喺香港如果有合約等法律文件，又或者辦理手續，通常都要簽名。但喺日本到而家都未好通行簽名，而係需要用印章。可能大家都聽過日本要用印章，但你有知道其實日本用嘅印章有好幾種，仲有唔同嘅用法嗎？
關於印章・印鑑
喺日本社會入面，原來叫「印鑑」或者「印章」有唔同嘅意思，搞錯咗可能會引起誤會。不如我地一齊嚟睇吓有咩唔同。
Insho / 印章
本身個印呢個物件叫「印章(Insho)」，平時亦會叫「印鑑(Inkan)」，其他嘅叫法仲有「判子(Hanko)」。
In-ei / 印影
喺文件或者紙上面，用紅色墨按印就叫「印影(In-ei)」。
Inkan / 印鑑
印鑑指去銀行時用嘅「印鑑」，又或者已經登錄咗成為「印鑑」嘅印影。換句話嚟講，就係喺正式文件上以紅色墨蓋章。
印鑑嘅種類
如果以使用方法去分嘅話，日本嘅印鑑可以分成3種。
1. 實印 / Jitsu-in
呢個種類嘅印係正式印鑑，指實際喺市役所等地方登錄咗嘅印章。而最重要嘅係，用呢類印鑑嘅時候，一定要係本人，而且要有見證人或者關係者在場。呢種係市役所等官方登錄嘅印章，當要取得正式證明文件、簽合約、買屋買車等大手買賣時，就有需要用到。
2. 銀行印/ Ginko sirushi
銀行印指喺銀行或者協同組合等金融機構登記咗嘅印鑑。呢種印鑑，喺最初申請開銀行戶口時會用到，換言之開帳戶時就會喺銀行登記印鑑。咁之後呢個印就成為戶口持有人嘅身份確認。雖然而家都有銀行受理用簽名，但仲有好多銀行係使用印鑑
3. 認印 / Mitome-in
認印係指實印同銀行印以外嘅印鑑。比較無咁正式，通常係日常生活中使用。例如簽收郵件、包裹等。呢種印鑑就無須要去市役所辦理登記手續。
電子印鑑
而家都進入數碼化年代，所以印鑑亦有數碼化。可以喺數碼印鑑專門店購買同下載，又或者喺word / excel等處理文件軟件到製作。
自己專用印章
如果嚟日本，尤其係計劃中長期居留嘅話，就記得要準備返個自己專用嘅印章。開銀行戶口、租屋、仲有收取郵件、包裹時都會用到。
想整印章嘅話，一般喺日本嘅購物中心、商店街入面，都會有印章專門店，可以喺專門店訂造。如果係短期去日本旅行，亦都可以當作紀念或者手信，買返個可愛嘅印章。
你睇完呢篇文章之後有咩意見呢？你鍾意用印章定係簽名多啲？可以留言畀我地啊♪
Comments