廣島縣唔單只擁有世界遺產宮島、原爆圓頂及尾道等世界知名觀光景點，當地美食亦一樣咁值得大家發掘！廣島燒、生蠔、檸檬蛋糕、紅葉饅頭…無論係海鮮定甜品，廣島縣都一樣有齊！今次，FUN! JAPAN就會發表各位讀者最感興趣嘅頭3位，同樣亦會同大家分享歷史、食法等各種有趣小情報。而喺文篇最尾嘅部分，我哋仲會介紹埋廣島縣內交通必備嘅「西遊紀行」瀨戶內地區鐵路周遊券㗎！
【第３位】多層次先夠正宗！配料豐富嘅廣島燒您又試過未？
無需多講，廣島縣最著名嘅料理非廣島燒莫屬！但大家又未必知道，其實廣島燒同大阪燒又有咩分別呢？堪稱頭號地道美食嘅廣島燒，一般以豬肉、天婦羅麵衣、芽菜、椰菜等多種材料配以餅底製成。同大阪燒唔同嘅係，製作過程中唔會將材料撈埋一齊、而係採用「層層疊」嘅方式。除咗常見嘅蕎麥麵×豬肉×雞蛋「蕎麥肉玉」外，唔同店舖亦會提供例如魷魚×蝦×年糕，又或面頭放有太陽蛋或蔥花等配料，不妨試多幾間比較一下。
追加玩法
廣島燒店又點只廣島燒咁簡單！好多舖頭同場都會提供鐵板料理，有機會的話記得一定要試埋另一廣島名物—廣島蠔呀！廣島蠔生於含有豐富浮遊生物嘅瀨戶內海，又大粒又厚肉！喺到同大家分享一個識食小貼士，就係每年1～2月當造時期，鮮味成分之一嘅「糖原」含量最多。用廣島蠔做配料嘅豪華廣島燒亦係必食清單之一。
【第２位】有內在美亦有外在美！廣島檸檬小食精選
廣島縣亦係日本國內著名水果王國之一，尤其係瀨戶內沿岸氣候溫暖、雨量較少，因此份外適合栽種柑橘類水果。當中又以廣島檸檬憑著清爽香味，成功喺全國打響名堂。「瀨戶田檸檬菓子工房」、「藤井屋」等品牌都各有推出廣島檸檬甜品，既有內在美又有外在美，用嚟做手信就最適合不過。
必check名物
云云手信裡面，編輯部誠意推介檸檬狀嘅「島心」蛋糕。蛋糕表面鋪滿白朱古力，內裡則加入咗檸檬成分，最特別係檸檬型外觀夠晒kawaii！最近各名店更各出奇謀，紛紛推出無糖衣版本或四角形蛋糕等。另一方面，2塊類似棉花糖嘅餅底夾住檸檬果凍「淡雪花（宮島 藤井屋）」亦係唔少人買手信嘅首選。檸檬果凍由廣島縣產大長檸檬軟糖製成，而餅底剛選用檸檬汁與果皮，當爽脆口感配上清新果實香氣，就係前所未有嘅甜品享受！鬆軟、甜燸、彈牙，一次過滿足您3個願望！
【第１位】煎炸亦得、雪凍食亦得！紅葉饅頭各具特色、餡料千變萬化
源自宮島嘅「紅葉饅頭」，係一款以蜂蜜蛋糕餅底配上紅豆餡嘅小食。圖中咁得意嘅紅葉外觀，據講靈感正正就係來自宮島賞楓勝地「紅葉谷」內嘅紅葉。現時宮島上大概有20間出售紅葉饅頭嘅舖頭，大家不妨試多幾間、比較唔同口味。
必check名物
紅葉饅頭最大嘅特色，就係其變化多端嘅餡料。除咗必食經典紅豆泥口味以外，您仲可以搵到紅豆餡、抹茶、檸檬、栗子、鹹牛油、南瓜、提子乾等各式各樣嘅選擇。此外，紅葉饅頭嘅製法亦層出不窮—燒、炸，又或者雪凍食、加忌廉食都得㗎！
追加玩法
宮島上亦有體驗手作紅葉饅頭嘅地方，而且做法非常簡單，只需要用雞蛋、小麥粉、水、砂糖混成餅底，再倒入餅模烤焗就大功告成，仲可以隨便揀自己鍾意嘅餡料𠻹。
廣島縣旅行必備良伴：「西遊紀行」瀨戶內地區鐵路周遊券
廣島縣有咁多值得去嘅觀光景點，係咪令到各位選擇困難症發作呢？想輕鬆穿梭各地，買定瀨戶內地區鐵路周遊券傍身就實無死！一pass在手，即包含岡山縣、廣島縣、山口縣及其他瀨戶內地區嘅新幹線、鐵路、巴士（※部分路線除外）5日無限次任搭放題，實屬第一次到瀨戶內地區嘅人必買！有關鐵路pass嘅精明用法，我哋將會喺另一篇文章內再作詳細介紹，記住多多支持喇～
瀨戶內地區鐵路周遊券詳情如下：
https://www.westjr.co.jp/global/tc/ticket/setouchi/
延伸閱讀：
岡山縣：
- 【新手適用】最強新手岡山自由行攻略！5分鐘帶你睇盡熱門觀光景點BEST 3
- 【老手適用】想發掘更多岡山「隱世」秘點？5分鐘帶你睇盡最新玩法BEST 3
- 岡山「好西」、您食過幾多樣？FUN! JAPAN私心推薦岡山縣必試美食BEST 3！
廣島縣：
- 【新手適用】最強新手廣島自由行攻略！5分鐘帶你睇盡熱門觀光景點BEST 3
- 【老手適用】想發掘更多廣島「隱世」秘點？5分鐘帶你睇盡最新玩法BEST 3
- 廣島「好西」、您食過幾多樣？FUN! JAPAN私心推薦岡山縣必試美食BEST 3！
山口縣：
岡山縣×廣島縣：
sponsored by JR西日本
Comments