大家鍾唔鍾意漫天星空呢？喺香港呢啲石屎森林，都幾難睇到靚星星，但喺東京池袋就有一個地方可以睇到喇！呢個地方就係池袋嘅Konica Minolta天象廳「滿天」。可以一邊聽住音樂，一邊觀賞像真度十足嘅星空。不如就試吓去呢個非日常嘅空間體驗一下啦。
Konica Minolta天象廳「滿天」即係？
Konica Minolta天象廳「滿天」位於東京池袋，全天候拱型螢幕播出CG映像，加上音樂、香氣的配合，讓觀眾能夠觀賞具有臨場感嘅高空景色。
Konica Minolta天象廳「滿天」的設施介紹
「滿天」係一個無梯級、呈水平圓拱形嘅天象廳。拱型天象廳內除咗有一般嘅座椅，仲有可以畀人平躺嘅「草地座席」，同軟綿綿全白嘅「白雲座席」，都係可以完全瞓喺上面欣賞映像嘅特別座位。另外，仲有影相打卡專用嘅「MITENE」景點，等你可以影靚相上載到社交媒體。另外仲有間「滿天商店」販賣星空相關嘅獨家商品，就算未夠鐘等緊入場都唔怕悶啦！
主要作品種類
天象廳除咗提供一般星象作品供人觀賞外，其他仲有以治癒為主題或同歌手合作嘅作品等，而過去亦曾有同寵物小精靈、多啦A夢等卡通作為主題嘅作品，大人細路都可以樂在其中。另外，呢個疫情期間，Konica Minolta更特別地上載咗360度VR動畫上官方YouTube Channel添。大家嚟日本之前，都可以上網先睹為快。
Konica Minolta天象廳「滿天」有乜特色？
欣賞唯妙唯肖的星空景色
透過原創作品，可以欣賞到世界各地唔同嘅星空同大自然風景，甚至會帶你衝出地球，探索充滿神秘嘅宇宙去睇有關星座、神話嘅映像添！
將星空搬入天文館的壯觀演出
滿天」星象廳以水平圓拱形狀重現臨場星星嘅位置，而且採用最新光學式投影機，將一幕幕既像真又有壓迫感嘅映像呈現到觀眾眼前，與其話觀賞星空，不如話好似跳入滿天星星嘅世界咁真實呢！
放鬆身心的獨特體驗
同歌手合作嘅作品之中，就有配合作品映像內容而播放出例如CHEMISTRY、Every Little Thing、東方神起等著名歌手嘅樂曲，舒情歌嘅旋律配上富含感情嘅美妙歌聲，更令人投入其中。例如，現正上映中嘅治癒星象作品《NIGHT RAINBOW ～夏威夷星空的療癒～》當中，伴隨沙石流水聲等大自然聲音，仲會洋溢著甜美花香，讓觀眾從視覺、聽覺、嗅覺各方面得到放鬆。加上整個人瞓喺平躺座席，可以好舒適自然咁向上直望就睇到全景啦！
※文中提及嘅歌手合作作品、治癒作品、配合香氣作品皆為其中一部份例子。星象廳每隔一段時間更換作品，詳情請先上官方網頁查詢。
景點資源
- 名稱：Konica Minolta天象廳「滿天」in Sunshine City（コニカミノルタプラネタリウム“満天”in Sunshine City）
- 地址：東京都豐島區東池袋3-1-3 Sunshine City World Import Mart Building 頂樓
- 交通方式：
- JR池袋站東口步行20分鐘
- 東京Metro有樂町線東池袋站步行10分鐘
- 播映時間：約40～45分鐘
- 星象作品（プラネタリウム作品）：1,500～3,800日圓
- 治癒作品（ヒーリングプラネタリウム作品）：1,700～4,200日圓
- 營業時間：11:00至20:00
- 語言：部份作品提供免費英文語音服務
Comments