）用法同香港非常唔同。
您有興趣知道更多有關日本人著「拖鞋 / 涼鞋」嘅習慣同文化禮儀嗎？本文即將為您介紹同日本人日常生活不可分離、拖鞋與涼鞋嘅使用方法！
香港天氣一年四季都潮濕又悶熱，所以唔少人都會直接「踢拖」出街，又或直接著住出街拖鞋喺屋企內走動。
但換轉喺日本，您就好少會見到日本人著住拖鞋出街，而且當日本人外出後返到屋企後，普遍都會即刻除低「出街鞋」，換上室內用拖鞋先入屋。
有關日式拖鞋
相傳日式拖鞋最早誕生於江戶時代末期、明治時代初期。除著鎖國時代結束、更多外國人到訪日本，但當時嘅日本國內根本無西式酒店，所以外國人就需要留宿於「旅篭」（舊式旅館）或神社等地。但由於外國人無「先除鞋再入屋」嘅文化、唔少人直接著住鞋就踩入屋。有見社會上出現連番文化衝突，因此就有人研發出專為外國人而設嘅拖鞋喇！
日式拖鞋使用方法
基本上，日本拖鞋係專為建築物室內而設，並非用於室外用途。最近，有唔少店舖都有推出融入季節或潮流元素嘅機能性拖鞋𠻹。
接落嚟，我哋就會為大家介紹日本人使用拖鞋嘅時機以及場合。
自己屋企
正如前文所述，拖鞋係日本社會一種主要用於屋企等室內地方嘅日常用品。拖鞋一般會被放於屋企入口處或露台出入口，日本人返到屋企時都會先喺入口除鞋並換上拖鞋。除此之外，唔少家庭都會備有專為訪客而設嘅拖鞋，所以有機會探訪日藉家庭的話，就要記得唔好直接著鞋踩入屋喇！
當您到訪日本人屋企時，請您先換上由屋主為您預備嘅室內拖鞋再入屋；無提供拖鞋的話，就請您著襪、或逼不得已情況下只好赤腳入屋。
學校
當小朋友升上幼稚園後，校方一般都會要求屋企人為學童準備拖鞋以及「上履」（室內鞋），因此日本市面上亦有出售各式各樣專為幼稚園學童而設嘅可愛款式。但當升上小學後，指定款式就會變成白色配其他單種顏色嘅簡約設計；中學的話，學校更會指定校服與鞋嘅顏色，因此單憑學生所穿嘅顏色，好容易就可以分辨出佢屬於幾年級。
一般學生都會將自己嘅室內鞋保存於儲物室（或儲物櫃）內，因此幼稚園・小學・中學學生返到學校之後，會首先到儲物室（或儲物櫃）先換上室內鞋，然後再到課室；落堂後，學生又會先到儲物室（或儲物櫃），換上自己嘅室外鞋後再返屋企。
特別嘅係，日本嘅公立高中一般都唔會要求學生穿上室內鞋。公立高中學生可以穿上自己嘅室外鞋直接走入課室。
除此之外，由於家長會（家長日）、家教會活動、又或其他於學校禮堂舉行嘅活動，亦唔會由學校提供室內拖鞋，所以家長們必須自行攜帶拖鞋參加。「買拖鞋」嘅舉動可謂日本人生活不可或缺嘅一部分！
酒店・旅館・AirBnB
相信各位入住日本酒店時，都會發現拖鞋係其中一種酒店一定會提供嘅日常用品，而且仲要非常精美地用膠袋包好𠻹！當您入住日本嘅旅館時，接待處員工一般會先請您換上酒店用嘅室內拖鞋、並將您所穿嘅鞋保存於儲物櫃，然後先再為您辦理入住check-in手續。普遍情況下，住客需要於旅館内穿上拖鞋移動，但每間酒店或旅館都會有唔同，所以入住時記得遵守酒店規距喇♪
另一方面，由於並非所有AirBnB房東都會為住客準備室內拖鞋，因此唔少遊客入住AirBnB時都會不為意就著住室外鞋踩入室內。下次入住AirBnB時，亦要記得先除鞋再入屋吖♪
*受到新冠肺炎疫情影響，日本對外嘅室內拖鞋訂單需求大增，由此可見其他國家嘅民眾開始注視嘅室內拖鞋重要性，亦越來越多人相信換上室内拖鞋有助減低感染病毒嘅風險。
Comments