因為乜嘢理由，會令你鍾意日本到想學日文，甚至想去日本生活、工作呢？相信呢個係居住喺日本嘅外國人，最經常被問嘅問題之一。或者有人係因為嚟日本旅遊後，開始愛上日本；或者亦有人係對日本嘅歷史文化感到興趣；再或者有人係因為日本嘅漫畫、電玩等，開始對日本產生興趣，呢啲而家稱為「Cool Japan」嘅日本流行文化，喺1990年代席捲全球各地，台灣同香港甚至紅到出現「哈日族」一詞。FUN! JAPAN編輯部成員嚟自唔同嘅國家，每個人鍾意日本嘅原因同契機各有唔同。今次，想同大家分享一下，FUN! JAPAN團隊鍾意日本嘅契機同學日文嘅動機…
日本動漫、電玩遊戲
根據內閣府知識產權戰略推動事務局針對外國人所做嘅調查顯示，歐洲有七成、亞洲有五成以上都係因為動漫等開始鍾意日本。FUN! JAPAN編輯部中，就有人因為超級任天堂、Game Boy遊戲機等，開始對日本產生興趣，甚至仲夢想嚟日本製作遊戲呢；另外，仲有好多人係由細睇日本漫畫同動畫長大，例如《男兒當入樽》、《多啦A夢》、《數碼暴龍》、《美少女戰士》、《名偵探柯南》、《龍珠》等漫畫，有翻譯成各國語言出版，卡通片亦都喺唔同地方嘅當地電視台播放，非常入屋。可見電玩、漫畫、卡通嘅影響力係絕對唔可以睇小。
日劇、偶像、J-POP
FUN! JAPAN團隊入面，或者有更多人係因為日劇、偶像同J-POP相關等娛樂而開始對日本產生興趣，當中最具影響力嘅要數KinKi Kids、嵐、KAT-TUN等偶像團體所屬嘅「Johnny's 傑尼斯」。為咗想即刻得知鍾意嘅偶像嘅消息，或者出演日劇同綜藝節目中嘅內容，而開始學習日文嘅人好多。當然，亦有人係因為鍾意睇日劇，例如：《HERO》、《魔女的條件》等，為咗可以唔需要字幕就理解內容，而開始學習日語；或者係聽J-POP而開始對日本產生興趣，例如日劇主題曲、濱崎步、安室奈美惠、倖田來未、宇多田光等歌手，都係學習日文嘅動力。
鍾意語言、對將來工作有幫助
除咗學習「英語」之外，想學習更多外語，亦係幾位FUN!JAPAN編輯對日本產生興趣嘅原因。「日語聽起嚟好優美柔和」、「英文大家都識，但日文就唔係咁多人識」，因為以上列舉嘅原因而開始對日語有興趣，進而對日本抱有憧憬。另外，日本企業喺全世界逐漸建立多分公司等支點，亦會有人覺得學習日語作為第二外語，對將來工作有幫助。
日本旅行、歷史文化
日本向來畀人以客為先、禮貌至上嘅印象，有好多人去完日本旅行都因此留下深刻印象。有FUN!JAPAN編輯就係嚟到日本旅行，見到日本咁愛護自然景觀、重視傳統文化、珍惜保存歷史文物、建築同街道等，進而對於傳統同現代共存嘅日本產生好奇心。
源自日本嘅知名品牌 尖端科技與無限創意
「TOYOTA」、「HONDA」、「SUZUKI」、「Sony」、「Panasonic」等，呢啲道路上行走嘅品牌、又或者日常生活中用到嘅品牌，好多都係源自日本嘅知名出產商。有FUN!JAPAN編輯就係因為好奇呢個國家，係點樣可以生出咁多知名品牌，點樣有咁多源源不絕嘅創意，不斷推出走喺時代尖端嘅高科技產品？因而進一步想了解「日本」呢個國家嘅一切。
東日本大地震(311大地震)
發生喺2011年3月11日嘅「東日本大地震」，地震之後海嘯發生，甚至引發核災。造成至少1萬6000人死亡，2500多人仍然下落不明。呢場大規模災害，震撼全球。當時，全世界嘅新聞媒體不斷報導日本嘅情況，地震發生後，大家相互幫助，喺買嘢時亦有秩序咁排隊，唔會爭先恐後，見到喺緊急災難嘅情況吓，仲可以咁守規矩嘅日本人，因此對日本人產生尊敬之心。另外，遭受重創嘅日本，甚後復原同重建速度之快，亦令人佩服。好特別嘅係，FUN! JAPAN團隊中，就係有人因為311地震開始對日本產生興趣，最後下定決心嚟到日本。
因為時代背景、國情唔同，個人嘅小感動或者大興趣，都有可能令你想更深入了解一個國家，FUN! JAPAN嘅成員嚟自馬來西亞、泰國、印尼、中國、台灣、香港、越南等。今次特別將各國成員嘅經驗談整理出來，希望可以畀想學日文或者將來有移居日本計劃嘅人做參考。當然，上面分享嘅只係其中一部份，去日本契機同學日文嘅動機並唔止呢啲。歡迎大家下面留言分享，點解你咁鍾意日本嘅原因！
相關文章
- 【Work & Life in Japan Vol.1】喺日本社會中存在感越嚟越高嘅外國人
- 【Work & Life in Japan Vol.2】好想喺日本住！長期居留日本嘅方法
- 【Work & Life in Japan Vol.3】日本公司外籍員工逐年攀升 人數變化解說與分析
更多相關日語資料
FUN! JAPAN網站推出咗「日本語能力試驗對策」嘅練習試題，目前有N1同N2、N3嘅文法、語彙、讀解、聽解…等試題，並且陸續新增中，準備緊日文考試嘅讀者不妨去試吓做練習啦～
Comments