大家好，我係第三回日本旅遊獎賞活動既得獎者Jimmy Tam。繼上次頭兩日嘅活動經歷分享，今篇會分享最後3日嘅一點一滴。
第3日 金澤嘅「黃金」經驗
今日去金澤，酒店經理晨咁早送我地上巴士，佢做左一個日本人送客既指定動作，就係對著巴士揮手拜拜，直至見唔到巴士為止。呢個動作往往都令旅客感受到果種俾人當貴賓服待既感覺，不得不讚。順帶一提，呢間酒店叫志賀高原王子大飯店，出哂名滑雪，有機會一定會再嚟。
去到金澤嘅酒店放低行李之後，我地就搭金澤嘅巴士出發去景點，首站係去到東茶屋街，喺叫「箔一」嘅工藝店入面，嘗試制作金箔工藝，呢度連雪糕、酒、餅乾都可以貼金箔喺上面。自己整金箔工藝品做手信真係一流，有得玩又有得帶返屋企，價廉物美，一舉兩得。
食過午餐後，我地再去左金澤城同埋兼六園，兩者都好靚，好似去左江戶時代咁，古色古香。我地再去周邊行左一陣，就搭返巴士返酒店休息。值得一提，我地每人全日巴士車費只係500円！抵！
夜晚我地去左車站入面壽司店享受晚飯，店長同我地有講有笑，又教第一次食壽司既印度朋友Rishabh 四種唔同食壽司既方法。呢一餐可能係我一生人食壽司食得最開心既一次！
第4日早上 影結婚相必去！氣多大社求姻緣
呢日一朝早就坐車去「氣多大社」。氣多大社係出左名求姻緣，好多單身人士、情侶、準備結婚、以至夫婦都會嚟呢度參拜。呢度有個特別活動，就係每月一日有為單身人士祈福既祭典，今日咁岩就俾我地撞正，可以參與其中。
完左祭典後，氣多大社嘅宮司帶咗我地去睇航拍攝影。係咪覺得奇怪？究竟航拍同大社有乜關係？原來氣多大社除左出名求因緣，仲有好多新人嚟呢度影結婚相。航拍可以喺傳統日本神社入面，以唔同角度拍低一對新人最美好既姿態，吸咗好多外國人嚟呢到行禮同影結婚相，其中仲有唔少香港人添。我諗我第時結婚都想嚟呢度影！
第4日下午 出發去大阪！
參觀完氣多大社返去火車站時，我把握時間買返啲地道零食，上車時分俾我至愛既團友。點解咁突然？因為前幾日佢地都帶左自己國家既零食分俾我地，真係好warm，開心真係要分享，分享就會開心。
由金澤搭咗三個鐘特快火車，我地到左大阪市。首先搭的士到酒店，呢次係我第一次喺日本搭的士，短程其實價錢都可接受。放低行李之後，我地就搭地鐵去道頓堀。係地鐵站迎接我既係JTB嘅職員。佢帶我地遊覽道頓堀，仲介紹我地可以買外賣帶去道頓堀中心嘅Tonbori Base Café & Info，坐低慢慢食。呢個位於道頓堀中心地帶嘅休息點兼旅遊中心，係歡迎遊客帶小食入嚟坐下，入面仲有付費酒水提供，而最有價值既係，呢個旅遊中心提供多元化活動資訊俾我地，照顧哂老中青三類人。
夜晚係自由活動時間，我地搵左間卡啦OK唱咗一個鐘。日本嘅卡啦OK同香港都差唔多，一個愉快嘅夜晚就由開心嘅歌聲中結束。
第5日 到咗講拜拜嘅時候……
其實成個旅程最傷感就係到講再見嘅時刻，有邊個會想同玩左咁多日、有哂感情既團友講拜拜？因為航班更改關係，我要由大阪經東京再返香港。喺飛東京既機上面差啲就喊出嚟。不過最後都順利抵達香港，繼續繁忙嘅生活，等待下次再去日本嘅機會。
正所謂讀萬卷書不如行萬里路，今次旅程更加激發左我對日本既興趣。希望嚟緊嘅將來，我可以有更多既機會到訪日本各地，深入了解佢嘅生活同文化，因為日本真係好正！最後，各位團友，希望我地他朝有日，會係世界既某一個地方再見！
Comments