日本係一個四面環海嘅國家，自古以來外國文化傳入、人與人嘅交流、貨物運輸、各種產業、生活等，喺各領域都同海洋有深厚密切嘅關係。所以為咗感謝海洋嘅恩惠，同埋祈求海洋之國日本嘅繁榮昌盛，就由1996年起制定咗「海之日」為公眾假期。係呢一日，日本人都會做乜嘢呢？點解「海之日」會定喺7月呢？睇完呢篇文就會解開「謎團」！
關於「海之日」
由字面上來睇，係咪會覺得呢日應該要「去海邊玩」呢？正如前面所講，日本係一個四面環海嘅國家，如果無海洋就無繁榮經濟。1941年時，為左希望大家了解海運對日本嘅重要性，同埋感謝海運業等相關從事人員，所以7月20日就被訂為「海之紀念日」。
點解會將「海之紀念日」訂喺7月20日呢？起源係明治天皇去東北巡視回程嘅途中，乘坐當時先進船隻—明治丸返回橫濱，而日期就係7月20日。不過，對於呢個紀念日，一直以來都有正反兩面嘅意見。
「作為一個海洋國家，希望廣大國民可以理解並關心海洋」，所以喺1995年「海之紀念日」改名為「海之日」，由翌年開始生效。此外，喺2001年6月修正法律後，「海之日」由2003年開始移動至每年7月嘅第3個星期一，加埋上週末，就可以有3連休假期。
7月係海洋月
因為「海之日」形成三連休，亦為咗令「海之日」嘅本來意義唔好消失，並有效善用三連休嘅好處，所以仲將7月制定為「海洋月」，藉此提高日本國民對「海洋」嘅理解同認知。每年7月1日到31日嘅成個月，都包咗喺「海洋節」入面，全日本各地都會舉辦各式各樣同海洋有關嘅活動。當中，仲會特別開放一啲由海上保安廳同地方政府管理，平時入唔到去嘅海邊燈塔，有啲仲可以內進參觀呢！由燈塔望出去嘅海洋同天空，相信會特別靚！
配合東京 2020 「海之日」移動至7月23日
原本喺7月第3個週一嘅「海之日」，亦因為2020年預定嘅「東京奧運」，特別移動至奧運開幕前一日7月23日。呢刻東京奧運已決定延期，不過2020年嘅海之日就繼續喺7月23日。所以，自2003年以來，只有2020年嘅「海之日」唔係7月第3個星期一，而係7月23日星期四。
總結
由於「海之日」係日本嘅公眾假期，再加上週末嘅三連休，各個觀光景點都會擠滿好多放假旅遊人士。將來如果有計畫呢個時期去日本旅遊嘅話，就要先確認觀光景點嘅狀況，交通同酒店都要提早預約啊！
Comments