世界遺產「宮島」、水城「廣島市」、環山抱海嘅優美島嶼「尾道」等廣島縣必去景點都已經玩過晒？唔怕！今次就等編輯部為您介紹廣島縣鮮為人知嘅秘點。只要您睇過呢篇文章，編輯部保證您下次廣島之旅將會樂趣加倍！同場我哋仲會介紹埋廣島縣內交通必備嘅「西遊紀行」瀨戶內地區鐵路周遊券，一於帶埋著數pass一齊出發啦！
【第３位】總部原來就喺廣島縣！潛入忌廉包品牌「八天堂」嘅手作體驗工房
相信大家對主打忌廉包嘅「八天堂」都唔會陌生，但您又知唔知品牌原來係源自廣島縣三原市呢？ 品牌喺東京、大阪、博多等地都有分店，可能各位喺旅行時都有見過。但既然一場嚟到廣島縣，又點可以唔去參觀佢嘅總部呢？忌廉包最大嘅特色，就係包內藏滿香濃吉士醬忌廉以及高級鮮奶油忌廉，皮薄餡靚！除咗長壽款式「吉士醬味」之外，仲有小倉紅豆味及抹茶味等多種唔同款式㗎。
識玩一定係咁玩！①＆②
一、參觀忌廉包整作過程，仲可以即場試做？
位處廣島機場附近嘅「八天堂Cafelie（本店）」，係一間集café、精品店、工場以及體驗工場於一身嘅設施。遊客唔單只可以參觀工場內部，仲可以即場由職員教路、參與手作忌廉包體驗𠻹！（1000日圓、須事先預約）
二、同場再喪食其他口味！
唔好以為八天堂即係出產忌廉包，店內其實仲有出售雞蛋三文治、人氣卡通角色聯乘系列（期間限定）、廣島檸檬蛋糕、丹麥麵包（原味、紅豆口味）等多種美食，試食唔同味道都一樣咁興奮！
八天堂Cafelie
- 交通：廣島機場航廈大樓徒步約5分鐘
【第２位】記得買好蘿蔔先出發！「兔島」大久野島
瀨戶內海由多種大小島嶼組成，而當中極度值得推薦嘅，就係島波海道以西嘅「大久野島」。小島周邊長約4公里，遊客可以到島上海水浴場、露營場地、草地廣場等設施放鬆身心。由中國JR巴士營運嘅「竹原．大久野島1日觀光行程」觀光巴士定期出發，接載各位遊客往返廣島站，交通非常方便！
識玩一定係咁玩！
帶著蘿蔔去旅行！同900隻野生兔仔做friend
島上棲息著約900隻野生兔仔，所以千祈要記得喺出發前買好椰菜或蘿蔔等飼料喇！據聞「休假村大久野島」前方嘅草地係島上最多兔仔聚集嘅地位，屬一大影相位！
大久野島
- 交通：JR忠海道站徒步約5分鐘，於忠海港轉乘渡輪約15分鐘
- ※瀨戶內地區鐵路周遊券不適用往大久野島之渡輪
【第１位】發掘嚴島神社全新觀光態度
佇立於嚴島神社上嘅大鳥居隨潮漲潮退而展現唔同風貌。潮漲之時，大鳥居就如飄浮於水面上，與背面翠綠彌山及湛藍瀨戶內海形成一幅強烈色彩對比嘅風景畫；潮退之時，遊客則可以實際行到鳥居下方，全日唔同時段各有各精彩。
識玩一定係咁玩！①＆②
一、安坐獨木舟飽覽神社風光
有興趣從水上更進一步接近大鳥居嘅讀者，不妨可以考慮一下「獨木舟」呢個選擇。只需要喺海灘上接受簡單講解及划漿訓練，就即刻可以輕鬆出發，而且體驗仲設有救生衣及雨衣租借服務，完全歡迎各位兩手空空嚟參加！由下方仰望鳥居嘅宏偉姿態，唔使講都知一定夠晒呃like啦！
※大鳥居由2019年6月起正進行維修工程。截止2020年3月為止完工日期仍有特確定。
二、同宮島野生鹿合照留念
宮島上現時棲息著大概200隻野生鹿。佢哋隻隻都平易近人，所以要成功影相完全唔難！小編私心推薦由海邊影返向陸地，咁就可以影出野生鹿出現於街頭嘅有趣奇景喇。
嚴島神社
- 交通：JR宮島口站下車後到宮島口棧橋轉乘渡輪約10分鐘，於宮島棧橋徒步約12分鐘
廣島之旅老手酒店住宿推薦
各位重臨宮島嘅朋友，有無諗過爽性喺島上過一晚呢？日出、日落、夜景，宮島將會全日不間斷地帶畀你無窮無盡嘅靚景！老字號「Grand Hotel Arimoto」距離神社最近、「錦水館」以天然溫泉而聞名、「宮島Seaside Hotel」則擁有無敵靚景，每間酒店都各具特色。
廣島縣旅行必備良伴：「西遊紀行」瀨戶內地區鐵路周遊券
廣島縣有咁多值得去嘅觀光景點，係咪令到各位選擇困難症發作呢？想輕鬆穿梭各地，買定瀨戶內地區鐵路周遊券傍身就實無死！一pass在手，即包含岡山縣、廣島縣、山口縣及其他瀨戶內地區嘅新幹線、鐵路、巴士（※部分路線除外）5日無限次任搭放題，實屬第一次到瀨戶內地區嘅人必買！有關鐵路pass嘅精明用法，我哋將會喺另一篇文章內再作詳細介紹，記住多多支持喇～
瀨戶內地區鐵路周遊券詳情如下：
https://www.westjr.co.jp/global/tc/ticket/setouchi/
延伸閱讀：
岡山縣：
- 【新手適用】最強新手岡山自由行攻略！5分鐘帶你睇盡熱門觀光景點BEST 3
- 【老手適用】想發掘更多岡山「隱世」秘點？5分鐘帶你睇盡最新玩法BEST 3
- 岡山「好西」、您食過幾多樣？FUN! JAPAN私心推薦岡山縣必試美食BEST 3！
廣島縣：
- 【新手適用】最強新手廣島自由行攻略！5分鐘帶你睇盡熱門觀光景點BEST 3
- 【老手適用】想發掘更多廣島「隱世」秘點？5分鐘帶你睇盡最新玩法BEST 3
- 廣島「好西」、您食過幾多樣？FUN! JAPAN私心推薦岡山縣必試美食BEST 3！
山口縣：
岡山縣×廣島縣：
sponsored by JR西日本
Comments