講起LAWSON，相信會有好多人諗起佢個藍底白色鮮奶罐嘅標誌。LAWASON係日本三大便利店之一(大概有15000間分店) ，去日本旅遊嘅遊客，亦好多時會去到嘅其中一間便利店。有關佢個標誌嘅由來，據說最初係嚟自美國嘅J.J. Lawson經營嘅牛奶舖，之後慢慢賣埋日用品等生活必需品嘅店舖，最後發展成現代嘅便利店形式。喺LAWSON可以買到又平又好食嘅日本甜品，相信有唔少遊客都對佢個特級瑞士卷蛋糕(Premium Roll Cake)回味無窮。我地一齊嚟睇吓LAWSON有啲咩嘢特徵同魅力喇！
由賣牛奶開始嘅LAWSON
由美國一間小小嘅賣牛奶店舖開始嘅LAWSON，喺1975年於日本大阪府開咗第一間分店「櫻塚店」。發展至今，除咗一般嘅便利店之外，仲有唔同嘅分線例如「NATURAL LAWSON」同「LAWSON STORE 100」等，都係LAWSON嘅特色之一。「NATURAL LAWSON」比起一般嘅LAWSON唔同，佢針對生活中重視美同健康嘅人，提供對環境生態好嘅新鮮食材，同埋其他豐富嘅健康、自然產品。另一方面，「LAWSON STORE 100」就好似一間小超市咁，全部新鮮食品、配菜、日用品等，都可以用100円(未連稅)就買到。將便利店嘅方便加埋100円店嘅扺買價，對於主婦或者獨居嘅人嚟講，係非常方便有用。
現代生活中無佢唔得嘅LAWSON商品同服務
LAWSON為咗對應唔同顧客嘅需要，提出咗好多唔同類型嘅服務。例如，對於現今年青人嚟講，最驚嘅就係手提電話無電吧。但請你可以安心，只要你附近有LAWSON嘅話，就可以用佢嘅「Mobile Battery Share」借電池服務(暫時只有東京都內嘅部份店舖有提供此服務)！另外，喺東京都、福岡縣、大阪府嘅部份店舖，甚至提供單車租借服務，讓大家可以慢慢咁踩單車遊覽日本嘅街道。更加厲害嘅係佢提供交收鎖匙服務，方便民宿Check In，又或者有咩急事起上嚟，可以交低鎖匙畀朋友，就可以利用呢個咁方便嘅服務。
對於太忙無時間嘅上班族同主婦嚟講，呢個「LAWSON FRESH PICK」服務就好貼心好方便。用咗佢就可以揀晚飯餸菜同埋成城石井（超市）嘅甜品，喺LAWSON拎成個晚飯套餐。
LAWSON賣嘅商品當然好豐富，但最推介嘅就係甜品。尤其係LAWSON嘅自家品牌「Uchi Café」，每星期都會推出新商品，最近除咗將原有嘅商品開發新口味之外，仲會同唔同嘅品牌合作，推出crossover嘅產品。例如同著名朱古力品牌Godiva嘅crossover甜品，就每次推出都成為熱門話題，喺非常受歡迎嘅人氣系列之一。仲有日本好出名嘅「PABLO」芝士撻、Snoopy和菓子等甜品，無輪邊款都非常高品質。而「NATURAL LAWSON」亦都有自己品牌嘅零食，係可以醫肚嘅同時都照顧健美需要嘅零食系列。
至於熟食方面，LAWSON叫「炸雞君」嘅炸雞食品，出名又脆又有肉汁。而且仲有好多唔同口味，係無論食幾多次都想再食，長賣長有嘅人氣產品。
有呢個服務好開心！LAWSON體貼旅客服務
LAWSON嘅店補入面除咗提供無線WIFI之外，佢入面嘅ATM提款機仲係可以對於日本國外嘅銀行卡同埋信用卡，照樣可以拎到日本円現金。而且部份店舖仲提供外幣兌換服務，甚至即場免稅。而且佢有部非常方便嘅多功能「Loppi」，透過「Loppi」可以買到交通券、主題公園入場券、演唱會飛、電影飛。真係只要去LAWSON就可以解決哂所有日本旅行嘅煩惱！特別要提嘅係呢度可以買到三鷹之森吉卜力美術館嘅門票，日本嘅便利店只有呢度買得到，宮崎駿粉絲記住唔好錯過！
與別不同嘅LAWSON店舖
LAWSON唔止係便利店咁簡單。佢係為咗令近鄰嘅人生活嘅更方便，而提供好多唔同服務嘅店舖。例如佢會同書店或者洗衣舖合作，喺神奈川縣嘅宿河原駅前店又會有同川崎市藤子不二雄美術館一齊推出人氣公仔嘅周邊商品；而喺兵庫縣西宮甲子園9番町店就有同職業棒球隊「阪神TIGERS」合作嘅店舖。真係有好多唔同特色嘅店舖。
下次去日本時，可以試吓去附近嘅LAWSON分店睇下，話唔定會有新發現！
Comments