大相撲係日本最古老嘅運動之一。髮型扎住傳統髮髻，全身只著一條「兜襠布（Mawashi，廻し）」嘅大相撲選手「力士」，喺圓形擂台嘅「土俵」上進行比賽，比賽嘅勝負結果會反映喺「番付」上，即係大相撲選手嘅排名表。今次我地一齊深入淺出咁介紹相撲呢個而家仍然大受歡迎嘅傳統運動，一齊學習佢嘅比賽規則，同埋探討佢嘅魅力。
相撲係乜嘢？「相撲」同「大相撲」有咩分別？
全身只穿著一條「兜襠布（廻し）」嘅相撲選手，喺直徑4.55米，稱為「土俵」嘅圓形擂台上進行格鬥技嘅比賽，呢個亦係日本神道嘅一個重要儀式。如果將對手推到土俵之外，或令對手腳掌以外嘅身體任何一部份碰到地面，咁就算獲勝。大型相撲比賽一年舉行6次，每次為期15日。相撲每次比賽稱為「場所」，東京每年舉行3次「場所」，而大阪、名古屋及福岡則各舉行1次「場所」。喺一次「場所」入面比賽對決中獲勝最多嘅力士，就係「場所」嘅優勝者，比賽結果排名，會寫喺相撲排名表「番付」上面。有時見到寫相撲，有時寫大相撲，佢嘅分別在於「相撲」係指運動整體，而「大相撲」就指由日本相撲協會主辦嘅職業相撲比賽。
相撲嘅起源、歷史
相撲早喺日本神話中就出現，係古代一種祈求五穀豐收嘅祭典儀式。之後足足有300年，相撲係宮中專門為天皇表演嘅「相撲節會」。而去到12世紀至16世紀末，相撲成為武士訓練嘅一部分。由江戶時代開始，相撲成為一種受歡迎嘅大眾娛樂。最初係為咗籌募興建同修復寺廟嘅資金，而開始咗「勸進相撲」比賽。勸進相撲亦係現代大相撲比賽嘅源頭。相撲嘅「入場儀式（土俵入り）」、髮髻、「兜襠布（廻し）」、「取組（力士分組對戰表）」等等，都係延續江戶時代嘅方式。換句話說，透過現代嘅相撲，其實係直接睇到以前江戶時代嘅文化，係一個相當珍貴嘅存在文化。
根據對賽結果嘅「番付」決定大相撲嘅階級
相撲階級以「番付表」嚟表示。呢個番付表反映咗相撲選手每場比賽嘅結果。
最高階級係「橫綱」，跟住係「大關」，接落嚟係「關脇」、「小結」同「前頭」。「前頭」以上稱之為「幕內」力士。
「前頭」以下就係「十兩」、「幕下」、「三段目」、「序二段」同「序之口」；「十兩」以上係稱為「關取」嘅職業力士。
每個階級分為東西兩組，同一階級中，東組地位比西組高。
大相撲嘅魅力
大部分嘅格鬥比賽，通常依參賽者體重嚟分組，但係相撲比賽並無用身高體重分組。當然，身高較高或體重較重嘅選手係比較有利，但亦有好多身型較細嘅力士，以技巧可以戰勝體型高大嘅力士，呢種場面係相撲其中一個吸引點。另外係相撲台上，力士們互相肉搏同埋靈活嘅攻擊技巧，亦係觀看相撲比賽嘅樂趣之一。
Comments