日本嘅國土入面，有6至7成都係山地，加上日本四面環海，所以由遠古開始，日本人就對山同海抱有敬畏之心，喺生活之中一直感謝自然帶嚟嘅恩惠。而喺2016年8月11日，「山之日」就誕生，喺日本嘅第16個公眾假期。點解會制定「山之日」？呢日有咩特別意義？等我地喺呢篇到為大家介紹啦！
「山之日」嘅由来，變成假期嘅原因係？
日本係山組成嘅國家，由遠古開始日本人就對山抱有敬畏之心，感謝森林嘅恩惠，同自然一齊生活過嚟。「山之日」嘅誕生，其實係包含咗「有親近山岳嘅機會，感謝山林帶嚟嘅恩惠」嘅意思。而呢個「山之日」，係日本係屬於比較新近嘅假期。
點解「山之日」會喺8月11日呢？
最初「山之日」有提議放喺無公眾假期嘅6月，亦有提議話放喺「海之日」（即7月第3個星期一）嘅翌日，但最後揀咗8月盆節（盂蘭節），可以易啲拎假嘅8月11日。因為「山之日」嘅定立，令到原本無假期嘅8月都有假！可能有人想話8月唔係有「盂蘭盆節休假（お盆休み）」嗎？但其實「盆休」唔係指定公眾假期，而係根據業界職業，有啲公司有得休，有啲公司無得休嘅假期。
亦有人話因為「8」嘅漢字「八」望上去好似山嘅形象，而「11」就好似樹木林立咁，令人可以聯想到「山」喎。
「山之日」應節 親近山岳大自然！
以2013年登錄成為世界文化遺産嘅富士山為首，日本有好多「山」嘅重要資源。「山之日」就係去日本各地親親山岳嘅機會，喺唔同地方都會舉辦活動，例如觀光團、嘉年華等活動，令大家可以親近大自然。愛好登山等Outdoor活動嘅朋友，如果喺呢段期間去日本旅行，就要早啲收集情報喇！
2020年限定 改做8月10日
由於2020年舉行「東京奧運」，原本喺8月11日（二）嘅山之日，移咗去奧運會嘅閉幕式翌日嘅8月10日（一）。雖然而家奧運延期，但嗰2020年8月10日都仲係假期無改。至於2021年嘅「山之日」喺幾時呢？相信會移去奧運閉幕式翌日嘅機會都好高！
咁都可以抽水？竟然有「草菇山之日（きのこの山の日） 」！
有超過40年歷史嘅明治朱古力「きのこの山（草菇山）」喺日本國內定海外都非常人氣。而因為「草菇山」都係「山」，所以就趁「山之日」嘅成立，明治都順便向日本記念日協會申請咗「きのこの山の日（草菇山之日）」，有認受性㗎！
總結
８月日本有學校暑假，而有啲公司亦有盆休，所以可以預計旅遊點會好多人。如果諗住呢段時期去日本旅行嘅話，就要事先查清楚景點狀況，同埋訂好新幹線同酒店喇！
對日本嘅各個紀念日或者假期有興趣嘅朋友，可以睇埋下面嘅文章啊～
Comments