去日本旅行時，有無印象啲店門口會掛住個木牌呢？其實係用嚟話你知而家嘅營業狀況。如果寫「營業中」，就即係開緊鋪，歡迎大家入去捧場！但有時門口掛嘅木牌寫上其他字，又唔明白時，都唔知入唔入好呢...... 呢個時候睇呢篇文就啱哂喇，等小編話你知以下9個相關用語，包你唔使成頭問號！
營業中（營餃中）vs. 休業中（休餃中）
最一睇就明嘅就梗係「營業中（えいぎょうちゅう）」啦。睇到「營業中」梗係可以大大方方咁行入去。但如果大家係經過餃子店，可能發現有啲鋪頭門外掛嘅係「營餃中」，有咩分別？其實咁係因為「餃子」嘅「餃」日文讀音係「ぎょう」，讀起嚟就同「營業中」一樣㗎！
而同樣道理仲可以放落「休業中」或「休餃中」，日文讀音都係「きゅうぎょうちゅう」，即係表示而家係休息時間，請客人夜啲或者第二日再嚟。發揮少少創意，唔只可以令顧客停留目光，仲可以順便宣傳一下自己賣嘅嘢呢！
準備中
顧名思義，就係間鋪做緊開鋪嘅準備，仲未開始營業！特別係食肆開鋪之前都有好多準備工夫，例如清潔打掃、準備食材、員工換制服等，就係為咗提供優質嘅服務俾顧客。如果去到時睇到「準備中」嘅牌，就俾啲耐性等多陣啦～
支度中、仕度中
「支度」同「仕度」嘅日文讀音都係「したく」，有「準備」、「預備」嘅意思。兩者喺使用上並無明顯分別，但係日常生活中都幾頻繁出現嘅單字，例如準備旅行要用嘅嘢時，就可以話「旅行の支度をする」，係好實用嘅單字嚟㗎。
商い中
呢個單字就有少少難度喇，「商う(あきなう)」係「買賣」、「經營」嘅意思，睇到「商い中（あきないちゅう）」就即係代表間鋪營業中。而「商い中」同「營業中」嘅意思基本上相同，但「商い中」係大和民族自古以來所使用嘅語彙，帶有古典味道。聽講為咗令顧客更清楚知道係咪開緊檔，近年多咗使用「營業中」嘅鋪頭。
春夏冬中
呢個單字好特別，只有「春夏冬」，咁「秋」呢？「秋」嘅日文讀音為「あき」，而無「秋」呢字，用日文講出嚟就係「あき（が）ない」，後面再加上「中（ちゅう）」嘅話，加埋起嚟就變成「あきないちゅう」＝「商い中」，就即係營業中啦！不過呢個字好少見，如果大家旅行時見過嘅話，歡迎留言話俾我哋知～
以上所介紹嘅旅遊常見日文單字，大家覺得點呀？去日本旅行時，行到邊學到邊都唔錯呢。大家有咩想學咩日文字？歡迎留言話俾我哋知！
Comments