喺日本，集中於每年4月底至5月初嘅公眾假期非常多，例如係4月29日「昭和之日」、5月3日「憲法紀念日」、5月4日「綠之日」以及5月5日「兒童之日」，而以上多個假期，普遍就都會被稱為「黃金週」。以下，我哋將會為大家介紹5月4日「綠之日」嘅由來以及相關活動等。
何謂日本假期「綠之日」？
「綠之日」係珍惜大自然同埋綠化嘅日子，日期源自昭和天皇生日。昭和天皇於在位期間曾多次出席全國各地嘅植樹祭典，對於綠化事業表示深切關心，強調現今各種環境問題嘅重要性，再加上以各界學識份子為主要成員嘅機構當中，多數意見都認為「昭和天皇對於植物造詣深厚，非常熱愛自然」，因此昭和天皇駕崩後，後人就將呢一日改為「綠之日」。
本來，5月4日被稱為「國民之假日」。2007年前，4月29日昭和天皇生日被定為「綠之日」；從2007年起，4月29日就被改為「昭和之日」，同時「綠之日」則被改為5月4日。
「綠之日」？「植物園之日」？
「綠之日」於2007年開始實施。取其「綠」之意，因此呢一日亦係「植物園之日」，目的為求提高大眾對植物、森林嘅關注，因此日本全國各地多個植物園同埋花園或庭園，都會喺呢一日開放免費入場。另外，國營公園等設施則會舉辦分發樹苗等活動，甚至係部分同花草、植物無關嘅動物園、水族館、以至博物館等設施，都會開放免費入場呢。
東京人氣景點於「綠之日」免費開放入場
日本全國各地多個設施都會喺「綠之日」開放免費入場，如果有機會呢段期間去日本嘅話，大家不妨可以喺計劃行程上稍作考慮。以下為部分「綠之日」免費入場嘅清單：
- 上野 恩賜上野動物園
- 新宿 新宿御苑
- 葛西 葛西臨海水族園
- 吉祥寺 井之頭自然文化園
- 駒込 六義園
- 汐留 濱離宮恩賜庭園
- 濱松町 舊芝離宮恩賜庭園
- 白金台 國立科學博物館 附屬自然教育園
- 清澄白河 清澄庭園
- 後樂園 小石川後樂園
一於下次啟程去日本旅行之前，先做足功課、預習睇吓有邊啲花園未去過又想去，規劃行程啦！
※以上為往年曾經免費開放入場嘅設施。關於特定年度之資訊及最新安排，請自行向該設施查詢確認。
Comments