日本人同人打招呼表示友好，並唔會握手，唔需要有「肌膚之親」就搞得掂。呢個鞠躬嘅打招呼方法，喺近期推廣「Social Distance」嘅國際社會上都非常推薦。不如我地一齊嚟睇下日本用鞠躬禮（日語：お辞儀，發音：Ojigi）嘅文化起源，同埋喺日本鞠躬嘅正確方法吧！
乜嘢係日本鞠躬禮（お辞儀）？
日本鞠躬禮，日文叫「お辞儀（發音：Ojigi）」，喺一個彎身向下低頭嘅姿勢，表示禮貌同對人嘅尊敬。呢個動作喺亞洲文化入面都好常見，而喺某啲國家就係貴族嘅習慣，歐洲都有啲國家有呢個習慣。
有關日本鞠躬禮嘅由來
日本嘅鞠躬禮據說喺由飛鳥時代至奈良時代開始，起源係取自中國嘅禮法。
據說呢個動作由來，係向對方伸出自己嘅頭，表示自己並唔會有任何扺抗。而傳到日本之後，再發展成為對應身份嘅鞠躬禮。
鞠躬都有分唔同種類？
可能好多人會以為，鞠躬文化只係向其他人彎腰低頭就係。但其實並唔係咁簡單！日本鞠躬禮都有好多方法，一般嚟講可以分成３個種類。
點頭
日本鞠躬禮中，最輕鬆嘅方式叫「點頭」，通常係工作時朝早打招呼同講拜拜時用，又或者行過撞到識嘅人，或者去接客戶時，一個比較簡單輕鬆嘅鞠躬方法。
雖然叫「點頭」，但其實喺要由腰開始嘅上身向前傾15度，視線大概望向前面3米左右嘅地方。
敬禮
「敬禮」嘅鞠躬方法係伸直背脊30度彎腰。視線應該要望住自己腳前少少嘅地方。呢個鞠躬禮比起「點頭」更加有禮貌，係對客戶、上司等嘅做嘅禮儀。
最敬禮
最敬禮嘅鞠躬方法係伸直背脊45度彎腰，係三種鞠躬禮入面鞠躬得最大嘅。呢個方法通常係謝罪，或者表示好衷心感謝時使用，又或者對重要客戶時用。而喺神明前祈禱，又或者對好尊敬嘅人時都會用到。
錯誤嘅鞠躬方法
記得行日本鞠躬禮嘅時候要注意，唔好明明想有禮貌，但做錯咗就變失禮！
下面等我地嚟介紹一啲容易犯錯嘅例子。
×坐喺到行鞠躬禮
當開完會後，如果對方企咗起身，自己坐喺到仲做緊其他嘢嘅話，應該停咗手上做緊嘅嘢，回應對方先係最優先做嘅事。應該要即刻企起身，用正確嘅姿勢行鞠躬禮。
×剩係低頭
剩係低頭，唔係連埋彎腰嘅話，係好失禮。
×剩係彎腰
如果剩係彎腰，但個頭唔向下望，一路睥住人嘅話，會帶畀人好恐怖嘅印象，要注意啊。
×90度鞠躬
彎腰彎得太多都唔得。如果90度鞠躬，好大機會會令你上司同其他人唔高興。
×一邊打招呼一邊鞠躬
唔建議一面講嘢打招呼一邊行鞠躬禮（尤其係敬禮同最敬禮）。正確嘅做法，應該係首先打招呼，例如講「早晨（おはようございます）」，然後先鞠躬。
×連續鞠幾次躬
連續鞠好幾次躬會令你覺得唔係真心真意。鞠躬禮只需要行一次就夠。
今次呢篇文章講嘅鞠躬禮你覺得點呢？去日本嘅時候，又或者住日本酒店、旅館，喺日本公司工作嘅時候，如果可以做到上面嘅正確鞠躬方式，相信日本人都會感動。
Comments