東北地區一年四季都充滿觀光特色、景點處處，而且從東京等關東地區出發交通非常方便，實在係一大旅遊勝地！而本文，就將會為大家介紹青森、秋田、岩手、宮城、山形、福島與東北6縣藝術・文化・季節！睇完呢篇文章之後，相信您都一定會對東北地區地道特色有更深入了解♪
[Art] 細賞東北藝術・設計
東北地區內遍佈多個與藝術文化有關嘅景點，無論係大人定細路都保證可以睇得盡興！青森縣十和田市現代美術館有如一座藝術小鎮，由內到外展出多款展品；源自東北嘅傳統工藝品「木芥子（こけし／kokeshi）」則係一款深受男女老幼愛戴嘅木造人偶玩具は，近年有唔少遊客都鍾意買嚟收藏𠻹！
[City] 享受東北觀光娛樂
與東京或大阪等大城市相比，東北地區嘅城市較簡約、人口亦較少。遊客可以到山形縣著名代表溫泉區「銀山溫泉」觀光，並佔盡當地環山近海嘅地利、將雪山美景與新鮮海鮮一網打盡！此外，東北地區內亦有如宮城縣仙台瑞鳳殿及被列入為世界遺產嘅寺院等極具歷史價值嘅景點㗎！
[Cuisine] 品嚐東北美食・美酒
東北地區美食由海膽、帆立貝、蠔等海產，到蕎麥麵、桃、葡萄等農作物蔬果都一應俱全。除此之外，東北亦係日本數一數二稻米產地，優質白米因此孕育出豐富日本酒選擇。當然，提到東北地道美食，就更加不得不提全國聞名嘅仙台牛舌以及秋田烤米棒鍋（きりたんぽ鍋）啦！
[Nature] 飽覽東北豐富自然景色
東北坐擁豐富自然景色，河川、瀑布、海岸以及座落於大自然當中嘅溫泉都非常著名，尤其係冬天時由山上樹林積雪形成嘅樹冰景象更係美不勝收！春天櫻花與秋天楓樹等隨季節演變嘅四季林木景色亦不容錯過。
[Outdoor] 全情投入東北戶外活動
嚟到東北地區，遊客可以到河畔櫻花散步，又或參加划舟、激流等各式各樣戶外活動。喜歡靜態活動嘅您，不妨到河邊釣魚、到深山浸泡溫泉，又或到濕地體驗登山樂趣；喜歡動態活動嘅遊客，則一定要記得趁冬天時參加滑雪、單板滑雪等冬季獨有運動！
[Relaxation] 享受東北住宿下榻時光
東北坐擁多處溫泉資源並遍佈於酒店、旅館等住宿設施內。！對都市人而言，單係喺被四季繁花圍繞嘅自然環境下散步，已經係非常難能可貴嘅忙裡偷閒方式。試想像結束一日行程後，一邊欣賞窗外河川雪山景色、一邊於溫泉內放鬆身心，絕對係消除疲勞嘅人生一大享受
[Tradition] 窺探東北傳統文化・歷史建築物
東北內至今仍保留著多座傳統日本家屋、神社及寺院，例如岩手縣內1911年落成嘅岩手銀行本店（現時已結束營業開放予公眾參觀），與山形縣內重建至今歷史超過1200年嘅熊野大社就係極具歷史價值嘅代表性例子。另外值得一提嘅，亦有自200年前就流傳於秋田縣、由民眾打扮成「生剝鬼（なまはげ）」造訪縣內各家各戶嘅傳統習俗。
東北春天
比起東京，東北嘅春天來得更遲、直到每年4月中旬至5月下旬先係最佳賞花時期。著名賞櫻景點包括有由1200棵櫻花組成嘅宮城縣「一目千本櫻」「白石川堤櫻花隧道」，「日本三大櫻花」之一福島県紅枝垂櫻「三春瀧櫻」以及秋田縣櫻花與油菜花之路等。遇上櫻花祭舉行期間的話，請記得唔好錯過夜間點燈活動，將有別於白晝嘅夢幻一面盡收眼底！
東北夏天
當積雪開始融化、綠意抬頭之際，就代表著東北嘅夏天已俏俏降臨。除咗有向日葵、蓮花等夏日花卉盛放之外，東北地區於夏季期間亦會舉行多個祭典，尤其係仙台七夕祭、青森睡魔祭（ねぶた祭り）、秋田竿灯祭以及各地花火大会更係全國知名盛事！
東北秋天
東北地區坐擁連綿山峰，因此造就出多個紅葉景點，由紅、黃、橙等奪目顏色治癒無數遊客心靈。另外，日本當地亦流傳著「食欲之秋」嘅說法，當地秋天盛產多款海産、山珍，保證秋天到訪時可以大飽口福！
東北冬天
提起東北嘅冬天，大家第一時間都係會諗起白雪吧！山上、城市、海岸…整個東北地區都被白雪覆蓋，全國唔少滑雪愛好者因此都會趁冬天專誠嚟到東北朝聖。美食方面，由於普遍日本人都鍾意熱騰騰嘅鍋料理，因此東北嘅冬天亦係唔少日本人嘅至愛！
Comments