雖然日本並唔似西方國家咁會「trick or treat」慶祝萬聖節，但由於cosplay次文化發展蓬勃，因此有唔少人都會趁住萬聖節前後換上cosplay服裝湊熱鬧！以東京為例，就以澀谷為10月尾最熱鬧嘅地區，亦係感受萬聖節氣氛嘅好去處之一！本篇文章，我哋會為大家介紹日本萬聖節歷史、應節方法，以及去澀谷歡度節日需要注意嘅事項！
關於澀谷萬聖節
澀谷身為4條鐵路路線嘅共通總站，順理成章地就成為除新宿以外嘅另一鬧區；但與新宿唔同嘅係，澀谷擁有來自澀谷站前十字路口嘅更多露天空間，商舖風格亦更偏向照顧年青一輩及海外遊客，難怪成為東京人每年慶祝萬聖節嘅首選！
日本人以前並唔流行慶祝萬聖節，直至後來部分海外萬聖節愛好者於90年代初期，喺東京山手線及大阪環狀線（環繞各城市一周行駛嘅鐵道路線）車廂內換上萬聖節服裝開party，此舉就被稱為「Gaijin Train（外國人鐵道）」。惟因飲酒及噪音問題，最終導致警察出動將參加者帶離車廂。
從2000年中期開始，呢排外國人將慶祝萬聖節嘅地場移師至更空曠、更多途人駐足觀看嘅地方。正好澀谷當時係一處鼓勵奇裝異服、自由表達個性嘅地方，因此就非常適合萬聖節傳統落地生根。
澀谷萬聖節歷史與歷年變遷
比起「trick or treat」，日本更盛行cosplay次文化，所以日本嘅萬聖節亦可見唔少與cosplay相關嘅慶祝活動。不過，澀谷嘅萬聖節活動其實並非由任何團體舉辦嘅官方活動，而係由民眾為展示cosplay服裝聚集而成嘅民間活動。
首次有紀錄嘅澀谷萬聖節可追溯至2011年。據講，當時只有一小撮人著上cosplay服裝，於行人道上游走又或參加區內私人派對。
2012年，首屈Rainbow PRIDE巡遊以澀谷作為會場，宣揚多元與個人自由價值，自此裝扮與聚集活動就逐漸於澀谷區普及。
澀谷萬聖節活動規模逐年增長。2014年，警方更因現場發生輕微罪行情況顯著而需要特別派員到場維持秩序。
2015年，到澀谷現場裝扮嘅民眾人數高達70,000人，因此同時亦於街頭遺留大量垃圾，澀谷區因此需要特別於事後舉辦清理垃圾活動。自此以後，當局便頒佈一套澀谷萬聖節指引與守則，呼籲民眾遵守。
有鑑慶祝活動參加人數越來越多，日本警方於2016年新增被稱為「DJ Police」嘅站崗警察，在場發出指示及控制站前十字路口人流；而再之後嘅2年，警方更為「DJ Police」引入傳譯員，以應對每年激增至超過300,000人嘅到場人次。2019年，酒精類飲品更首次被禁止，以防醉酒人士於現場引起混亂。
澀谷萬聖節節日氣氛勁濃厚！
雖然澀谷萬聖節只係近年興起、無得體驗「trick or treat」樂趣，而且亦無任何官方活動或巡遊，但樂趣依然毫不比其他地方嘅萬聖節活動遜色！參加者為展示自己嘅皇牌cosplay裝扮，近年一般都會聚集於澀谷站前十字路口、忠犬八公廣場，以及澀谷中心街等主要地方。
澀谷萬聖節當日，您會遇上各式各樣嘅cosplayer—有個人、亦會有著上著名動漫角色、幪面超人或戰隊系列，甚至荷李活電影等「團體制服」嘅三五成群朋友。您仲有機會遇上各路團隊大擺pose，又或與敵人「開戰」嘅場面—當然，一切都只係為影相啫！
如何盡情體驗澀谷萬聖節
無論您係傍觀路人定參加者，都實在係太多方式可以享受澀谷萬聖節節日氣氛！以下係編輯部想同大家分享嘅幾個貼士：
識去一定係去澀谷站前十字路口！
本身已經全年都咁多人嘅澀谷站前十字路口，萬聖節期間只會更逼滿cosplay人潮！想搵個安全而且又可以靜心觀察人潮嘅地方的話，推薦您可以到十字路口附近嘅餐廳又或澀谷站行人天橋。
如果您已經為自己準備好「戰衣」，咁就不如公諸同好、從八公廣場一直行到澀谷中心街啦！請做好心理準備：呢一段路程將會步步艱難，但同時亦係同路人緊密接觸交流嘅機會，甚至更有機會遇上同您「撞衫」嘅同好𠻹！
結交新朋友、到特色景點影相打卡！
一年一度萬聖節，難得嚟到當然要走上街頭著住靚靚「戰衣」自拍，再徘徊澀谷站前十字路口附近感受節日氣氛啦！話唔定您仲會遇上途人問您一齊影相𠻹！濃厚節日氣氛驅使下，就算雙方係陌生人，都會比平時更放膽一齊影相或互相讚美對方嘅靚衫㗎！
由於澀谷萬聖節並無劃分指定場區，所以您可以喺街上隨意自由走動；但如果您想hang out，請緊記切勿於公眾地方飲用酒精類飲品，因為從2019年澀谷萬聖節開始已禁止民眾於街頭飲酒。鍾情杯中物的話，只可以參加私人萬聖節派對、又或到居酒屋等晚間娛樂場所。
趁節日悉心打扮一番！
另一方面，自問無辦法自己準備「戰衣」嘅讀者亦唔使灰心！事關作為東京購物天堂之一，澀谷保證可以解決您嘅煩惱！澀谷範圍內有多間店舖都會出售cosplay服裝，非常方便您集齊全身服飾。
推薦搜購萬聖節服飾嘅地點包括「澀谷109」以及「MEGA Don Quijote 澀谷本店」。澀谷109提供免費更衣室（數量有限）畀遊客換衫，而MEGA Don Quijote 澀谷本店則只限於店內購物嘅顧客使用更衣室服務，所以如果您想要使用後者更衣室，就要記住留住購物收據、 並留意關門時間喇！
打算於當日提早到場嘅朋友，亦可以考慮先到DAISO準備物資，又或者到動漫發源地秋葉原搜購動漫主題服裝！
澀谷萬聖節禮儀與安全守則
如果您正打算要參加澀谷萬聖節，編輯部會建議您遵守以下守則與禮儀文化：
- 切勿隨處拋棄煙頭
- 切勿於路上飲酒
- 切勿於路上吸煙
- 切勿於指定地方以外便溺
- 切勿破壞公物
- 切勿引誘或教唆他人犯罪
- 切勿發出巨響或巨大聲浪
- 切勿引起口角紛爭或喧嘩滋事
- 切勿性騷擾或猥亵異性
- 切勿改裝汽車或電單車
- 切勿盜竊
- 切勿塗鴉
日本係一個極度重視私隱肖像權嘅國家，例如唔少cosplay活動上，攝影者都需要先禮貌詢問對方是否願意被拍攝（公開歡迎拍攝嘅模特兒或cosplayer除外）。 同樣道理，如果您見到有興趣影相嘅對象，請先得到對方同意再舉機，否則您可能需要將對方容貌打格後再上傳至公開媒體平台。
為解決垃圾堆積問題，自2019年起當局已於萬聖節期間實行「Eco-station垃圾桶」政策。除此之外，局部路上以外嘅公眾地方已禁止飲用酒精類飲品，部分店舖亦會貼上告示、表明萬聖節期間將停止出售酒精類飲品。
為促進廁所使用流動率，當局會呼籲公眾儘量避免使用公眾廁所作更衣用途。雖然近年可以見到越來越多人直接著住cosplay服裝搭地鐵，惟部分服裝仍然唔適合乘搭公眾交通工具，所以澀谷區內會有店舖提供更衣室服務。以下為為部分有提供更衣室服務嘅店舖詳情 (資訊截至2019年)：
Shibuya 109
- 費用: 免費
- 時間: 17:00 – 22:00 (2019年10月31日)
- 地點: 鄰近澀谷站1號及2號出口
ism campus (只限女士)
- 費用: 1,000日圓
- 時間: 18:00-23:00 (2019年10月31日)
- 地點: 東京都澀谷區道玄坂1-22-12 長島第一大樓 3F
MEGA Don Quijote 澀谷本店
- 費用: 免費 (只適用於於店內購買cosplay服裝者)
- 時間:
- 17:00 – 23:00 (2019年10月26日至30日)
- 15:00 – 00:00 (2019年10月31日)
- 地點: 東京都澀谷區宇田川町28-6
最後再一次溫馨提示，澀谷萬聖節罪案數字近年有上升趨勢。雖然警察會於萬聖節期間加強人手，但為保障自己，請遵守活動守則，緊記切勿以身試法啊！
Comments