「MINI STOP」係繼日本便利店業界3大企業後於國內分店數量排名第4大嘅便利店。品牌設立於1980年，為AEON(永旺集團)旗下便利店企業，其後於首都圏、東海地方等地開設店舖並發展其便利店業務。近年版圖唔只係日本國內，更擴展到韓國，菲律賓，中國，越南等地，國內外共超過5,000間分店。從「MINI STOP」命名以及彷如一間屋嘅LOGO設計中，你多少都可能會意會到箇中品牌理念—「街角上你嘅休憩地方」。但其實佢最初嘅名字構思係「MinuteStop」，為咗令大家對品牌更有親切感、更容易發音，先至改名縮寫為「MINI STOP」㗎！
※本篇文章資料為2019年10月時情報為準
「MINI STOP」唔只係便利店咁簡單！
「MINI STOP」嘅特色莫過於始從1980年開業以來店內均設有內用座位區，更係便利店設置飲食休息區嘅始祖。再加上「組合商店 (コンボストア) 」(便利店X速食店合併)嘅營運模式、即磨即沖新鮮咖啡・生啤酒、又或引進自助收銀機等自助式營運，「MINI STOP」多年嚟一直嘗試唔同嶄新經營理念。喺對「MINI STOP」有初步了解過後，跟住落嚟當然要就介紹一下「MINI STOP」嘅人氣產品啦！
「MINI STOP」 2大人氣必食暢銷商品：「軟雪糕」＆「HALOHALO」
去日本便利店尋找美食是常識吧！講到「MINI STOP」,一定會諗起曾獲「最高金賞獎」嘅呍呢嗱軟雪糕！只要付出220円，你就可以立即享受到北海道產嘅新鮮牛奶・鮮奶油加日本國產蛋黃等出色嘅搭配而成嘅「MINI STOP」軟雪糕。簡直係以桐板價錢獲得最優質嘅享受呀！
自1980年開始發售以來，軟雪糕除咗王牌嘅「呍呢嗱味」之外，仲有其他口味不定期登場。過去曾經推出過「青森蘋果」,「可爾必思（カルピス）」,「抹茶」等多種新口味。
而且你知道嗎？當你喺享受梗「最高金賞獎」軟雪糕嘅同時，亦有可能已為公益出咗一分力。從1991年開始，「MINI STOP」開始使用軟雪糕中一部份收益去支持「花之輪運動」。贈出花幼苗予小學，務求令小朋友們親身體驗種植後更懂得生命重要性，仲可以順便綠化校園同埋教室𠻹。
「MINI STOP」另一熱銷甜品「HALOHALO」果實冰系列係一款於1995年發售嘅展壽產品。由泡冰+軟雪糕組合而成嘅「HALOHALO」係菲律賓具有代表性嘅刨冰甜品，名稱亦係取自他加祿語(菲律賓國家語言之一)偕音，有「混合」嘅意思。啫喱、軟雪糕、刨冰嘅夢幻搭配，令人喺夏日炎炎下都想咬一啖呀！（每年5月～9月期間發售）
MINI STOP創新概念！一齊嚟融入café元素嘅 cisca「飲番杯」啦！
cisca係屬於「MINI STOP」全新概念嘅便利店模式，於2014年9月開設全國首家分店。「cisca」命名源自於city small café英文縮寫，集「café」、「熟食」、「食品雜貨」於一身。嶄新經營模式主張顧客於店內自選食物飲料，到收銀檯付款時店員就會將食物飲品換上餐盤，杯子等器皿供店內用餐之用。
店裡酒品類以及食品類項目獨特繁多，由罐裝啤酒、罐裝燒酒、到葡萄酒都應有盡有，而且精緻下酒菜同小食等通通都以便利店價錢即可入手，簡直就係以便利店價錢，就可以擁有café般嘅享受!
傳統便利店「飲食休息區」化身成café般優雅別緻，就算係女性獨自一個都可以輕輕鬆鬆入去飲番杯㗎！
cisca1號店位於東京日本橋。正至2019年為止，品牌已經喺以東京為首嘅地區開設咗5間店鋪，一步步掀起便利店業界嘅一場革命。喺便利店內飲著杯居酒屋嘅「生啤酒」，感覺係咪好不可思議呢？
Comments