對於現代人嚟講，生活中唔可以無嘅，除咗電話同錢之外，相信就係便利店。尤其係日本嘅便利店，成為咗去日本旅行時必去嘅「人氣景點」之一。睇返日本便利店嘅市場佔有率，最大佔有率係7-Eleven，截至2019年7月，7-Eleven喺日本國內大概有21,000間分店，而且喺2019年7月11日終於喺沖繩開咗首間分店，而家全日本所有都道府縣都可以搵到7-Eleven嘅分店。大家知唔知7-Eleven嘅標誌顏色係代表咗乜嘢？「橙色＝日出」、「綠色＝綠洲」、「紅色＝晚霞」，代表住由朝到晚都好似顧客嘅綠洲咁樣。咁不如我地一齊睇吓日本7-Eleven有咩魅力啦！
喺美國誕生嘅7-Eleven
7-Eleven係喺1927年於美國誕生，最初係賣冰嘅小舖頭。當時家庭電器同埋雪櫃等仲未普及，所以大家日常生活中要去「冰店」買冰。除咗賣冰之後，仲應因顧客嘅需求，而開始賣埋雞蛋、牛奶、麵包等。而隨住時代嘅轉變，顧客嘅需求要增多，去到1946年時就因為顧客需要，變成每日由朝早7點開到夜晚11點嘅連鎖店。去到1974年，仲喺東京都江東區嘅豐洲，開咗第一間日本7-Eleven添。
日本7-Eleven嘅商品同埋服務特色
日本嘅7-Eleven所提供嘅商品服務非常豐富。包括有免費WIFI(7SPOT)，喺東京都23區內嘅部份店舖，仲有24小時會員制嘅洗衣服務。而喺東京都、埼玉縣同神奈川縣嘅指定店舖，仲設置有宅配LOCKER，可以用嚟收受寄畀自己嘅宅急便。對於鍾意上網買嘢嘅人嚟講，係非常方便嘅服務。
仲有最近流行嘅「共有單車」服務。只要登記咗做會員，就可以借單車代步。雖然而家只有東京都、埼玉縣、大阪府同埋宮城縣嘅一啲指定分店先有呢個服務，但如果將來普及到全日本嘅話，相信會對觀光客嚟講好方便，可能會多咗一個踩單車觀光嘅旅遊方式選擇。
日本嘅7-Eleven售賣嘅貨品種類好豐富。除咗一般嘅品牌商品之後，仲有自家品版「Seven Premium」。Seven Premium嘅雪藏食品、雪糕、常溫食品同加工食品種類非常豐富。例如有Seven Premium嘅普通零食種類，大概每款都只係100円左右，非常易買得落手仲備有好評。而且仲有提供好多美味嘅熱食，例如「七仔炸雞」、「美式熱狗」、雞串燒等可以食飽肚嘅小食。另外仲有以提咖啡為主嘅Seven Café，好多唔同融入日常生活嘅服務選擇。
遊客、飯絲都好開心嘅Crossover商品
日本嘅7-Eleven亦都有好多Crossover嘅品牌合作計劃。例如同偶像組合關8、乃木坂46等嘅合作，亦有同電影、動漫作品宣傳嘅合作，推出相關嘅特別商品，同埋抽獎。相信有好多人都期待唔知下次會有嘅乜嘢合作計劃呢？
另外同化妝品牌合作嘅商品，亦係 7&I Group 限定。例如FANCL同 7&I 共同開嘅「Botanical Force」商品亦係其一。最嚟做手信就最啱。另外，為咗迎合遊客需要，有部份分店於店內提供免稅(退稅)服務。另外喺7-Eleven舖頭入面，仲有設置Seven Bank嘅ATM自動提款機，用外國發行嘅現金卡或者信用卡，都可以拎到日本円出嚟。
日本各地唔同嘅7-Eleven亦值得關注！
介紹咗咁多日本7-Eleven嘅服務同商品，係咪有啲想去呢？其實日本嘅7-Eleven好多時為咗融入當地嘅景色同風格，亦會作出相應配合嘅特別裝修。例如喺伊豆下田嘅7-Eleven店舖就用咗啡色為主色，而為咗更有時尚感，仲以白色嘅文字配以黑色嘅外框。嚟日本旅行時，可以留意吓唔同店舖嘅設計，話唔定會發現啲意外收鑊。
Comments