「一直工作到尾班車，為咗公司乜都要做！」係咪成日喺日劇到見到咁樣嘅場面呢？如果去日本公司做嘢係咪都係咁？你希望點樣工作法？想要工作安定有保證，定係希望時間有彈性？世界上其實有好多唔同嘅雇用形式同工作方法。而喺唔同嘅國家，亦會有唔同嘅勞工法規管。所以如果希望去海外工作，記得要好好調查嗰邊嘅工作文化同形式，好好事前理解就可以防止不必要嘅麻煩。今次就等FUN!JAPAN嚟說明日本公司嘅雇用方法，各位睇完可以比較吓同香港有咩分別～
日本公司雇用員工嘅歷史背景
以前嘅日本公司大部份都採用終身雇用嘅制度，即係一成為正式公司員工（正社員），就一世都為呢間公司打工，喺當時被認為係好理所當然嘅事。但隨住泡沬經濟爆破，經濟前景惡化，日本公司為咗節省人事費用嘅開支，所以就開始多咗有合約限期嘅「有期雇用」等合約員工(契約社員)。合約員工因為係非正式員工，所以解雇嘅話所承受嘅風險亦比較低。而隨住日本嘅「勞動者派遣法」嘅修改，經由經紀公司委派至指定公司嘅「派遣對像務業」就變得更加自由，所以以「派遣」方法雇用員工嘅比率亦增加。而家呢啲非正式員工嘅雇用方法已經好常見。
了解各種類雇用方式
雇用方法（日文：雇用形態）係指公司同員工之間嘅合約，有分唔同嘅雇用形式。喺日本，一般嚟講，可以分為正式員工(Permanent) 、合約員工(Contract)同短期委託員工(Agent Temp.)。而除咗咁分法之外，仲可以分為「正式聘用（正規雇用）」同「非正式聘用（非正規雇用）」。
正規社員 (正式員工，Permanent employee)
喺日本謂嘅「正規社員」，通常稱為「正社員」，係指工作合約上無指定期間，工作規則中指定為全職聘用嘅員工。係香港嘅話可以稱為長工。亦指係由該公司直接招聘嘅員工先係該公司嘅「正社員」。
契約社員、嘱託社員 (合約員工，contract employee)
「契約社員/嘱託社員」就係指合約中有指明期間。而工作內容嚟講，係非工式聘用種類入面算係比較有專門工作嘅。而上班時間亦通常係全職，同正社員嘅返工方式差唔多。契約社員同嘱託社員最大嘅分別係，「嘱託社員」通常係指退休之外再以合約形式雇用嘅員工。一般嚟講合約員工無花紅分，而工作亦比較不安定，成日會驚會唔會合約完結或者被解雇等，好多問題。
※根據日本嘅勞動契約法，如果有合約期嘅員工一直更新合約，雇用超過５年嘅話，可以根據員工嘅希望轉成長期雇用（即係雇用期限）。
派遣社員 （委託短期員工，agency temporary employee ）
「派遣社員」係指唔係該公司直接招聘，而係經過叫派遣元企業（派遣会社）嘅agent，同agent簽合約嘅工作方法。所以員工係agent嘅員工，並唔係直接返工嗰間公司嘅員工。而薪金同工作條件、待遇，就因應派遣元企業agent唔同而唔一樣，就算大家都係派遣社員，喺同一間公司做同一樣嘅工作，都會因為agent唔同而待遇唔一樣。
了解雇用形式後，選擇適合自己嘅工作模式
喺日本工作嘅外國人眼中，日本係完全唔同嘅國家。除咗語言唔一樣之外，文化上亦有好多差異。所以如果想喺日本安心工作嘅話，唔單止要了解間公司，亦要知道自己嘅雇用模式嘅特性，把握合約內容同埋知道佢嘅好處壞處好重要。咁樣先可以揀到自己最適合嘅工作嘛！
相關文章
- 【Work & Life in Japan Vol.1】喺日本社會中存在感越嚟越高嘅外國人
- 【Work & Life in Japan Vol.2】好想喺日本住！長期居留日本嘅方法
- 【Work & Life in Japan Vol.3】日本外籍員工越嚟越多 人數變化解說&分析
- 【Work & Life in Japan Vol.4】YOU！點解對日本有興趣？
- 【Work & Life in Japan Vol.5】於日本工作所需嘅「居留資格」全種類解說！
更多相關日語資料
FUN! JAPAN網站推出咗「日本語能力試驗對策」嘅練習試題，目前有N1同N2、N3嘅文法、語彙、讀解、聽解…等試題，並且陸續新增中，準備緊日文考試嘅讀者不妨去試吓做練習啦～
Comments