作為日本傳統服飾之一而廣為人知嘅和服，相信大家都唔會感到陌生。不過，究竟和服與浴衣又有咩唔同？定其實係同一樣嘢呢？今次小編會分別從4個角度，去講解與比較浴衣與和服嘅不同之處。最後，會附上一眼就睇得清兩者差別嘅比較表，記得要bookmark低，方便日後去日本旅行時，可以親身體驗浴衣與和服兩者嘅分別喔！
若用戶經由文中連結購買或預約內文所介紹之商品，FUN! JAPAN將有機會收取部分收益。
日本嘅浴衣、和服係？先從歷史方面講解！
首先，小編會講解關於浴衣與和服嘅歷史。到底兩者係有咩區別呢？
浴衣係？
浴衣嘅名稱由來係源自於平安時代（794年-1185年），貴族入浴時所穿著嘅服裝——「湯帷子（ゆかたびら）」。當時，並無如現今日本一樣，裸體入浴嘅習慣。貴族入浴時所穿著嘅「湯帷子」係為免浸蒸浴時燙傷，並有助吸汗，以及隱藏裸體而穿上。由於棉花於當時係高級品，所以「湯帷子」一般係使用麻作為材質製作。
直至江戶時代（1603年–1868年）中期，日本人開始裸體浸浴嘅習慣，棉料亦滲透到普通老百姓手中。澡堂嘅普及，加上棉料通風又吸汗，可以抹乾浸浴後汗水，因此亦開始作為睡衣使用。
及後，穿著浴衣外出變得普及化，並從「湯帷子（ゆかたびら）」呢個名稱，簡稱為「浴衣（ゆかた）」。另外，據聞進入明治時代（1868年-1912年）之後，浴衣先至普及成現時於夏季期間，所穿著嘅服裝喔。
和服係？
「和服」嘅日文「着物」，直譯嘅話係「衣服」嘅意思，但近年被解作為「日本傳統服裝」。現時和服嘅原型，可追溯至平安時代（974年-1185年）上流貴族所穿著嘅「十二單衣」中，當時被視為內衣嘅「小袖」。其後，「小袖」擺脫內衣一角色，開始外穿並普及起來。隨著時代與環境變化，製作出各種形狀與顏色嘅和服，因此和服文化開始蓬勃起來。但隨著傳入他國文化、生活方式、服裝樣式等被歐美化，現代服裝成為主流穿著，日本人穿著和服嘅機會亦相繼遞減。
日文「着物」係有「穿著的衣服」之意，現代亦有「和裝」即日本服飾嘅意思，當中「浴衣」亦被認為係和服嘅一種。「和服」根據唔同場合，所穿著嘅種類亦有所不同。
跟住落嚟，小編會分別從穿著場合、材質、飾品、穿著方式呢4大重點，為大家講述浴衣同和服嘅不同之處。
①浴衣vs和服：用途、穿著場合
日本現時會以穿著場合去區分和服與浴衣。當中，於正式場合中會穿著和服，浴衣則作為休閒時穿著嘅服裝。
浴衣進入明治時代（1868年-1912年）之後先至被固定作為夏季期間嘅服裝。從日常生活場合中誕生嘅浴衣，雖然於正式場面中無法穿著出席，不過喺祭典、花火大會、休閒嘅飯局等夏天活動中，則經常會見到浴衣嘅踪影。另外，入住溫泉旅館時亦有提供浴衣，可作為睡衣使用。
另一方面，會穿著和服出席婚禮、派對聚會等慶祝活動、新年參拜、成人禮、畢業典禮等正式場合。例如，婚禮上新娘穿著嘅「白無垢」、「色打掛」、成人禮上新成人穿著嘅「振袖」等。除此之外，觀看歌舞伎等傳統藝能、美術館鑑賞藝術，又或上茶道、日本舞蹈等學習課堂時，亦有唔少人會穿著正式場合使用嘅和服前往。
②浴衣vs和服：材質
跟住落嚟，會介紹浴衣與和服嘅材質嘅不同之處。究竟關於和服與浴衣所使用嘅材質，你又知多少！！？？
浴衣係為咗可以舒適地度過日本炎夏而落足功夫。當然，會使用手感好、吸汗力高嘅材質製作。以前麻作為浴衣主流材質，現時則由木棉成為浴衣主流材質。另外，仲有棉、麻混合布料，喺市面上亦有賣好多容易打理嘅聚脂纖維所製成嘅浴衣。
和服材質中，最高級嘅係絲綢材質。和服亦有各種價格與種類，根據其相對應嘅材質分別使用麻、羊毛、聚酯纖維等材質所製作。
浴衣
- 木棉：吸汗與吸水力高，而且可清洗，所以係浴衣嘅固定材質。
- 麻：比起其他材質更容易起皺，但手感好，係吸收與散發性高嘅材質。
- 聚脂纖維：具有粘稠感嘅觸感，能吸收汗水、具速乾性、容易使用。
和服
- 絲綢：光澤柔軟嘅材質。廣泛使用於留袖與振袖等服裝。
- 麻：薄而有彈性。主要用於夏季和服。
- 聚酯纖維：因為係化學纖維，所以係具有強韌度嘅材質，而且可作清洗，因此被使用於各種唔同類型嘅和服。
- 羊毛：厚而唔易起皺，且耐髒。經常被使用製作冬天嘅和服。
③浴衣vs和服：飾品
浴衣與和服，驟眼睇可能難以區分，不過兩者除咗材質之外，裝飾品與著上身嘅物品亦有所不同。跟住落嚟就等小編逐一講解有何不同之處。
腰帶
穿著浴衣嘅話，一般會搭配使用「半幅帶」。如果使用其他款式腰帶嘅話，會畀人一種厚實而悶熱嘅印象，所以一般浴衣會使用其寬闊度為「袋帶」、「名古屋帶」一半左右嘅「半幅帶」。另外，基本上唔會使用裏襯、細絛帶等配件，可以根據自己喜好去打結（當然，根據喜好，亦有人穿著浴衣時會配戴裏襯、細絛帶等配件喔）。
穿著和服時，腰帶會使用正裝嘅「袋帶」、經常作為外出用嘅「名古屋帶」等，比一般用於浴衣嘅腰帶寬闊。另外，會配合到訪地點、季節等，揀選相應嘅腰帶花紋、顏色。另外，亦會根據和服款式去挑選合適嘅腰帶。因為腰帶上嘅花紋、顏色極具意義，所以需確認其含意，根據個人喜好搭配出理想穿著，並享受過程中嘅樂趣。
髪飾
將頭髮全部綁起，係浴衣與和服嘅主流髮型。
不過，搭配浴衣嘅髪飾過於顯眼嘅話，望落整體平衡感會比較差，並散發出一股稚氣，所以建議穿著浴衣嘅話，唔適宜搭配過於強烈顯眼嘅髪飾。
與此相對，和服多數喺婚禮等慶祝活動或正式場合穿著，所以根據和服嘅設計與顏色，有時候會出現使用華麗髪飾嘅情況。
鞋履
穿著浴衣嘅時候，會於腳下穿著木屐，一般以赤腳搭配木屐。另一方面，穿著和服嘅時候，會穿著草履，一般要先穿著足袋（分趾鞋襪）再搭配草履。
④浴衣vs和服：穿著方式
最後，會向大家講解浴衣與和服嘅不同穿著方式。
無論係和服，定係浴衣，都係同樣地以右襟向下左襟向上，左邊搭右邊嘅方式穿著。不過喺內衣與處理完成部分方面，兩者則有所不同。
浴衣最初係人們入浴後所穿著嘅衣物，基本上浴衣裡面無須穿著內衣，衣物直接觸碰肌膚。但時至今日，唔少人會穿著浴衣去參加煙花大會、夏日慶典等場合，因此浴衣與和服一樣，一般都要穿著內衣「肌襦袢」。比起和服，穿著浴衣所花費嘅工夫與時間，相對較短，所以如果想挑戰自己一個人，喺屋企完成整個穿著過程嘅話，推薦你揀浴衣作挑戰喔。
而穿著和服之前，首先要穿著「肌襦袢」、「長襦袢」等打底再著上和服。基本上，和服係唔會直接觸碰到肌膚上。「肌襦袢」有如貼身襯衣嘅內衣，「長襦袢」係為配襯出和服嘅重疊感所穿著嘅打底長衫。比起浴衣，和服嘅穿著工序比較多。
一眼睇清！比較浴衣、和服有乜唔同？
| 浴衣 | 和服 | |
| 場合 | 休閒場合 | 正式場合 |
| 穿著場景（例） | 祭典、煙花大會、夏季活動等 | 婚禮、派對等慶祝場合、新年參拜、成人禮、畢業典禮等 |
| 材質 | 木綿、麻、聚酯纖維 | 絲綢、麻、聚酯纖維、羊毛 |
| 腰帶 | 使用寬闊度為普通腰帶一半左右嘅「半幅帶」 | 一般使用「袋帶」與「名古屋帶」 重視腰帶花紋與顏色 |
| 鞋履 | 赤腳穿著木屐 | 先穿著分趾鞋襪，再著上草履 |
| 穿著方式 | 當浴衣作為外出時所穿著嘅服裝時，一般須穿著內衣（肌襦袢）。（無須穿著「長襦袢」） | 須穿著「肌襦袢」、「長襦袢」等內衣 |
租借浴衣、和服的穿著體驗
【klook】東京江户和裝工房雅和服 ＆ 浴衣租借（淺草站前店）
【klook】京都和裝工房雅（Kimono Miyabi）和服 & 浴衣租賃
【kkday】日本東京淺草｜傳統和服體驗／浴衣租借＆彩妝攝影服務｜江戶和裝工房雅 淺草站前店（KKday獨家可選攝影服務）
Comments