日本一年有幾次長假期，而喺春季嘅4月尾至5月初期間就被稱為「Golden Week (ゴールデンウイーク)」，亦即係我地所講嘅「黃金週」。黃金週其實係包括咗4日國定假期，加埋星期六日就變成長假，有啲人甚至會中間平日都休假，自製超過一星期休假。不如我地先一齊睇吓呢幾日假期係紀念啲乜？
黃金週內嘅假期有？
黃金週嘅假期包括咗以下幾日：
- 4月29日：昭和之日 (昭和の日)
- 5月3日：憲法記念日
- 5月4日：綠之日 (みどりの日)
- 5月5日：兒童之日 (こどもの日)
4月29日:昭和之日(昭和の日)
4月29日喺1988年之前為「天皇誕生日」嘅假期，昭和天王於1989年去世之後，國會就將呢日列為「綠之日」，據說當時議會定呢個名係因為多數意見認為「昭和天皇對植物好有研究，並愛好大自然」而嚟。亦藉此令市民更加關心綠化同埋大自然。至2005年嘅假期法更改，定咗由2007年開始將「綠之日」搬去原本只叫「國民之休日」嘅5月4日，而4月29日就成為咗「昭和之日」。
5月3日:憲法記念日
為咗紀念由1947年5月3日開始實施日本國憲法，於1948年就公佈同實行憲法記念日為假期。
5月4日:綠之日(みどりの日)
根據日本假期法，會將兩日假期中間夾住嘅平日，定為「國民之休日」嘅假期，方便大家可以連續放假。由於5月3日同5月5日都係假日，所以一般嚟講5月4日好順利成章咁變成「國民之休日」。到咗2007年如上面所講，先將「綠之日」搬咗嚟5月4日取代原本嘅「國民之休日」
5月5日:兒童之日(こどもの日)
呢個假日係日本政府早於1948年製訂，主要喺為慶祝全日本小朋友出世（尤其係男仔），同時亦感謝扶養小朋友長大成人嘅父母親。而喺日本政府正式訂立兒童之日前，其實呢日係日本嘅「端午節句」，亦即係5月5日端午節(日本慣用西曆慶祝傳統假期)。>>兒童之日（日本兒童節）知多啲！
順帶一提，5月1日嘅國際勞動節，並唔係日本嘅法定假日。而日本另外有11月23日嘅「勤勞感謝之日」，算係日本版嘅感謝勞動力嘅節日。
2019年嘅黃金週10日連假
喺2019年由於明仁天皇退位，由皇太子德仁親王於5月1日登位，所以2019年5月1日就定為「天皇即位日」嘅全國假期。而根據之前介紹過嘅日本假期法，兩日假期中間嘅平日會變成「國民之休日」，所以4月30日同5月2日都變成假期，形成咗日本歷史上首次有10日連續假期嘅「黃金週」。
五月會有「五月病」？
日本嘅五月病，即係假期後綜合症。由於日本多數喺4月開始新學期同新生活（新工作、就職、新財政年度等），去到5月剛好過咗1個月新生活，積聚壓力，然後就有連續假期，放鬆後就會好容易出現疲勞、鬱屈、不安等症狀，假期後唔想返工返學。「五月病」呢個詞語喺係1960年代後期開始流行，成為當時嘅流行語，到而家都仲好通行。
大家放假之餘，要記住保持身心健康，避免出現五月病啊~!
Comments