東京鐵塔係其中一個東京嘅代表建築物。夜晚亮起橙色嘅燈光，非常靚。大家雖然成日見到好多東京鐵塔嘅相，但知唔知係邊到可以影到靚嘅東京鐵搭呢？
今次要介紹嘅世界貿易中心大樓瞭望台 (The World Trade Center Building - Seaside Top Observatory)，唔單止係一個可以影到東京鐵塔嘅靚位，仲可以見到東京晴空塔(Skytree)、新幹線交差點，台場彩虹橋等東京嘅象徵。一齊嚟睇下呢個世界貿易中心展望台嘅魅力吧
理由1：完美角度影東京鐵塔！
雖然東京都入面有好多可以影夜景嘅地方，但可以影到靚相而又咁近東京鐵塔嘅地方，就只係得呢個「世界貿易中心大樓」。
可以將成個東京鐵塔收入張相入面。而且呢度仲可以睇到雙塔，即係東京鐵站同埋東京晴空塔，非常扺睇。
高152米嘅世界貿易中心大樓瞭望台，係「新日本三大夜景・夜景100選」之一，呢個選舉係由夜景介紹嘅網站「夜景俱樂部」所舉辦。
理由2：鐵道粉絲必到景點！俯瞰東京各鐵道
圍繞瞭望台行一個圈大概200米，而喺呢度可以俯瞰東京嘅街道之外，仲可以一次過睇哂N700系嘅新幹線、單軌列車(Monorail)、東濱東京線、山手線、東海道線等幾條鐵路路線！
尤其係單軌列車嘅轉灣轉軌位置，可以用俯瞰嘅角度睇到列車轉軌，係好寶貴嘅體驗。而平時好難見到嘅「Yellow Doctor」列車，係呢度等候嘅話，就一定會等得到。
理由3： 仲可以睇埋台場同彩虹橋美景
世界貿易中心大樓瞭望台係繞圈嘅回廊形，所以可以睇哂唔同角度唔同位置嘅景色，無論夜晚定日頭嘅拍攝都好適合。唔止可以欣賞東京鐵塔，係另一個方向就可以欣賞台場、彩虹橋等臨海地區景色。
理由4：環境氣氛舒服，仲有優美嘅背景音樂！
係瞭望台入面設置咗好多桌椅梳化畀遊人休息。另一個值得留意嘅係裡面播嘅音樂。朝早播古典音樂，下午係拉丁系嘅音樂，而夜晚6點後就會播爵士樂。完全可以喺入面休閒咁聽住音樂，欣賞住美景，過一個舒適愉快嘅時光♪
理由5：可以用相機腳架
鍾意影相嘅人都知道，好多瞭望台或者景點都禁止使用三腳相機架，但世界貿易中心大樓呢個瞭望台係俾大家用腳架，營運嘅公司好好，考慮到大家想拍夜景，可以用腳架影靚相。
另外，瞭望台嘅玻璃窗都用咗特殊嘅塗層保護，要小心啲唔好相機鏡頭撞落窗到啊。
呢個近東京鐵塔嘅瞭望台係熟知地域嘅人先識嚟嘅景點，遊客唔會太多，可以坐喺梳化到慢慢欣賞東京鐵塔、睛空塔，甚至眺望台場臨海地區。
而呢個世界貿易中心大樓瞭望台，將於2021年3月31日關閉，因為都市規劃，同位置將會起新嘅高樓大廈。有無興趣喺佢拆之前行一轉呢？
景點資訊
- 名稱：世界貿易中心大樓瞭望台 （The World Trade Center Building - Seaside Top Observatory）
- 地址：〒105-0013 東京都港区浜松町2-4-1 40樓 (入口售票處位於1樓・B1F)
- 時間：10:00～20:30（最夜入場時間為20:00）
- ※夏季及聖誕時營運時間或會加長。
- 入場費：
- 瞭望台特惠價格
成人：620円⇒500円 ／中四或以上中學生：620円⇒350円 ／中一至中三學生：360円⇒250円
小學生：360円⇒200円／未入小學兒童：260円⇒150円
- 使用特惠格價條件
：印刷世界貿易中心大樓瞭望台網站上嘅「割引COUPON」，買飛時畀售票處
（按入網頁後，再按右下嘅「割引」，印出該POP-UP頁面內容）
- 交通方式：
: JR（山手線/京浜東北線）・東京Monorail 浜松町駅 出口直達
：都營地下鐵(淺草線/大江戶線) 大門站B3出口
Comments