池袋係東京內一個充滿餐廳、購物商場、戲院等各式遊客觀光景點與購物勝地嘅熱鬧地方，但您又知唔知原來繁囂市區內，原來竟然隱藏著一座水族館呢？本文，就要為大家介紹擁有「天空綠洲」別稱、「Sunshine水族館」嘅特色！
Sunshine水族館簡介
「Sunshine水族館」係日本國內首座都市高樓型水族館，位處於池袋代表性複合商業設施「Sunshine City 太陽城」內嘅World Import Mart大樓頂層天台。水族館於1978年開館，位處離地40米高嘅設施以「天空綠洲」為概念，並由「天空之旅」、「水濱之旅」與「海洋之旅」3個常設展覽向入場觀眾重現出各式生物及水域。遊客於各展區內除咗可以一站式觀察到世界各地河川、湖泊、海岸嘅生物生態，綠意盎然嘅室外自然環境亦係水族館一大特色！
Sunshine水族館必睇重點推介
企鵝、海獅等可愛生物聚首一堂！
嚟到Sunshine水族館，您一整年都可以見到各種來自大海嘅人氣生物！水獺、企鵝、海獅、水母、海豹等人氣海洋生物於各常設展區內濟濟一堂，例如「陽光岩礁水槽」靈感，就取自南國淺海嘅白色細砂海底，魔鬼魚與魚群於透進絲絲嘅光線嘅水槽內悠然遨遊，場景極度夢幻！
另一方面，企鵝們於闊約12米嘅水槽內以高樓大廈為背景、仿如喺大城市半空暢「游」嘅「天空企鵝」亦係場內一大必睇位。同場仲有喺「陽光60大樓」前游水嘅海獅、享受日光浴嘅白鵜鶘等，令人忍唔住大叫「kawaii！」嘅大批可愛動物等住您嚟探訪！
值得您特登抽時間欣賞嘅特別展覽與動物表演
欣賞完海洋生物特色展覽後，記得亦唔好錯過館內動物嘅活動表演項目。水族館會定時定候舉辦「企鵝潛水秀」、「水獺嬉戲時間．水獺親密接觸」等活動，想近距離欣賞心水動物嘅心態或表演，就要mark實官方網站公佈嘅時間表喇！
※為防止新型冠狀病毒疫情擴大，現時所有表演項目皆已中止。（資訊截至2020年7月1日）
水族館亦會舉行期間限定特別展覽，例如曾經舉辦過嘅「猛毒展（以有毒生物為主題）」、「奇異生物展（以擬態、或隨成長改變顏色或花紋等「變化」生物為主題）」，包保您每次到場都有新發現！（資訊截至2020年6月）
前往Sunshine水族館嘅交通方式
Sunshine水族館距離各鐵路池袋站35號出口僅10分鐘步程，因此係池袋觀光嘅人氣景點之一！館內設有咖啡店，行到攰時不妨可以坐低、嘆返份Sunshine水族館獨家menu吖！而「店舖 aqua pocket」內，則有出售企鵝、水獺等人氣動物嘅原創精品，為遊客提供最佳手信選擇。水族館豐富特色可謂玩足全日都唔厭，下次去池袋時記住唔好錯過喇！
景點資訊
- 名稱：Sunshine水族館
- 地址：東京都豐島區東池袋3-1
- 交通：池袋站徒步約10分鐘、或東池袋站徒步約5分鐘
- 營業時間：09：30～21：00（春夏）、10：00～18：00（秋冬）※閉館前1小時截止入場
- 定休日：年中無休
- 對應語言：中文、英文、韓文
- 入場費：成人（高中生以上）2,200日圓、中小學生1,200日圓、4歲以上幼兒700日圓
※由2020年7月9日起成人票價改為2,400日圓
※由2020年7月9日起至現時為止，遊客必須先預約入場票方可進場。詳情請參閱官方網站
Comments