「NAMJATOWN」係一座位於池袋Sunshine City（太陽城）內嘅完全室內型主題樂園。豐富機動遊戲不在話下，就算係旅行時遇上落雨嘅日子，只要嚟到NAMJATOWN就無需擔心掃興，可謂池袋觀光必到觀光景點之一！事不宜遲，即刻為大家介紹同家人或朋友一齊玩轉NAMJATOWN嘅攻略啦！
「NAMJATOWN」簡介
NAMJATOWN係一座由BANDAI NAMCO Amusement Inc.股份有限公司營運嘅東京代表性主題樂園之一。位處池袋Sunshine City（太陽城）2樓嘅設施主要由3個主題區構成，例如係瀰漫陽光西洋風嘅「Dokkingham廣場」、重現昭和30年代懷舊美好日本年代嘅「福袋七丁目商店街」等，各主題區氛圍截然不同；而各區內又有合共11種機動遊戲（期間限定款式除外），當中更包括聯同人氣動漫作品嘅crossover期間限定遊戲，各位日本動漫粉絲不容錯過！
NAMJATOWN必睇之處
仿如童話繪本世界！Dokkingham廣場
入場後，您首先會嚟到放有巨型橡膠樹嘅「Dokkingham廣場」。區內重現出西洋風格小鎮風貌，裝潢鮮艷顏色走跳脫繽紛路線，令人感覺有如走入童話繪本世界！
而Dokkingham廣場內必玩嘅，就有「妖怪獵人（Mononoke Hunters）」！參加遊戲成為「獵人」一員，您就可以喺利用AR技術到場內check point遇上超過90種「Mononoke」（日本古書所指嘅幽靈・妖怪）並即時將佢哋一一收服！參加者可以聯同屋企人或朋友一齊做「妖怪獵人」，所以亦係一款非常受歡迎嘅遊戲嚟㗎！
昭和日本重臨現代！福袋七丁目商店街
「福袋七丁目商店街」係一處可以體感昭和30年代昔日日本風情嘅主題區。當您踏入商店街，您就會發現自己正身處燈籠、招財貓等佈滿場景細節嘅懷舊老街當中！
商店街内提供多款料理美食，例如「NAMJA餃子競技場」就匯聚共嚟自全國各地嘅11間地道餃子專門店。玩到肚餓時，不妨到競技場手執啤酒、一邊品嚐地道特色餃子，又或轉移陣地到「福袋甜品橫丁」品嚐各式精美裝飾嘅獨家甜品吖！Pancake、芭菲、crepe（可麗餅）等等全部都非常精緻可愛，最適合Instagram打卡影相！
日本妖怪列隊歡迎！Mononoke番外地
「Mononoke番外地」顧名思義，就係被「Mononoke妖怪」佔俱嘅主題區！雖然場景類似鬼屋帶有少少恐怖氣氛，但小朋友都一樣可以放心享受內裡嘅遊樂設施㗎！一家大細可以齊齊化身為「妖怪探險隊」一員、解答街上妖怪嘅問題，又或參加擊退喪屍嘅模擬體驗「Zombie Breaker」，只要拎出少少勇氣遊覽街區，保證您一定會有開心大發現！
前往NAMJATOWN嘅交通方式
抵達各大鐵路路線嘅池袋站後，首先請去到Sunshine City 2樓。門票歡迎入場人士當日無限次進出主題樂園，非常方便各位自由編排行程！而且，園內亦設有今後重遊舊地時、可以重啟上次到訪時嘅遊戲結果嘅紀錄系統，為大家下次遊日之旅再添樂趣！園區內仲有更多有趣遊戲等待大家發掘，約定大家NAMJATOWN見～
景點資訊
- 名稱：NAMJATOWN
- 地址：東京都豐島區東池袋3-1-3 Sunshine City World Import Mart大樓2F
- 交通：
- 池袋站徒步約8分鐘
- 東池袋站徒歩約3分鐘
- 營業時間：
- 早上10時至晚上10時
- ※最終入場時間為關門前1小時
- ※詳細營業時間請參閱NAMJATOWN官方網站
- 定休日：年中無休
- 對應語言：英文
- 入場費：
- 成人（13歲或以上）：3,500 日圓
- 小童（4至12歲）：2,800 日圓
- ※以上為「NAMJA Passport」（包含NAMJATOWN入場券及機動遊戲放題票券）票價
Comments