有打開機嘅話,，應該對《FINAL FANTASY (最終幻想)》、《DRAGON QUEST (勇者鬥惡龍)》同《KINGDOM HEARTS (王國之心)》一啲都唔陌生吧！今次我地要介紹嘅「ARTNIA」，就係生呢啲出名遊戲出嚟嘅SQUARE ENIX公司營運，專賣官方商品嘅店鋪兼CAFE。一齊跟住FUN!JAPAN小編去睇吓呢個打機朋友會為之瘋狂嘅景點~~！
可以邊食邊買嘅 「ARTNIA」
「ARTNIA」喺地下鐵東新宿站旁，一出站就可以搵到，地理位置相當方便。店名「ARTNIA」是抽ART+AREA+NEAR組成，概念係為咗打造出相關周邊商品同玩家之間嘅橋梁平台，仲可以一嚐好好食嘅主題美食，用嘅食材都相當講究。一入到店入面，就好似入咗遊戲世界咁，間唔中就會有以前玩過嘅遊戲配樂播放。而店內嘅裝飾，亦會配合季節變更。店入面分成三大區，下面再慢慢詳細介紹。
「Luxury Area」走進《FINAL FANTASY》世界
「Luxury Area」以《FINAL FANTASY》嘅「水晶」為主題，而呢啲「水晶」其實每個都係展示櫃，展示出嚟嘅商品亦係全部可以買到，仲可以試著添！正中間嘅巨大紅色水晶，再加上繞住水晶順流而下嘅水聲，令整個空間增添咗一份神秘感。喺水晶下方面嘅球體，FF迷一定好熟悉吧~無錯！就係喺作品入面出現過嘅魔石喔。
「Café & Bar Area」美食 造型可愛又好食
當熱香餅變成史萊姆形狀，應該任何人都會覺得超可愛吧！「ARTNIA」Cafe最受歡迎嘅菜式之一，就係呢碟史萊姆熱香餅(1,030円)。一碟有3塊熱香餅，真係份量十足，旁邊仲放咗塊朱古力，寫住「史萊姆出現」，然後行動指令仲要係「食」，係咪好似玩緊遊戲重現喺現實咁呢？！呢啲都係「ARTNIA」嘅人手製作，由熱香餅嘅粉漿開始已經係由廚師整，再加乳酪同蜜糖，熱香餅都精心烤製先上枱，對於味道非常有要求，唔係剩係追求外表架。
另外，仲有有氣飲品入面加Q彈果凍嘅「Q彈史萊姆」、「Q彈橘色史萊姆」(各590日圓)。最特別嘅係Cafe Latte(610日圓起)，有無發現到呢？連隻杯都係史萊姆形狀架！就算係普通咖啡都會加上原創嘅咖啡拉花圖案，店員會問您想要《Final Fantasy》定係《Dragon Quest》。
點凍飲嘅話，會根據你點嘅嘢飲種類，隨機送上可愛嘅杯墊，可以拎返屋企做紀念。除咗甜嘢之外，「ARTNIA」仲有中午餐，意大利粉等鹹點。而且餐廳會隨住季節有更新，就算嚟幾次都會覺得有新鮮感。
「Fancy Area」獨一無二嘅SQUARE ENIX官方周邊商店
「ARTNIA」另一個特色就係有出售好多SQUARE ENIX作品嘅周邊商品。純白色嘅商品櫃，可以畀您一眼就睇到鍾意嘅角色人物、公仔、鎖匙扣、購物袋、甜食、餅乾等，商品種類豐富，相當適合去買手信返嚟送比親朋戚友。當然，亦有「ARTNIA」限定商品，例如史萊姆造型嘅馬克杯，銀色線條嘅杯緣口，都係只限「ARTNIA」獨家發售嘅商品喔。前面介紹的「Q彈史萊姆」、「Q彈橘色史萊姆」使用嘅玻璃杯，你都可以喺呢度買到。
喜歡SQUARE ENIX作品嘅朋友，下次有機會嚟東京嘅話，一定要嚟埋「ARTNIA」景點朝聖喔！
店鋪資訊
- 店鋪名稱：ARTNIA
- 地址：〒160-0022 東京都新宿區新宿6-27-30 新宿EASTSIDE SQUARE 1F
- 電話：03-6457-6714
- 營業時間：11:00～22:00（FOOD L.O 21:00、DRINK L.O 21:30）
- 預約：不可(但配合遊戲發售等特定活動，有可能需事先預約)
- 店休日：不定
- 交通方式：
- 東京Metro副都心線/都營大江戶線「東新宿」站A3出口直通
- 東京Metro丸之內線・副都心線/都營新宿線「新宿三丁目」站E1出口步行6分鐘
Comments