岡山縣坐擁著因中國地方數一數二面積廣闊純白土藏而聞名嘅「倉敷」、「日本三名園之一」岡山後樂園位處嘅「岡山市」等多個著名景點。岡山縣亦因為一整年晴天日數眾多而有著「晴天之國」嘅稱號。喺呢篇文章內，FUN! JAPAN唔單只會公佈各位讀者最想知道嘅頭3位必去熱門景點，連同基本資訊及各種有趣小知識作介紹𠻹！喺文篇最尾嘅部分，我哋仲會介紹埋岡山縣內交通必備嘅「西遊紀行」瀨戶內地區鐵路周遊券㗎！
【第３位】日本首個國立公園內嘅岡山No.1觀景處ー鷲羽山
鷲羽山係一個位處日本首座國立公園「瀨戶內海國立公園」內嘅著名觀光勝地，因其突出於瀨戶內海嘅外觀有如鷲伸展羽毛時嘅姿態而被命名。從海拔高約133米嘅山頂鍾秀峰上，遊客可以欣賞到由約50個大小島嶼構成嘅絕色美景；您亦可以喺呢到飽覽橫跨岡山縣與香川縣嘅瀨戶大橋360度環迴靚景，仲可以欣賞埋獲選「日本夕陽百選」嘅夢幻日落時刻𠻹！
必check名物
想要欣賞絕景，小編建議您一定要登上山頂「鍾秀峰」。就算非專業行山經驗人士，普通遊客一樣可以喺到享受到輕鬆登山樂趣。山頂嘅「鷲羽山Rest House」及「鷲羽山遊客中心」周邊設有2座展望台，由瀨戶內海上嘅小島、橫跨岡山縣與香川縣嘅瀨戶大橋，甚至係遠至對岸嘅四國都一一可以喺到飽覽得到。
追加玩法
參觀完鷲羽山之後，下一站不妨去埋可以俯瞰瀨戶大橋・瀨戶內海嘅主題公園「巴西鷲羽山主題公園」吖♪公園內由適合小朋友玩嘅迴旋木馬，以至驚喜刺激嘅機動遊戲都一應俱全。而當中約4層樓高、建於離地16米高嘅半空單車「Sky Cycle」，就更加係驚險萬分嘅話題之作。你或者會想嘗試一邊「踩單車」一邊欣賞瀨戶大橋嘅景色，但當您望一望腳下，就肯定會被嚇到腳仔都軟埋！嫌仲未夠刺激？記得搭嘅時候坐喺外側（右邊）喇！
巴西鷲羽山主題公園
- 交通：從JR兒島站轉乘下電巴士約10分鐘，於「巴西鷲羽山主題公園前」巴士站下車徒步即達
- ※瀨戶內地區鐵路周遊券不適用於下電巴士
【第２位】於日本三名園之一嘅「岡山後樂園」體驗和風漫步
岡山後樂園係日本國內極具代表性嘅著名庭園之一，與石川縣兼樂園及茨城縣偕樂園並列為「日本三名園」。庭園佔地約14萬平方米，非常推薦大家園內漫步、又或者欣賞庭園配上背後岡山城嘅如畫構圖。庭園於1952年獲指定為「特別名勝」之一，現時每年錄得約82萬人次入場紀錄。
必check名物
園內嘅「流店」係一座全國罕見、周邊放有６塊色彩繽紛奇岩怪石嘅建築物。建築物下方不設牆壁，方便流水可以直接通過。除此之外，位處於園內大概中央位置嘅唯心山，亦係另一欣賞杜鵑花與紅葉等四季花卉嘅好地方。榮獲≪日本米芝蓮綠色旅遊指南≫3星評價嘅靚景絕非浪得虛名！
追加玩法
後樂園每年春天、夏天、秋天都會各舉行1次夜間點燈活動「幻想庭園」，當中又以秋季紅葉季節時，夜幕下散發出陣陣夢幻氛圍嘅點燈活動最值得推介。春季時，遊客亦可以到種有染井吉野櫻等約50棵櫻花樹嘅櫻林內鋪上餐墊，感受於草地上花見嘅氣氛。
岡山後樂園
- 交通：JR岡山站徒步約25分鐘
【第１位】到倉敷尋找大眾嚮往嘅懷舊日本
倉敷川上往來嘅木船輕舟、純白牆壁連綿嘅土藏、古民家林立嘅小鎮老街…倉敷美觀地區嘅觀光元素實在係多不勝數！本屬江戶幕府直轄地嘅倉敷係一處匯聚鄰近地區名產嘅聚散地，因此現時倉敷川畔兩旁仍殘留著唔少江戶或明治時代建成嘅町家或土藏，更獲國家指定為「歷史建築物保存地區」之一。區內部分建築物經改建後，現時已開放畀公眾參觀，有興趣嘅朋友記住mark低喇！
必check名物
作為國產牛仔褲生產、銷售重鎮之一，難得一場嚟到倉敷市，又點可以錯過當地牛仔褲生產商直銷店聚首一堂嘅倉敷牛仔街呢？唔單只係牛仔褲，店內亦有筆盒、化妝袋、和服等選用咗牛仔素材嘅精品出售，非常適合買返香港做手信呀！
追加玩法①＆②
一、坐上川舟．人力車、踏上時空之旅
識得玩倉敷嘅，一定係體驗川舟遊！坐上古色古香嘅手划小船，由船夫帶您悠閒地穿梭於白壁小鎮內，情景就有如重返江戶時代一樣！「遊船河」之外，乘坐人力車亦係一個唔錯嘅選擇，重點係坐上人力車後視角比平常更高，遊客可以一嚐有別於普通散步嘅感覺、細賞古舊建築物與倉敷川。
二、藍色漢堡包同藍色豬肉包！？牛仔主題奇怪美食大集合！
嚟到倉敷牛仔街內，您會發現街上充斥著各種「牛仔褲」相關美食。不論係採用藍色麵包皮嘅「牛仔褲豬肉包」或「牛仔褲漢堡包」，又或者全身漸變藍色嘅「牛仔梳打」，雖然外表絕對會震撼您嘅視覺，但保證味道一啲都唔失禮！行街時一路打卡一路食就啱晒啦！
倉敷美觀地區
- 交通：JR倉敷站徒步約8分鐘
岡山之旅新手酒店住宿推薦
瀨戶大橋．瀨戶內海招牌360度全景！「岡山倉敷WASHU BLUE RESORT 風籠 KASAGO」
位於鷲羽山山丘上嘅「岡山倉敷WASHU BLUE RESORT 風籠」以瀨戶內靚景自居，而且仲係附近地區內唯一一間坐擁天然溫泉嘅住宿設施（「蜂蜜珍珠浴池」係必浸！）。晚餐時段主打日西合璧自助餐並起用瀨戶內海豐富食材製成各種佳餚甜品，當中又以和食廚師負責嘅配菜料理及於客人面前即席烹調嘅開放式廚房成為各大媒體報導對象。以國產牛仔褲發源地「兒島」為設計概念嘅藍色主題房「鷲羽閣牛仔客房」亦係必check名物之一！
岡山倉敷WASHU BLUE RESORT 風籠
- 交通：JR兒島站開車約7分鐘
岡山縣旅行必備良伴：「西遊紀行」瀨戶內地區鐵路周遊券
岡山縣有咁多值得去嘅觀光景點，係咪令到各位選擇困難症發作呢？想輕鬆穿梭各地，買定瀨戶內地區鐵路周遊券傍身就實無死！一pass在手，即包含岡山縣、廣島縣、山口縣及其他瀨戶內地區嘅新幹線、鐵路、巴士（※部分路線除外）5日無限次任搭放題，實屬第一次到瀨戶內地區嘅人必買！有關鐵路pass嘅精明用法，我哋將會喺另一篇文章內再作詳細介紹，記住多多支持喇～
瀨戶內地區鐵路周遊券詳情如下：
https://www.westjr.co.jp/global/tc/ticket/setouchi/
延伸閱讀：
岡山縣：
- 【新手適用】最強新手岡山自由行攻略！5分鐘帶你睇盡熱門觀光景點BEST 3
- 【老手適用】想發掘更多岡山「隱世」秘點？5分鐘帶你睇盡最新玩法BEST 3
- 岡山「好西」、您食過幾多樣？FUN! JAPAN私心推薦岡山縣必試美食BEST 3！
廣島縣：
- 【新手適用】最強新手廣島自由行攻略！5分鐘帶你睇盡熱門觀光景點BEST 3
- 【老手適用】想發掘更多廣島「隱世」秘點？5分鐘帶你睇盡最新玩法BEST 3
- 廣島「好西」、您食過幾多樣？FUN! JAPAN私心推薦岡山縣必試美食BEST 3！
山口縣：
岡山縣×廣島縣：
sponsored by JR西日本
Comments