作為東京之旅定番觀光景點，相信唔少讀者都曾經有去過東京鐵塔吧？您可能有試過搭𨋢登頂，但「爬樓梯」登頂您又有無試過呢？FUN! JAPAN編輯部辦公室窗外就係大大個東京鐵塔，一邊望著東京鐵塔一邊寫稿可謂一眾小編們嘅日常，但講到熟悉鐵塔內部嘅人就無幾個，因此我哋今次決定為各位STAY HOME嘅讀者籌備今次企劃，用樓梯（與電梯）攀上東京鐵塔展望台！當然，最後亦唔少得東京鐵塔必買嘅手信介紹啦！
事不宜遲，即刻出發啦！
東京鐵塔嘅「上升樓梯」由鐵塔下方嘅「FOOT TOWN」屋頂一直通往高150米嘅主要展望台（一般於星期六・日及公眾假期11:00～16:00開放）。到1樓售票處買好展望台入場票後，再去「FOOT TOWN」屋頂就可以立即出發！
600級樓梯聽上去好似幾辛苦，但其實大概幼稚園程度嘅小朋友都只需要15分鐘就可以爬得完。究竟20歲出頭嘅FUN! JAPAN成年人小編又能唔能夠成功登頂呢！？
窺探樓梯「內部」！（0級〜約300級）
喺攀登東京鐵塔嘅途中，一路都會有寫有樓梯級數嘅指示，以及由公式吉祥物出題嘅東京鐵塔小知識問答等趣味細節。一邊數住爬咗幾多級樓梯，展望台嘅路程亦更覺實在！
而爬樓梯過程嘅最大睇頭，就係從鐵塔正下方仰望上空嘅景色。有別於平常嘅水平或高空視角，由下而上望到嘅交錯鋼骨可謂震撼程度滿分！
眺望樓梯「外部」！（約300級〜約500級）
嚟到約300級樓梯以上，就代表「樓梯之旅」迎來中段，外頭可以望到嘅景色亦漸漸延伸至更遠處。景觀隨樓梯級數而異，可謂畀心機行樓梯嘅遊客先可以欣賞得到嘅獎勵！
被東京鐵塔象徵顏色「國際橙色（International Orange）」包圍上欣賞景色嘅感覺，就好比喺城市中央登山一樣。閒時換個方向，您仲可以見到增上寺、台場彩虹大橋等著名地標𠻹！
話咁快就到終點！認住呢到影相打卡啦！（約500級〜）
一路上既要掛住影相post上Instagram打卡，又要忙住從高空俯瞰東京街景，所以最後比預期用咗更多時間先成功到頂（笑）。樓梯終點放有巨型展板畀大家影相留念，要把握最後打卡機會就咪錯過喇！
成功走畢全程嘅遊客，仲可以喺終點獲工作人員免費派發「樓梯認證」！卡面圖案一共有10款，要全部收集成功的話，就只有行多幾次樓梯…有讀者成功收集全部款式的話，不妨話畀小編知喎！
最後嚟到「主要展望台」，東京街景真係叫人百看不厭呢！順帶一提，從樓梯入口到展望台大約會消耗90卡路里。
「爬樓梯」以外，東京鐵塔亦歡迎大家挑戰每日開放、同樣為600級嘅「落樓梯」（全程約8分鐘）。「爬樓梯上、搭𨋢落」「搭𨋢上、行樓梯落」任君選擇，保證一定可以為您締造難忘旅行回憶！！
（問題答案：2個）
東京鐵塔手信介紹可以睇呢邊↓
100%東京限定！東京鐵塔手信BEST 3推介
設施介紹
- 名稱：東京鐵塔 上升樓梯
- 開放日子：星期六、日及公眾假期祝日（雨天・強風中止）
- 開放時間：11:00～16:00
- 「主要展望台」入場費：大人1,200日圓、高中生1,000日圓、小童（中・小學生）700日圓、幼童（4歲以上）500日圓
- ※樓梯中途不可轉乘升降機
Comments