丸岡城係一座位處福井縣坂井市內嘅古城。城堡建於1576年，並擁有日本最古老構造嘅現存天守閣。相傳古時敵軍進攻丸岡城時，突然出現一條大蛇吐出大片「霞」（煙霧）保衛城堡，因此丸岡城亦擁有「霞城」嘅別稱！
丸岡城必睇之處
丸岡城屬於日本百大名城之一，天守閣被指定為「日本國家重要文化財」之一，其建築樣式堪稱日本現存天守閣中最古老（現存天守閣即日本全國現存12座武士城池天守閣之統稱）！貴為現存天守之一，丸岡城天守閣被視為係城郭建築史上嘅重要建築，有別於其他日本城堡，丸岡城天守閣更係現存天守閣當中唯一屋頂上鋪有石瓦嘅珍貴建築呢。
如何欣賞丸岡城建築
丸岡城坐擁日本現存天守閣中建築樣式最古老嘅嘅天守閣，因此下次參觀嘅時候不妨可以多多留意佢嘅建築吖！
支撐著天守閣嘅城牆嘅最大特色，係用上「野面堆積法 (野づら積み)」建築方式。石牆由未加工過、大小不一嘅石頭直接堆砌形成，雖然石牆上會留有多條縫隙，但亦因此擁有極佳排水功能，可以有效抵抗大雨。
丸岡城外觀亦非常罕見。天守閣採用「望樓型」結構，屋頂上建有一個兼具有瞭望與守衛功能嘅塔樓。塔樓外牆上設有多個細窿，窗戶採用有如懸垂式嘅向外突出嘅構造，外觀獨具特色。另一方面，丸岡城內部亦係不容錯過。城堡內部到處都設有防禦設備，例如係外牆上稱為「狹間」嘅細窿隙縫、向外突出嘅懸垂式窗戶「石落」，以上兩者都係為射擊炮箭或投擲石頭而建造。從天守閣望樓，您可以眺望到四周無遮蔭景色，享受極具開揚感嘅風光景致。
丸岡城著名祭典活動
丸岡城於春季、秋季期間都會舉辦祭典活動。
丸岡城櫻花祭於每年4月1日到20日舉行（2021年3月31日至4月20日）。入夜後，種於城堡周圍嘅約400棵吉野櫻會被300盞燈籠燈泡照亮，與配合活動點燈嘅城堡於燈光映照之下與粉紅色櫻花互相映襯於夜空中，場景極為壯麗。櫻花夜間點燈舉行期間嘅週末，場內亦會舉行活動及農產品市集。
而10月舉行嘅「丸岡古城祭」，就以「時代行列」巡遊最值得留意。穿戴人手製作盔甲及頭盔、扮成武將嘅巡遊隊伍將與日本傳統工藝製造嘅巨型人偶「機關人偶 (からくり人形)」山車一同於丸岡城周邊巡遊，熱鬧非凡。
熱門賞櫻影相打卡景點
丸岡城被日本庭園式「霞城公園」包圍。獲入選「日本賞櫻名所100選」嘅公園每逢春天都大約會有400棵吉野櫻盛開，係當地一個絕佳影相景點。搵啱角度的話，您仲可以拍出櫻花與天守閣同框嘅靚相𠻹！
霞城公園亦同時被選為「日本歷史公園百選」。於庭園花草樹木襯托之下，丸岡城更顯唯美。
關於丸岡城
建造年份：1576年
- 祭典活動：丸岡城櫻花祭（4月1～20日）、丸岡古城祭（10月第2個週六及週日）
景點資訊
名稱：丸岡城
- 地址：〒910-0231 福井縣坂井市丸岡町霞町1-59
- 交通方式：JR福井站→[京福巴士縣立醫院丸岡線 / 大和田丸岡線]約50分鐘→丸岡城巴士站徒步約1分鐘
- Wi-Fi：有（Sakai free Wi-Fi）
- 語言：繁體中文、簡體中文、英文
- 購票方式：現場購票
- 信用卡：不可使用
Comments