福井縣東尋坊經歷海浪長年累月侵蝕，形成高低差超過20米、延綿不絕嘅陡峭懸崖峭壁絕景。其地質景觀「輝石安山岩柱狀節理」非常稀有，全世界只有三個地方可以欣賞得到，而東尋坊就係其中之一！東尋坊更被指定為日本國家天然紀念物，係一個充滿震撼魄力嘅地方！
東尋坊與作惡多端僧侶之傳說
「東尋坊」呢個地名，據講係來自平泉寺一位名叫東尋坊嘅僧侶。東尋坊平時作惡多端，因此引來其他僧侶不滿。話說東尋坊與同樣為平泉寺僧侶嘅「真柄覺念」，同時愛上一位名叫「綾姫」嘅姑娘，雙方爭風吃醋之下，真柄覺念與其他僧侶就打算聯手加害東尋坊。1182年某日，平泉寺僧侶們就相約東尋坊到三國海邊飲酒，真柄覺念趁東尋坊飲醉時將他推下懸崖致死，豈料原本平靜嘅海面，就因東尋坊陰魂不散而突然刮起狂風暴雨並足足持續咗49日，後人於是就將呢個地方名為東尋坊。
東尋坊遊覽船
有機會嚟到東尋坊，編輯部推薦您一定要去乘搭遊覽觀光船，到唔同地點、以唔同角度觀察如此稀有地質景觀。例如「大池」，您可以從下方觀賞世界少見嘅岩石柱狀節理；外觀宛如一個大型蜂巢嘅「蜂巢岩」，亦係非常獨特嘅景觀；而「獅子岩」，則係一處秘密景點，岩石外觀望上去就如一隻伸出前腳、呈坐姿嘅雄獅。
相關資訊
- 名稱：東尋坊觀光遊覽船
- 地址：〒913-0064 福井縣坂井市三國町安島64-1
- 營業時間：4月～10月9:00～16:00、11月～3月9:00～15:30
- 休息日：12/29～1/31
- Wi-Fi：有
- 語言：僅限日文
- 購票方式：現場售票處
- 信用卡：可以使用JCB、VISA、MasterCard、American Express、Diners Club、銀聯卡
- 交通方式：金澤站→［JR北陸本線・福井行］約1小時20分鐘→蘆原溫泉站→［京福巴士東尋坊線］約40分鐘→東尋坊巴士站…步行即達
東尋坊係自殺勝地？
東尋坊係日本懸疑電視劇嘅著名取景地。每到劇情高潮之時，罪犯們都會嚟到呢到自殺（劇情模式通常為罪犯被主角追捕，最後承認自己罪行）。
現實生活中，亦有唔少人專誠嚟到懸崖企圖自殺，因此當地就特地喺呢到裝設提供免費諮商嘅「救援電話」，一個民間非牟利組織更成立巡邏隊，請當地人協助勸阻其他人到東尋坊自殺，各界齊心協力為東尋坊擺脫「自殺勝地」污名。
前往東尋坊嘅交通方式
如果您想乘搭電車前往東尋坊，建議先經由北陸新幹線金澤站，或東海道新幹線米原站，然後再轉乘北陸本線前往蘆原溫泉站。從蘆原溫泉站乘搭巴士到東尋坊約需40分鐘；如果經由米原站，則可以於福井站轉乘越前鐵路到三國站，再從三國站乘搭巴士，約10分鐘即可抵達東尋坊。
如果乘搭飛機，請您選用石川縣小松市小松機場。從距離小松機場最近嘅小松站到蘆原溫泉站，車程約需30分鐘，再從蘆原溫泉站轉乘巴士前往東尋坊。
景點資訊
- 名稱：東尋坊
- 地址：〒913-0063 福井縣坂井市三國町安島
- Wi-Fi：有
- 交通方式：金澤站→［JR北陸本線・福井行］約1小時20分鐘→蘆原溫泉站→［京福巴士東尋坊線］約40分鐘→東尋坊巴士站…步行即達
Comments