小豆島、父母濱、金刀比羅宮…熱爆IG打卡景點一籮籮，難怪日本四國地區近年成為大熱旅遊目的地！2020年最新開幕嘅景點，就有號稱「四國最大型水族館」嘅「四國水族館 SHIKOKU AQUARIUM」，加上最具地道特色嘅一眾海底奇兵，睇完下面介紹，相信您都會將水族館編入您下次四國行程當中！
漩渦下嘅水底世界！？一站式探索四國海洋生態
位處香川縣宇多津臨海公園內嘅「四國水族館」於2020年3月正式開幕，景點鄰近瀨戶大橋，從高松機場或JR高松站出發亦只需約45鐘，地理位置先拔頭籌！館內共69座水槽內展出約400種、14,000隻四國及周邊海域棲息嘅海洋生物，總使用水量達2,233立方米，標榜最原汁原味嘅四國限定「四國水景」海洋世界。
「四國水景」顧名思義，即集合四國自然、歷史、文化嘅水底生態。頭號必睇嘅水槽，先有「神無月之景」（註：「神無月」為日本舊曆10月之別稱），遊客將會身處直徑達4米圓拱型穹頂下，如同從海底仰望頭上嘅路氏雙髻鯊（鎚頭鯊），感覺極新鮮！
另一方面，「渦潮之景」則融合鳴門海峽中心激流與海峽兩岸緩慢水流，將德島縣名物之一「鳴門漩渦」重現於室內空間。從海上觀察漩渦或者大家有試過，以水底角度欣賞「世界三大潮流」下嘅海洋動物生態，你又有無興趣試試呢？
非一般水族館體驗！聲色俱全「龍宮之景」
香川縣三豐市當地流著浦島太郎「龍宮傳說」，因此水族館亦特設「龍宮之景」，將民間故事中登場嘅海月姬神、海龜等元素融入摩登展覽。
「龍宮之景」可主要分為3大部分。第一部分先有佛畫畫家松久佳遊小姐嘅佛畫導覽，第二部分為出自書法家柏木白光小姐手筆嘅壁畫迴廊，而最後重頭戲「龍宮殿」內則有陣陣芳香瀰漫場內，配以剪影畫家酒井敦美小姐嘅魚類剪影畫同時滿足「色、香、聲」入場人士3重享受。最特別嘅係，「龍宮之景」係唯一不設水槽嘅展覽室，一切全由多位日本藝術大師光影藝術交織而成，保證可以顛覆你對傳統水槽展覽嘅先入為主觀念！
瀨戶內海夕陽無限好
作為四國最大型水族館，當然值得你玩足一日！參觀完一輪室內展覽，最後梗唔少得睇埋人氣節目海豚表演先走，「海豚泳池」榮獲180度瀨戶內海海景加持，官方特地將泳池貼近水平線興建，表演場地與背後大海有如融為一體。
除咗海豚表演以外，同場仲會舉行海瀨、海獅等餵飼項目及一連串夜間活動，夕陽西下後越夜越精彩，情侶們拍拖就啱晒！
四國水族館
- 開幕日期：2020年3月20日
- 地址：香川縣綾歌郡宇多津町濱一番丁4
- 入場費：16歲以上成人2,200日圓、中小學生1,200日圓、3歲以上幼童600日圓
- 營業時間：3月20日至9月30日9:00-18:00、10月1日至3月19日10:00-18:00、日本黃金週及夏季9:00-21:00
- 交通：JR宇多津站徒步約12分鐘 或 從高松機場/JR高松站自駕約45分鐘
Comments