【老手適用】想發掘更多岡山「隱世」秘點？5分鐘帶你睇盡最新玩法BEST 3

岡山後樂園、「白牆老街」倉敷等岡山縣必去景點都已經玩過晒？唔怕！今次就等編輯部為已經去過岡山縣、但又想知道更多隱藏秘點嘅您介紹更多新玩法啦！只要事前做足功課，包保您重臨岡山之旅將會樂趣加倍！同場我哋仲會介紹埋岡山縣內交通必備嘅「西遊紀行」瀨戶內地區鐵路周遊券，一於帶埋著數pass一齊出發啦！

【第３位】於「兒島牛仔街」中心呼喚牛仔愛

除咗倉敷之外，兒島地區亦係岡山另一著名出產國產牛仔褲嘅地方。主要商店街「兒島牛仔褲街」內就林立咗約40幾間牛仔褲專門店，出售雜貨等各式各樣嘅商品，難怪全球各地嘅牛仔愛好者都要嚟到朝聖啦！喺兒島設置總公司嘅著名牛仔品牌「BettySmith」所營運嘅「Betty Smith Meseum & Village」內，遊客更加可以身處牛仔褲生產工場內體驗製作獨一無二嘅牛仔褲，由褲鈕、皮牌等細節都可以一一自由選擇。有興趣嘅讀者，記住報名參加喇！（7000日圓起、未含稅）

識玩一定係咁玩！

藍藍天空高掛…牛仔褲！？

唔單只有得玩有得買，兒島牛仔褲街亦不忘照顧遊客打卡嘅欲望，街上展示牛仔褲嘅方式一樣咁「呃like」！高掛於半空嘅牛仔褲、又或者係以牛仔褲為藍本嘅招牌等等，每一個打卡位都誓要謀殺您手機嘅記憶體！

兒島牛仔褲街

交通：JR兒島站徒步約15分鐘

【第２位】同家人朋友摘士多啤梨，一齊補充豐富維他命C！

「岡山士South Village」係一處非常適合親朋戚友摘士多啤季或提子嘅好地方。此話何解？因為呢到嘅士多啤梨既大粒、又內含豐富維他命C，對美容或健康都非常有益㗎！參加者可以從「即摘即食」或「打包帶走」2種體驗中任擇其一，享受「立食」士多啤梨嘅樂趣，重點係唔使洗就可以即食𠻹！

識玩一定係咁玩！①＆②

一、士多啤梨（冬、春）、白桃（夏）、提子（秋）…Mark實各品種收成期

先有冬天至春天嘅士多啤梨，後有夏天至秋天嘅提子，岡山市South Village內一年四季都可以摘到時令新鮮水果。士多啤梨品種包括「章姬」、「香野」等共5個品種，每個品種都各有特色㗎！

二、同場再去Road Side Market爆買產地直送蔬果

摘完水果意猶未盡的話，Road Side Market（農作物直銷場）絕對係您繼續水果之旅嘅必去地方！事關場內除咗集結各路當日由產地直送嘅蔬果，亦會出售鮮魚、肉類、便當、麵包、鮮花等多元化產品。遇上收成期時，您都可以喺呢到買到當日朝早收成得來嘅士多啤梨。

岡山市South Village

交通：JR備前片岡站徒步約7分鐘

【第１位】您知道岡山縣原來係masking tape大國嗎？

原本多用於塗裝、包裹及防漏等用途嘅Masking Tape，由於可以撕起後再用，因此近年喺年輕女性之間大受歡迎，一躍成為寫信或送禮時嘅包裝界新寵！事實上，岡山縣倉敷市就係masking tape嘅發源地，當中又以「Kamoi加工紙」出品嘅「mt」設計masking tape更係紅到幾乎全國雜貨店都可以搵到佢嘅蹤影！倉敷內嘅有多間masking tape專門店，例如mt專賣店「TANE」、坐擁4款倉敷產牌子及多達約850種設計圖案嘅「如竹堂」等等，都係粉絲必去嘅名店。

識玩一定係咁玩！①＆②

一、放滿成幅牆嘅masking tape牆飾櫃！？

作為masking tape聖地嘅名店之一，TANE當然唔會令到各位粉絲失望。嚟到坐擁多達1000款設計圖案嘅品牌店內，您會發現成幅牆都早已被膠紙佔據！櫃內每一格都放滿設計各異嘅款式，由經典定番到最新作品、又或長短闊度不一嘅款式，您都可以喺到一一搵到。您亦可以喺店內使用MT膠紙為收納箱粉飾一番（500日圓、未含稅），就算係「手殘」一族都唔使擔心，因為膠紙可以撕開再貼㗎嘛！您又無興趣自己DIY一個銀河唯一嘅masking tape收納箱呢？

TANE

交通：JR倉敷站徒步約15分鐘

二、同場再加映「如竹堂」masking tape收納箱

另一方面，同樣係倉敷masking tape名店之一嘅「如竹堂」亦有舉行週末限定嘅襟章、紙皮箱、收納箱整作體驗。如果咁啱您將倉敷行程排喺週末的話，咁就一定要記得散步途中順便去埋「如竹堂」，一邊感受藝術氣氛、一邊為自己打造獨一無二嘅紀念品啦！

如竹堂

交通：JR倉敷站徒步約20分鐘

岡山之旅老手酒店住宿推薦

倉敷美觀地區老字號旅館「料理旅館鶴形」

「料理旅館鶴形」係一間位於倉敷美觀地區中心地帶、於江戶時代後期（1744年）落成嘅老字號旅館。以舊商家改建而成嘅住宿設計，現時提供海鮮會席料理等多種住宿方案供遊客選擇。聽聞總廚曾經為JAL國內線頭等機艙設計過飛機餐，實力相當有保證！

留宿喺「特別室阿知間」內嘅客人，仲可以安坐房內就欣賞到種有400年樹齡（推測）松樹嘅日本庭園𠻹。

料理旅館鶴形

交通：JR倉敷站徒步約10分鐘

連坂本龍馬都曾經住過！老字號旅館「吉井旅館」

另一間要推薦嘅，就係位處建築物保存地區內、擁有270年歷史嘅「吉井旅館」。改建自江戶時代後期古民家嘅酒店內，現時仍然保存著幕府末期、坂本龍馬前往京都時曾經下榻過嘅客室。旅館亦提供多款季節懷石料理，包括冬季海鮮雜煮鍋及瀨戶內時令料理等。

館內設有「檜木風呂」及「高野槙風呂」，歡迎住客包場浸溫泉。

吉井旅館

交通：JR倉敷站徒步約10分鐘

岡山縣旅行必備良伴：「西遊紀行」瀨戶內地區鐵路周遊券

岡山縣有咁多值得去嘅觀光景點，係咪令到各位選擇困難症發作呢？想輕鬆穿梭各地，買定瀨戶內地區鐵路周遊券傍身就實無死！一pass在手，即包含岡山縣、廣島縣、山口縣及其他瀨戶內地區嘅新幹線、鐵路、巴士（※部分路線除外）5日無限次任搭放題，實屬第一次到瀨戶內地區嘅人必買！有關鐵路pass嘅精明用法，我哋將會喺另一篇文章內再作詳細介紹，記住多多支持喇～

瀨戶內地區鐵路周遊券詳情如下：

https://www.westjr.co.jp/global/tc/ticket/setouchi/

【老手適用】想發掘更多岡山「隱世」秘點？5分鐘帶你睇盡最新玩法BEST 3