「Pokémon」可以話係最能夠代表日本嘅著名動漫作品之一，其中登場角色如「比卡超」既得意又受歡迎，但您又有無幻想過，當存在喺遊戲當中嘅設施「Pokémon Center」如果搬到現實世界裡，會係點嘅樣呢？各位精靈訓練師，位於東京池袋嘅「Pokémon Center MEGA TOKYO 精靈寶可夢中心」就係熱愛小精靈嘅您千萬不容錯過嘅必到景點！
Pokémon Center Mega Tokyo 精靈寶可夢中心簡介
日本全國各地遍佈多間Pokémon Center分店，但其中以位於東京池袋嘅「Pokémon Center MEGA TOKYO 精靈寶可夢中心」鋪面面積最廣闊，而且剛於2020年6月完成全面裝修後全新開幕，係一間現時日本最大規模嘅Pokémon Center！遊客喺店內唔單只可以買到各式各樣嘅Pokémon官方商品，店內亦會不定期舉辦遊戲相關活動，為各路「訓練員」同好提供交流場地。此外，連接店內各區域嘅廣場與走廊都精心設計佈置成專屬於小精靈嘅世界觀，正因為池袋店佔地廣闊，先有機會展現出大型店舖獨有特色！
Pokémon Center MEGA TOKYO必睇重點
被大堆Pokémon周邊商品包圍，超幸福！
無論您鍾意嘅係最著名嘅超人氣角色「比卡超」定係其他精靈角色都好，只要嚟到全場擺滿Pokémon周邊商品嘅Pokémon Center MEGA TOKYO，都一定可以搵到您想要嘅商品！商品種類由得意造型玩偶、迷你公仔、碗碟餐具、手機吊飾、文具、生活用品到日用雜貨等等都應有盡有，粉絲們嚟到店內，相信淨係睇到大堆商品放喺眼前貨架已經超級興奮！再加上適合買作手信用嘅零食餅乾及朱古力等商品，下次嚟到東京旅遊時，您都一定有理由要朝聖～
於Pokémon Center內與同好交流對戰！
然後要介紹嘅，係全世界首創嘅『Pokémon GO』官方特設中心。店內空間設計由曾打造出多項著名媒體藝術嘅Rhizomatiks團隊操刀，並精緻重現出『Pokémon GO』遊戲世界內嘅「道場」，場內更有真人大小嘅維羅博士、靈犀隊隊長史帕克、叡智隊隊長布蘭雪、武勇隊隊長坎迪拉聚首一堂！您可以喺「Pokémon GO Lab.」內買到『Pokémon GO』原創周邊商品、並認識同好又或與其他訓練家對戰，各式各樣樂趣等著您嚟體驗！
可愛到唔捨得食！比卡超甜品專賣店（Pikachu Sweets）
Pokémon Center Mega Tokyo精靈寶可夢中心旁邊設有專門提供甜品外賣嘅「Pikachu Sweets 比卡超甜品專賣店」。粉嫩可愛嘅舖面外觀相當吸睛，而內裡提供嘅甜品就包括有比卡超造型杯裝蛋糕、印有Pokémon插圖嘅年輪蛋糕，以及用精靈球圖案紙杯提供嘅拿鐵咖啡等，食物飲品選擇同樣豐富！
前往Pokémon Center MEGA TOKYO嘅交通方式
乘搭各路線電車抵達池袋站之後，首先請前往Sunshine City陽光城2樓。Pokémon Center Mega Tokyo店內會隨著季節會更換商品設計與擺設，店內空間亦會不定期舉辦期間限定活動等，無論去幾多次都不愁無驚喜！此外，喺生日月份造訪的話，您更可以獲得生日卡片或生日優惠券等特典，對粉絲而言實在係驚喜萬分嘅貼心小禮物呢！
景點資訊
- 名稱：精靈寶可夢中心 Pokémon Center Mega Tokyo
- 地址：東京都豐島區東池袋3-1-2 Sunshine City陽光城 專門店街alpa 2F
- 交通方式：池袋站徒步約8分鐘，或東池袋站徒步約3分鐘
- 營業時間：10:00～20:00 ※以Sunshine City陽光城 專門店街alpa營業時間為準
- 定休日：年中無休
©2020 Pokémon. ©1995-2020 Nintendo/Creatures Inc./GAME FREAK inc.
ポケットモンスター, ポケモン and Pokémon are trademark of Nintendo, Creatures Inc. and Game Freak inc.
©2020 Niantic, Inc.
Comments