受新型冠狀病毒疫情影響，日本各地演唱會、賞花活動相繼被逼取消，就連主題公園都要關門休息。不過，就算足不出戶都可以一樣享受居家娛樂嘅！
演唱會可以免費期間限定公開、櫻花開花情況可以上網直播，最近就連主題樂園都加入online行列。為照顧一眾無得入場嘅粉絲，日本各主題樂園紛紛將「第一身視覺」嘅過山車映像上載到YouTube，方便您安坐家中都可以體驗坐頭等車卡嘅滋味。
東京巨蛋城「Thunder Dolphin」
東京巨蛋城（Tokyo Dome City）「Thunder Dolphin」以穿插於高樓大廈之間見稱，相信有唔少坐過嘅讀者都會明白嗰種石屎建築迎面撲上嘅動魄驚心感覺！高達每小時130公里時速嘅過山車，而家就算坐喺屋企都有機會慢慢回味喇！
橫濱八景島海景樂園「LEVIATHAN」
石屎森林過後，另一過山車愛好者唔能夠錯過嘅就有橫濱八景島海景樂園「LEVIATHAN」。「LEVIATHAN」係日本全國唯一建於海上嘅過山車，約3分鐘旅途全程都有大大個八景島海景陪住您！
淺草花屋敷
隔著個mon都嫌上山下海太刺激的話，不妨移玉步返到東京淺草、拜訪全日本現存最古老嘅過山車。建於1953年嘅淺草花屋敷過山車時速僅每小時42公里，刺激程度可能稍有輸蝕，但勝在周圍充滿淺草下町情懷、懷舊昭和氣氛搭夠！
同場加映：一次過玩晒全國咁多個主題公園！
另一方面，日本環球影城（USJ）亦喺Twitter上傳咗2段人氣過山車「Hollywood Dream - The Ride」以及「Hollywood Dream – The Ride - Backdrop」短片。需知道過山車一大特色係乘客於行駛時可以指定播放心水樂曲，因此官方就建議大家坐喺屋企睇片時一邊播著自己鍾意嘅樂曲先夠最原汁原味，夠晒貼心！
疫情期間期望與眾同樂嘅主題公園又點只咁少呢？由2020年4月28起，讀賣樂園就聯同東三動物公園、豐島園、那須高原樂園等全國知名主題公園發起「おうち遊園地」（家中遊樂場）活動，並開設特設網站匯聚各大機動遊戲試玩影片、保證免費任玩！暫時無得去日本嘅您，不妨就趁呢個機會望梅止渴啦！
Comments