位於岩手縣平泉嘅毛越寺為日本國家特別史蹟、特別名勝，並獲登錄為世界遺產，可謂東北旅行必去景點之一。寺內至今依然保留著淨土庭園，伽藍遺蹟寺院更擁有悠長歷史，而本文就將會為大家介紹廣闊佔地內值得欣賞嘅必推重點！
關於毛越寺
毛越寺係一間由慈覺大師於嘉祥3年（850）開創嘅寺院，歷史相當悠久。據講最興盛之時，佛堂佛塔數目多達40棟、僧侶人數多達500名，係一間頗具規模嘅寺院。遺憾嘅係所有建築因遭受多次災害皆已被燒毀，僅剩以大泉池為中心嘅淨土庭園以及平安時代伽藍遺跡完整被保留至今。
毛越寺推薦之處1 東北地區屈指可數著名庭園「淨土庭園」
位處金堂前方嘅淨土庭園圍繞廣闊大泉池規劃設計，相傳過往曾有一座連接池邊與池中央中島嘅橋樑。池畔營造出海岸風景，而其他地方則融入山水景觀，位於水池東南邊嘅岩石海岸風格「出島」，更係堪稱庭園最靚嘅景色之一。每年10月下旬為觀賞楓葉最佳時期。
毛越寺推薦之處2 寺內供奉平安時代藥師如來本尊
於1989年建造嘅本堂沿襲平安時代建築風格，內裡主要供奉平安時代嘅藥師如來，每月8日早上10點至下午3點期間都歡迎善信進內參拜（須詢問寺方人員）。另外，本堂亦接受10人以上團體事前預約報名參加坐禪體驗。
毛越寺推薦之處3 33年公開一次秘藏佛像嘅「常行堂」
茅草屋頂嘅常行堂內供奉著秘藏佛像「摩多羅神」，即自古以來掌管農作物、深受民眾敬仰嘅神明。佛像每33年會被公開一次，下次公開參觀為2033年。
毛越寺推薦之處4 溪蓀鳶尾美麗盛開「菖蒲園」
寺院內嘅菖蒲園每到6月下旬至7月上旬，都會有紫色、黃色、白色溪蓀鳶尾花爭奇鬥艷、綻放美麗風情。6月20日至7月10日期間，官方更會舉辦「毛越寺溪蓀鳶尾祭」，屆時大泉池池畔周圍會約有300種、合計約3萬株花菖蒲（玉蟬花）盛開。紫色、黃色、白色等鮮豔色彩繁花與深綠淨土庭園形成強烈視覺對比，此景實屬不容錯過！
毛越寺推薦之處5 曲水之宴&二十日夜祭
云云毛越寺例行活動中，編輯部特別推介以下2個祭典。首先第一個係5月第4個星期日舉辦嘅「曲水之宴」，參加者會於遣水（池水）擺上酒杯、讓酒杯隨波漂流並一同唱詠和歌，重現平安時代嘅優雅遊戲。男性歌者身穿衣冠、狩衣，女性則穿上袿衣、十二單等服裝，感覺就彷彿重返平安時代！
第二個祭典，則係1月14日至20日舉辦嘅新春祈禱—常行堂「摩多羅神祭」。祭典最後一日（1月20日）被稱為「二十日夜祭」，為祈求諸事平安、驅病消災、家宅安全，正逢厄年（犯太歲）嘅男女老幼將會手持火把組成獻膳隊伍，列隊繞行常行堂，並獻上白蘿蔔、白菜等貢品。
關於寺院
- 建立年：嘉祥3年（850年）
- 主要供奉：藥師如來
- 祭典：元旦參拜（1月1日）、春天藤原祭（5月1日～5日）、毛越寺菖蒲祭（6月20日～7月10日）、萩祭（9月15日～30日）等
景點資訊
- 景點名稱：毛越寺
- 地址：029-4102 岩手縣西磐井郡平泉町平泉字大澤58
- 交通方式：從一之關站乘搭JR東北本線電車，車程約9分鐘，至平泉站下車之後徒步約7分鐘。
- 語言：
- 官方網站提供英文、韓文、繁體中文、簡體中文、泰文
- 當地宣傳冊提供英文、韓文、繁體中文。
- 門票：500日圓
- 公休日：全年無休
- 開放時間：8: 30～17: 00 (11月5日～3月4日為 8: 30～16: 30)
Comments