「東京大神宮」- 讓你結人緣、尋找真愛

五大神社之一以戀愛聞名

東京大神宮喺東京五大神社之一，亦係以祈求戀愛運而聞名嘅神社，平日總係香火不斷，正月新年嚟呢到參拜嘅人潮更加係大排長龍。

東京大神宮起初為明治時期時，作為伊勢神宮遙拜殿所建造嘅神社，亦係最早開始進行莊嚴又隆重嘅神前結婚式起源地。

喺神社入面，除咗有祀奉日本皇室嘅始祖「天照皇大神」，同掌管農業、衣、食、住嘅「豐受大神」之外，仲有祭祀侍奉「天照皇大神」嘅「倭比賣命」，同埋掌管天地萬物運作結緣嘅「造化三神」，呢個亦係點解咁多人嚟東京大神宮祈求良緣嘅原因。

東京大神宮唔單止提供可以祈福嘅繪馬，同埋御朱印收集，仲可以依照自身需求，申請進行祈禱儀式，最特別嘅係，呢度仲有可將寫咗心願嘅書信傳達畀神明知道嘅祈願服務呢！

因為係以提升良緣而聞名嘅神社，所以也有好多別緻嘅御守，例如結緣用嘅「鈴蘭御守」，仲有祈求可以打開對方心窗，唔使再單戀嘅「幸福之鑰御守」，同埋畀你同心上人一人一隻嘅「結緣幸福小槌」，全部都好受歡迎。

東京大神宮嘅神籤亦相當有特色，唔只有印上花卉圖案嘅「花籤」，仲有附上可愛人形娃娃嘅「戀愛籤」。

另外，仲有為咗港台參拜者特別設計嘅，繁體中文「幸運結緣神籤」，因為係請專業人士翻譯嘅中文，所以內容上相當容易理解，而呢款神籤裡面仲有附上一個刻上花紋嘅小吊飾，可以帶住係身做紀念。

東京大神宮不單止喺日本民眾會去，仲有好多知名嘅藝人都會嚟呢到參拜（可能係增加觀眾緣），如果想要祈求好人緣同埋增強戀愛運嘅話，嚟到東京就唔可以錯過呢度啦！