【Work & Life in Japan Vol.2】好想喺日本住！長期居留日本嘅方法

世界咁大，日本可能未必係每個人嘅第一選擇。咁點解有咁多人揀去日本呢？上一篇，FUN! JAPAN編輯部咁簡單咁整理咗有幾多外國人住喺日本，咪睇嘅就要望吓啦→【Work & Life in Japan Vol.1】

而長期居留喺日本嘅方法都有好多種，根據大家嘅人生計劃、經濟因素咁會唔同，有人喺一句日文都唔識就嚟到日本，亦有人去日本之前已經可以用日文溝通。每個人長期居留喺日本嘅方法同順序都可能唔一樣。今次，就等FUN! JAPAN編輯部同大家介紹幾種常見嘅日本長期居留方法，畀想鼓起勇起去日本闖盪嘅你一啲參考。

方法１．以語言學校為起點

「語言」係於外國生活嘅重要技能之一，想深入了解一個國家嘅文化同埋學佢嘅語言，最快嘅方法就係到當地學習，融入當地嘅生活環境。喺日本學習日語，有三種教育機構可供選擇。有興趣嘅人可以睇呢篇→3大日語教育機關介紹

當然，坊間亦有一啲團體開辦免費嘅日語教室，呢度所講嘅語言學校，係指可以取得合法居留權「留學簽證」嘅學校。語言學校根據唔同類型同課程，留學期間唔同，最短為半年，最長為2年。咁喺學校畢業後，想繼續留喺日本，有乜嘢方法呢？

1. 選擇繼續升學後再就業

想喺日本讀大學或者入研究院嘅人，通常會選擇升學。另外，日本亦有「專門學校」嘅制度，有好多本身已經有大學學歷嘅人，嚟到日本再讀「專門學校」，學習一技之長。畢業之後再考慮是否進入日本職場工作。

2. 選擇就業

語言學校畢業後揀就業嘅人，有好多係本身已經有日文底，想去日本生活或者工作，但無機會講實際用日文，所以先喺語言學校練習會話同埋適應生活環境。呢類型嘅人，會由留學生身份轉成工作人士。遲啲FUN! JAPAN也會為大家詳細介紹就職嘅人所持嘅工作簽證種類。

方法２．直接赴日工作

今時今日，網路無國界限制，令好多手續都變得簡化，見工面試就係其中一項。過去上網未咁發達時，要去海外工作，除咗要過五關斬六將之外，可能仲要專程親身飛去當地面試，難度甚高。但係近年，越嚟越多日本企業，為咗要爭取優秀人材，都開始向海外招聘著手。好多時會先用網上面試，到最後一關先請申請人去當地見面。甚至係連面對面都唔需要，直接喺網上面試就可以落決定。呢啲直接去日本工作嘅情況，有啲係因為申請者本身語言程度好，亦有啲係工作內容唔需要用到日文。而呢幾年好受歡迎嘅打工度假制度，也令好多年輕人可以直接飛去日本搵工，文章後面亦會詳細介紹。

方法３．為愛離鄉別井遠赴日本建新家庭新生活

簡單嚟講，就係結婚！當你同日本人嚟一段轟轟烈烈嘅國際戀愛，排除一切萬難後，決定走入禮堂攜手共度餘生，然後選擇一齊居住日本時，就係另一種留日方式。咁要點先會搵到日本人做另一半呢？有人係學生時期認識，亦有人係工作上遇到，亦有喺其他海外國家留學、工作認識，再一齊返日本嘅個案。呢啲情況，就會以「配偶」嘅身分留喺日本。

方法４．喺日本創業做老闆

日本政府喺2015年4月，開始放寬外國人喺日本創業嘅限制，藉此吸引海外投資，歡迎海外人士去日本創業定居。所以，有啲人會選擇去日本創業做老闆。不過，前提係要先有足夠嘅財力。

方法５．先嚟日本Working Holiday(打工度假)

近年嚟，年輕人當中相當流行嘅Working Holiday，亦係另一種留喺日本嘅方式。不過，Working Holiday有年齡、國籍、地區嘅限制，唔係所有地區都可以申請。另外，居留期限最長一年，無得延長。咁如果Working Holiday完咗，想繼續留喺日本可以點做呢？

１．轉為學生身分

有啲人會用Working Holiday簽證，嚟到日本一邊學習日文，一邊打工，但因為只有1年時間，學習未必夠全面，所以就會有人喺Working Holiday完咗後，再次做返學生。

２．繼續留喺打工嘅地方工作

近來有許多企業或餐飲業，都願意幫外國人申請工作簽證，令原本只係打工嘅人，可以繼續喺同一間公司工作，呢個都係其中一個Working Holiday結束後留喺日本嘅方法。

３．重新搵新工作

喺Working Holiday簽證到期前，不斷咁Send CV、搵工，正式被企業取錄後，就可以辦工作簽證，繼續留喺日本。

睇到呢到，有沒有覺得好多方法，其實去到最後都係「工作」呢？咁而家喺日本工作嘅外國人，其實通常做乜嘢工作呢？下一篇，FUN! JAPAN編輯部會分析，喺日本「工作」嘅外國人，近年來嘅變化同趨勢。

【Work & Life in Japan Vol.2】好想喺日本住！長期居留日本嘅方法