位於岩手縣平泉嘅中尊寺係象徵奧州藤原興盛之下所發展「黃金文化」嘅豪華寺院，奧州藤原為平安時代後期統治東北一帶嘅豪門貴族。中尊寺喺2011年被認定為世界文化遺產，所以好有話題性。呢篇文章內容會為大家介紹中尊寺嘅必睇重點。
中尊寺觀光重點1 貼滿金箔 閃閃發光「金色堂」
創立於天治元年（西元1124年）指定為國寶「金色堂」。名符其實，由外面到入面都貼滿金箔，金光閃閃，喺安置神像嘅本殿（内陣）仲裝飾咗好多由絲路傳入嘅夜光蠑螺所製造嘅貝殼鑲嵌、象牙同寶石鑲嵌，成個金色堂，就好似一件美術工藝作品！放置神像嘅須彌檀，正中央供奉住釋迦牟尼佛，喺佢嘅兩側係大勢至菩薩、六尊地藏菩薩、持國天王、增長天王。呢種咁史無前例嘅佛像擺設，中尊寺係唯一一間，而且仲保留咗創建當時嘅原貌。由於喺新覆堂入面，要隔住玻璃嚟觀賞。
中尊寺觀光重點2 中尊寺祕寶收藏地「讚衡藏」
2000年新設嘅中尊寺寶物館，入面珍藏咗超過3000件館藏，包括有佛像、經典、奧州藤原氏嘅陪葬品等國寶在內。喺館藏當中，有幾件珍藏非常值得細細鑑賞，例如飾品「金銅髮鬘」，透明刻劃出寶相花紋點綴，左右對稱嘅人面鳥—迦陵頻伽雕刻，據說人面鳥迦陵頻伽居住喺極樂世界。另外仲有國寶「金光明最勝王經 金字寶塔曼荼羅」。一共有10卷嘅《金光明最勝王經》，每一卷都有一張表層，可以見到用金泥描繪畫嘅一座寶塔，釋迦牟尼佛位於塔中宣揚佛法，講授佛經之姿態。
中尊寺觀光重點3 品茶處「茶室 松壽庵」
位於本堂旁邊嘅茶室。喺昭和43年（1968年）由松下幸之助捐贈畀寺院。喺入口櫃台可以買1000日圓茶券，然後喺茶室品嘗抹茶同埋和菓子。
中尊寺觀光重點4 為金色堂遮擋風雪「舊覆堂」
據說係為咗幫金色堂遮蔽風雪，而喺正應元年（1288）創建「舊覆堂」。好多歷史人物，例如知名俳諧詩人松尾芭蕉、戰國武將伊達政宗以及明治天皇，都曾經經過呢度進堂，參拜金色堂。
中尊寺觀光重點5 幾時去都得！春夏秋冬魅力無窮
駒形山上種植咗約3000棵櫻花樹，西行櫻森林盛開櫻花，吸引到好多到訪。喺7月中旬至8月中旬呢段夏天期間，走入金色堂同讚橫藏之間嘅小路，去到盡頭轉左，就可欣賞漂浮喺一湖池水上嘅「中尊寺蓮花」綻放風采，非常美麗。秋天順著大日堂去到金色堂嘅參拜道路上一片楓紅，美不勝收，而到冬天就有白雪妝點伽藍，更加唔可以錯過。
關於中尊寺
- 建立年：嘉祥3年（西元850年）
- 主要供奉：釋迦牟尼佛（主殿）
- 祭典： 節分會（2月初）／春天藤原祭（5月1日～5日）／薪能（8月14日）／菊祭（10月20日～11月15日）／秋天藤原祭（11月1日～3日）等
景點資訊
- 景點名稱：中尊寺
- 地址：〒029-4102岩手縣西磐井郡平泉町平泉衣關202
- 交通方式：從平泉站徒步走至中尊寺的表門「月見坂入口」約20分鐘。如果有預計到訪中尊寺附近的景點（如毛越寺等），建議租車或搭乘公車。
- Wifi：有免費WIFI
- 語言：官方網站提供英文、繁體中文、簡體中文。當地簡單宣傳冊有英文、韓文、繁體中文、簡體中文、西班牙文、法文、義大利文、葡萄牙文、泰文、德文、俄文。
- 門票：入場券800日圓（可參觀讚衡藏、金色堂、經藏、舊覆堂）
- 休假：全年無休
- 入場時間：3月1日〜11月3日：8:30～17:00、11月4日〜2月底：8:30～16:30（入場門票喺10分鐘前截止）
Comments