廣島縣坐擁因「海上鳥居」而聞名嘅嚴島神社、港口城市鞆之浦、尾道水道及島波海道等，自然景色相當豐富。如果您去第一次去廣島旅行嘅話，都一定想知道邊啲景點最推薦吧？有見及此，FUN! JAPAN就特別向各位讀者做咗個問卷調查，而呢篇文章內，就會為大家介紹各位最想知道嘅頭3位必去熱門景點！文篇最尾嘅部分，仲會介紹埋廣島縣內交通必備嘅「西遊紀行」瀨戶內地區鐵路周遊券。各位新手，馬上mark低以下重點，嚟個既有效率又精打細算嘅廣島之旅啦！
【第３位】到JR廣島站旁邊嘅「OKOSTA」自己DIY名物「廣島燒」
「廣島燒」係廣島縣一種為人熟悉嘅地道美食。據「總務省統計局平成28年經濟CENSUS基礎調查」數據顯示，廣島縣平均每1萬人就有約5.7間廣島燒專門店，比例屬全國首位！廣島縣嘅廣島燒底部為一塊類近crepe狀嘅餅底，餅底上一般會放有椰菜等蔬菜，加上豬肉等餡餅蒸焗、並再放上蕎麥麵、雞蛋後，就可以淋上甜醬食用！如果您想多啲了解有關廣島燒嘅文化，由出產廣島燒醬汁等調味料嘅生產商「Otafuku Sauce」營運嘅「OKOSTA」就包無出錯！導師會親自落場教大家點樣做出好食嘅廣島燒，就算係新手或手殘黨都可以做出最正宗地道嘅廣島燒㗎！
必check名物
OKOSTA嘅導師除咗會教大家點樣整餅底、放餡料，以及用鍋剷剷起餅底嘅心得等，店內每一塊鐵板都會有1名導師駐守，確保可以為大家做最詳細嘅講解。DIY體驗期間，導師仲會同大家分享廣島燒嘅歷史、豆知識，甚至係只有當地人先知嘅地道資訊𠻹！距離廣島站僅2分鐘步程嘅地利亦係一大吸引之處！
追加玩法
客人可以從「魷魚天婦羅」、「蕃茄芝士」、「廣島香蔥」、「激辣辣麵」、「季節限定」共5款配料中選擇其中1款，而店舖更加會為每位體驗嘅客人送上引有「Otafuku Sauce」可愛品標logo嘅獨家圍裙同紙製廚師帽𠻹！穆斯林客人亦可選擇不含豬肉嘅魷魚･鮮蝦體驗方案「Muslim Friendly廣島燒體驗2000日圓（未含稅）」；而素食者則可選用以大豆素食取代豬肉嘅體驗方案「素食廣島燒體驗2000円（未含稅））」㗎！
OKOSTA
- 體驗時間：11：00～12：30、13：00～14：30、19：00～20：30。各時段最多40人參加（須事先預約）
- 體驗費用：「定番廣島縣體驗 附1款配料！」1800日圓（未含稅）、「廣島名物體驗套餐 試盡廣島名物」3000日圓（未含稅） 等
- 交通：JR廣島站徒步約2分鐘
【第２位】360度環迴靚景！尾道「千光寺公園」
尾道係一處面向瀨戶內海、四面環山環海嘅「斜坡之城」。而本文要為大家介紹嘅，就係位處山陽本線尾道站北邊、海拔高約144.2米「千光寺山」山頂至中腹範圍內嘅「千光寺公園」。公園內除咗有建築師・安藤忠雄著手設計嘅「尾道市立美術館」、展出咗與尾道甚有淵源嘅文人歷史嘅「尾道文學館」等著名景點外，仲係獲選為日本「櫻花名所100選」嘅賞櫻勝地嚟㗎！
必check名物
登上海拔約144米高、喺山頂附近嘅展望台的話，您就仲可以喺到眺望到尾道水道、向島、尾道大橋等360度環迴靚景！要前往展望台，從山腰乘搭纜車即可。往山頂全程只係需要3分鐘咋！
追加玩法
千光寺公園唔只日間景色醉人，夜景都一樣咁值得推薦！喺前往展望台嘅散步小徑上一邊欣賞著四周閃爍燈光，再一邊眺望遠處嘅尾道水道夜景以及新尾道大橋燈飾，浪漫氣氛保證令您留下深刻印象！千光寺山夜景亦入選「夜景100選」之一。
千光寺山纜車
- 交通：從JR新尾道舔搭往「尾道站」方向之尾道巴士約10分鐘、於「長江口」巴士站下車後徒步約1分鐘
【第１位】一網打盡2大世界遺產：原爆圓頂與嚴島神社
講到廣島縣必到嘅景點，縣內２大世界遺產—世界罕見嘅海上鳥居「嚴島神社（宮島）」以及位處平和記念公園内、原爆後殘留嘅部分建築物「原爆圓頂（廣島市）」就一定榜上有名！有興趣到以上地方觀光嘅朋友，不妨考慮由中國JR巴士營運嘅「世界遺產 廣島世界遺產定期觀光巴士」（遊覽原爆圓頂及嚴島神社）、又或附設午餐膳食嘅渡輪觀光行程。
必check名物
乘搭宮島纜車、嚟到海拔約535米高嘅彌山山上，您即可以環顧草木茂盛嘅原生林以及瀨戶內各大小島嶼。另一方面，喺平和記念公園內您則可以祈求世界和平、敲響「平和之鐘」。順帶一提，平和之鐘含有「World is One」嘅意思，鐘上刻有無國界嘅世界地圖。
追加玩法
宮島內棲息著約200隻野生鹿，而據古書記載，約820年前就有記錄顯示鹿嘅存在，可以話呢批「原居民」都已經居住咗一段相當長嘅時間。難得見到咁多咁得意嘅野生鹿，當然記得要同佢哋影返張合照啦！好運的話，您仲有機會遇上狸貓𠻹㗎！
原爆圓頂
- 交通：從JR廣島站乘搭市內循環巴士「Hiroshima maipuru～pu」約15分鐘、於「原爆圓頂前」巴士站下車徒步即達
- ※您可使用瀨戶內地區鐵路周遊券乘搭市內循環巴士「Hiroshima maipuru～pu」
嚴島神社
- 交通：從JR宮島口站下車後、到宮島口棧橋轉乘渡輪約10分鐘、從宮島棧橋徒歩約12分鐘
廣島縣旅行必備良伴：「西遊紀行」瀨戶內地區鐵路周遊券
廣島縣有咁多值得去嘅觀光景點，係咪令到各位選擇困難症發作呢？想輕鬆穿梭各地，買定瀨戶內地區鐵路周遊券傍身就實無死！一pass在手，即包含岡山縣、廣島縣、山口縣及其他瀨戶內地區嘅新幹線、鐵路、巴士（※部分路線除外）5日無限次任搭放題，實屬第一次到瀨戶內地區嘅人必買！有關鐵路pass嘅精明用法，我哋將會喺另一篇文章內再作詳細介紹，記住多多支持喇～
瀨戶內地區鐵路周遊券詳情如下：
https://www.westjr.co.jp/global/tc/ticket/setouchi/
延伸閱讀：
岡山縣：
- 【新手適用】最強新手岡山自由行攻略！5分鐘帶你睇盡熱門觀光景點BEST 3
- 【老手適用】想發掘更多岡山「隱世」秘點？5分鐘帶你睇盡最新玩法BEST 3
- 岡山「好西」、您食過幾多樣？FUN! JAPAN私心推薦岡山縣必試美食BEST 3！
廣島縣：
- 【新手適用】最強新手廣島自由行攻略！5分鐘帶你睇盡熱門觀光景點BEST 3
- 【老手適用】想發掘更多廣島「隱世」秘點？5分鐘帶你睇盡最新玩法BEST 3
- 廣島「好西」、您食過幾多樣？FUN! JAPAN私心推薦岡山縣必試美食BEST 3！
山口縣：
岡山縣×廣島縣：
sponsored by JR西日本
Comments