難得一場去到東京，各位遊客當然都想欣賞聞名全球嘅東京街景吧！如果您都係其中一分子，咁「SKY CIRCUS 陽光60瞭望台」就係您嘅首選目的地！有別於一般瞭望台，「SKY CIRCUS 陽光60瞭望台」將東京城市街景與多元化科技完美融合，保證可以為您提供「飛一般」眺望體験！只要嚟過一次，話唔定您會對「瞭望台」概念有全新理解…！？
SKY CIRCUS 陽光60瞭望台簡介
經歷翻新工程後，位處離地251米上空嘅「SKY CIRCUS 陽光60瞭望台」於2016年4月重新開幕。顧思名義，位處陽光60大樓60樓嘅設施以「SKY CIRCUS馬戲團」為理念，並由共7大體驗展區構成充滿娛樂要素嘅瞭望台。登上瞭望台，遊客唔只可以眺望東京街景，更可以體驗場內多款引入最新科技嘅體驗型項目，因此設施亦係東京內其一可以透過五官盡情感受東京上空嘅著名觀光勝地。
SKY CIRCUS 陽光60瞭望台必睇特色
昼夜各異城市景觀
嚟到SKY CIRCUS 陽光60瞭望台不得不提嘅，就係從瞭望台上放眼遠望嘅東京街景！位處60樓嘅瞭望台視線完全無遮擋，方便各位透過玻璃窗將東京景色一網打盡。中午時份您可以眺望到新宿高樓大廈、東京晴空塔（東京Sky Tree）等東京觀光名勝嘅360度環迴景觀，而遇上天氣良好嘅日子，可以睇到遠至富士山亦「完全不是夢」！入夜後，瞭望台則會被大城市萬家燈火包圍，化身成浪漫空間。
想要影「打卡相」嘅朋友，編輯部推薦你到「SUNLIGHT CIRCUS」。由全像底片製作而成嘅藝術作品就如紙飛機般沿著玻璃窗變形前進、隨手都可以影出極具藝術美感嘅靚相！
超驚險體驗型設施任君選擇！
登上瞭望台除咗東京景色必睇，仲有VR體驗必玩！戴上VR眼鏡，立即出發體驗瞭望台獨家嘅5種VR體驗項目（截至2020年6月）啦！
VR名單包括虛擬旅遊「TOKYO BULLET FLIGHT」—乘搭人體大砲型設備，「轟隆」一聲您就會發現自己已經飛出瞭望台、暢遊未來東京觀光名勝；「SWING COASTER」—坐上韆鞦型過山車於池袋上空疾走滑翔；「超級逆向高級彈跳」—從巨型鐵塔急速下降再上升嘅VR笨豬跳等，充分利用高達海拔251米地理位置嘅多種尖叫機動遊戲，一一等著您嚟挑戰！
單睇圖片可能難以想像VR內容，但事實上每個體驗項目內嘅虛擬世界都充滿刺激性與速度感，相當值得各位一試㗎！
※為防止新型冠狀病毒疫情擴大，部分體驗項目現時正停止服務。（資訊截至2020年7月1日）
打卡靚位最啱同朋友開心share！
另一邊廂，就算唔擅長玩刺激機動遊戲嘅遊客，都一樣可以有多種享受樂趣方法。例如係牆壁四面放有鏡子、場景佈置有如萬華筒嘅光影隧道「無限旺的景觀」內，就會上映仿照日本四季嘅映像及幾何圖案，令在場每一位都忍唔住要高舉相機影低呢個不思議世界！此外，「SKY PARTY」則會透過感測器測出人體動作及位置並即時製作出雨雲、雷電或龍卷風等映像效果，您都一齊拉埋朋友一齊喺螢幕前感受CG嘅好玩之處啦！
前往SKY CIRCUS 陽光60瞭望台嘅交通方式
要前往SKY CIRCUS 陽光60瞭望台嘅遊客，於各鐵路池袋站出站後，請先朝著目標Sunshine City出發。從Sunshine City B1乘搭專用升降機，置身於被星空包圍嘅空間內、以每分鐘最高速度600m上升，眨眼間就會嚟到60樓！無論您係想欣賞景色定體驗刺激機動遊戲，瞭望台都保證您可以玩得盡興！您，準備好感受一趟非一般嘅旅程未先？
景點資訊
- 名稱：SKY CIRCUS 陽光60瞭望台
- 地址：東京都豐島區東池袋3-1 陽光城 陽光60大樓60F
- 交通：池袋站徒步約8分鐘、或東池袋站徒步約3鐘
- 營業時間：10：00～22：00
※關門前1小時截止入場 - 定休日：年中無休
- 對應語言：中文、英文、韓文
- 入場費：成人1,200日圓、學生900日圓、中小學生600日圓、4歲以上幼兒300日圓
※VR體驗內容另外一律收費500日圓
Comments