日本嘅父親節，喺每年６月嘅第三個星期日。點解世界各地咁多唔同日子慶祝父親節，而日本會揀呢日？日本人會送乜嘢畀老豆做父親節禮物？同FUN! JAPAN編一齊嚟探究吓啦！
日本父親節，點解係6月第三個星期日？
日本父親節係於每年6月嘅第三個星期日，點解會揀呢一日呢？
1980年，當時日本男性時尚協會會長伊藤恭一，對美國父親節嘅活動印象非常深刻，而且覺得好感動，所以就成立咗日本Father’s Day委員會。由嗰時開始，日本就跟美國一樣，係6月第三個星期日舉行父親節慶祝活動，而呢個活動習慣亦逐漸拓展至日本全國各地。
日本父親節，會送黃色玫瑰花？！
點解會喺父親節送黃色玫瑰呢？呢個亦係因為日本Father’s Day委員會所舉辦活動嘅影響。喺美國，黃絲帶象徵咗「祈求所愛之人平安」。所以，日本父親節就宣傳「送黃絲帶畀爸爸做禮物」。
由於日本喺母親節時會送康乃馨畀媽媽，所以亦習慣父親節都要送花（仲要係黃色），除咗黃玫瑰之外，同樣黃色嘅向日葵亦好受歡迎，有啲人會買向日葵畀爸爸做父親節禮物。
除咗送花，日本人仲會送乜嘢父親節禮物呢？
日本百貨公司通常5月中之後，就會開始賣父親節禮物。最普遍嘅禮物就係領呔、恤衫、電動鬚刨、公事包等。另外，威士忌、日本酒、燒酒等高級酒都相當受歡迎。最重要嘅係，要記得向辛勞嘅父親表示感謝！
各國父親節嘅日期唔一樣？！
雖然好多國家都有慶祝父親節，但其實唔同地方有唔同日子。例如6月第三個星期日，除咗香港，同埋文章內提到嘅日本同美國之外，英國、加拿大、愛爾蘭等地亦係呢日慶祝；另外，意大利同西班牙嘅父親節就係3月19日；韓國於5月18日；而巴西就係8月第二個星期日；澳洲同紐西蘭就定9月第一個星期日係父親節；泰國就於12月5日。而台灣同蒙古都係8月8日慶祝父親節，因為88同爸爸嘅發音相似。
Comments